Përfundon pa incidente protesta në Shtërpcë, hapet për qarkullim rruga

Protesta e filluar në orën 12:00 në Shtërpcë ka përfunduar gjysmë ore më vonë.

Kështu është bërë e ditur nga policia rajonale e Ferizajt, e cila njoftoi se edhe rruga e bllokuar për qarkullim, tashmë është liruar.

Sipas Policisë, protesta ishte e qetë dhe pa incidente të raportuara.

“Në ora 12:30 ka përfunduar protesta që ishte paralajmëruar të mbahej në Shtërpcë. Protesta ka kaluar e qetë dhe nuk është raportuar për incidente. Tani, rruga rajonale Shtërpcë – Prevallë është e lirë për qarkullimin e automjeteve”, thuhet në njoftimin e Policisë.

Kryetari i Shtërpcës, Dalibor Jevtiq, ka thënë se nga protesta po dërgojnë mesazh paqe. Ai ka thënë se është koha e fundit që “të garantohet siguria e popullit serb” në Kosovë.

Ndërsa ka thënë se do të bëjnë kërkesë të KFOR-i dhe Policia e Kosovës për të shtuar sigurinë, pasi “qytetarët serbë nuk po ndihen të sigurtë”.

Protesta po mbahet pas plagosjes së dy të rinjve serbë të premten. Një ushtar i FSK-së është i dyshuar për këtë ngjarje.

“Mesazhi kryesor që po dërohet është ai i paqes. Kur them paqe, mendoj se është koha e fundit që të garantohte siguria për popullin serb në këto territore. Ajo që ndodhi së fundi, duhet të jetë edhe paralajmërimi i fundit për të gjithë ata, që me politinën e retorikën e tyre, po ndikojnë te persona që në atë mënyrë të gjuajnë aq lirshëm në drejtim të fëmijëve. KFOR-it dhe Policisë së Kosovës do t’i kërkohet të rrisin praninë, të garantojnë sigurinë për gjithë qytetarët. Qytetarët kanë të drejtë të shqetësohen, fëmijët tanë nuk janë të sigurtë. Në ditët në vijim do të kemi një takim dhe pas takimit do të bëjmë kërkesë zyrtare”, tha Jevtiq, nënkryetari i Listës Serbe, për televizionin serb RTS.

Kryetari i Shtërpcës, Dalibor Jevtiq, ka thënë se qytetarët serbë janë mbledhur të dielën në protestë, pasi kanë qenë të detyruar.

“Stefani dhe Milloshi kanë treguar se janë të guximshëm, sepse nuk e ulën kokën kur u qëlluan. Ky numër i njerëzve tregon unitetin tonë ndaj atyre që donin të na dëbonin. Në vend që të festonim Krishtlindjet, ne duhej të protestonim për të ngre zërin ndaj të shtënave ndaj Stefanit e Milloshit. Pse? Sepse ata janë serbë”, ka thënë Jevtiq. “Pikërisht nga ky vend, ne po dërgojmë një mesazh se nuk trembemi nga ata që na gjuajnë dhe përpiqen të na dëbojmë. Ne po dërgojmë mesazh paqeje. Ky është mesazhi që dërgojmë nga kjo protestë”.

Jevtiq ka thënë se është koha që “ndërkombëtarët ta sjellin në arsye Albin Kurtin”.

“Mesazhi për përfaqësuesit ndërkombëtarë është që ta bëjnë Albin Kurtin që të kuptojë dhe të ndalojë së sulmuari fëmijët tanë. Fëmijët tanë nuk do t’i bëjmë skllevër”, tha Jevtiq.

E kryetari i Listës Serbe, Goran Rakiq, ka folur për “terror të regjimit diktatorial të Albin Kurtit”.

“Na kanë bashkuar plagët heroike të Stefanit dhe Milloshit nga Shtërpca. Por, edhe Stefanit të Kllokotit. Terrori i regjimit diktatorial të Albin Kurtit po vazhdon. Kurti luan aq fort duke menduar se serbët i hoqën barrikadat, sepse kanë frikë. Nëse Stefani nuk uli kokën, kush prej nesh mund të lëkundet dhe dorëzohet. Lufta jonë me mjete paqësore dhe demokratike është mënyra se si luftojmë kundër Kurtit. Ne kemi mbështetjen e Aleksandar Vuçiqit për këtë”, ka thënë Rakiq.

Aurora Salihu

Dhjetëra persona po marrin pjesë në protestën e organizuar në Shtërpcë pas plagosjes së dy djemve serbë para dy ditësh.

Me flamurin e Serbisë dhe parulla në duar, protestuesit janë tubuar para objektit të komunës së Shtërpcës.

“Vuçiq ruaji serbët dhe paqen”, “Ndal dhunën ndaj serbëve”, janë disa nga thirrjet e protestuesve.

Kryetari i kësaj komune, Dalibor Jevtiq, e ka thirrur këtë protestë një ditë më parë, pas plagosjes së dy djemve serbë, Stefan dhe Milosh Stojanoviq, të cilët u qëlluan me armë zjarri në fshatin Gotovushë.

Policia ka njoftuar se rruga rajonale Shtërpcë-Prevallë, do të mbyllet të dielën nga ora 11:30 për shkak të protestës së paralajmëruar që do të mbahet nga ora 12:00 në Shtërpcë.

Në njoftimin e lëshuar nga zyra për komunikim e Policisë së Ferizajt, rruga do të jetë e mbyllur nga fshati Drajkovc deri në Brezovicë.

Qarkullimi do të jetë i pamundur në këtë rrugë të paktën derisa të përfundojë protesta.

“Rruga rajonale Shtërpcë- Prevallë, nga ora 11:30 do të jetë e mbyllur për qarkullimin e automjeteve, deri në një njoftim tjetër, kjo për arsye të protestës së paralajmëruar që do të mbahet në Shtërpcë, nga ora 12:00. Rruga do të jetë e mbyllur nga fshati Drajkovc i komunës së Shtërpcës deri në Brezovicë. Sapo të përfundon protesta do të njoftoheni me kohë”, thuhet në njoftimin e Policisë.

Kryetari i Komunës së Shtërpcës, Dalibor Jevtiq, njëherësh edhe nënkryetar i Listës Serbe, ka paralajmëruar protestë për të dielën lidhur me plagosjen e dy djemve serbë, Stefan dhe Milosh Stojanoviq, të cilët u qëlluan me armë zjarri në fshatin Gotovushë.

Jevtiq përmes një postimi në Facebook ka bërë tirrje për protestë, e cila pritet të fillojë nga ora 12:00, para Shtëpisë së Kulturës në Shtërpcë.

“I uruam Stefanit dhe Miloshit shërim të shpejtë dhe të shohim sa më shpejt në shtëpitë e tyre. Të shtënat kundër Milos dhe Stefanit janë të shtëna ndaj secilit prej nesh, drejt paqes dhe lirisë. Protesta jonë do të vazhdojë më datë 8 janar në ora 12:00 në Shtërpcë, protestë e përgjithshme kombëtare e qytetarëve nga Shtërpca, por edhe nga veriu e Kosova qendrore”, ka shkruar ai.

Dy persona kanë mbetur të plagosur në fshatin Drajkovc të Shtërpcës mesditën e së premtes, ka konfirmuar Policia e Kosovës.

Sipas Policisë, personat e plagosur janë 11 dhe 21 vjeç. Ata dyshohen se janë gjuajtur me armë zjarri nga një automjet në lëvizje që po qarkullonte nga Shtërpca në drejtim të Ferizajt. I dyshuari është arrestuar.

© KOHA. Të gjitha të drejtat janë të rezervuara.