Të qeta dhe pa probleme kanë kaluar orët e para të së martës në fshatin Banjskë të Zveçanit, ka njoftuar Policia e Kosovës.
Zëvendësdrejtori i Policisë në Mitrovicë të Veriut, Veton Elshani, i ka thënë KOHËS se s’ka pasur incidente, derisa të hënën janë arrestuar dy persona në një hotel afër fshatit Banjskë të Zveçanit, të dyshuar për armëmbajtje pa leje.
Policia ka konfirmuar se të dyshuarit janë kapur me një sasi të konsiderueshme të armëve.
"Mbetet të shihet nga hetimet nëse kanë lidhje me sulmet ndaj Policisë së Kosovës”, thuhet në njoftimin policor.
Ndërsa janë publikuar pamje të filmuara me dron që shfaqin grupin e sulmuesve teksa lëviznin në Manastirin e Banjskës gjatë së dielës (24 shtator).
Pamjet janë publikuar nga agjencia prestigjioze “Associated Press” të hënën në mbrëmje, që materialin ia ka atribuuar Qeverisë së Kosovës.
Ata shihet teksa kanë hyrë në këtë manastir. Më pas ky grup ka sulmuar policinë. Në aksion janë vrarë tre sulmues.
© KOHA. Të gjitha të drejtat janë të rezervuara.
