Arbëri

“Rreth Plagjiaturës të përbashkuar”, aksion i ORCA-s para Rektoratit

Organizata për Rritjen e Cilësisë në Arsim (ORCA), ka mbajtur të martën, një aksion simbolik para objektit të Rektoratit të Universitetit “Hasan Prishtina”, pas shkarkimit të rektorit Naser Sahiti.

Aksioni u shoqërua me moton “Rreth Plagjiaturës të përbashkuar”, derisa akuzoheshin Rifat Krasniqi e Selim Bezeraj si përfaqësues i Senatit të Këshillit Drejtues dhe Altin Sahiti, përfaqësues i MASHTI-it.

“Kush do ta mendonte se vetëm 21 ditë pas ardhjes në pozitë të plagjiatorit dhe infamozit të cilët e filluan mandatin e tyre në Këshill Drejtues më 1 tetor, do të arrinin marrëveshje me përfaqësuesit nga radhët e Ministrisë së Arsimit për ta shkarkuar rektorin. Më 29 qershor të këtij viti, pas zgjedhjes së plagjiatorit Selim Bezeraj në Këshill Drejtues, pat mbajtur konferencë Ministrja e Arsimit Arbërie Nagavci, e cila tha se i kishte dërguar një letër Këshillit Drejtues, anëtarëve të zgjedhur prej saj, me të cilën i kërkonte anëtarëve të vet ta inicionin rastin e plagjiaturës së Selim Bezerajt në Këshill Drejtues”, thuhet në komunikatën e organizatës.

ORCA shkroi se plagjiatura e Bezerajt nuk shkoi në Këshill të Etikës, e kjo sipas saj, duket se është negociuar me votën për shkarkimin e rektorit Sahiti.

“Pyetja që shtrohet është, a e ka ditur Ministrja Nagavci që anëtarët e vet në Këshillin Drejtues po ia pinë cigaren msheftë? Nëse po, a mund të na tregojnë pse kanë ndryshuar mendim për denoncimin e Selim Bezerajt në Këshill të Etikës? Dhe krejt në fund: kur do të fillojnë implementimet e premtimeve publike të saj për luftën kundër plagjiaturës? Ne mbesim të përkushtuar që për çdo javë të denoncojmë veprimet e secilit anëtar të Këshillit Drejtues veç e veç deri në demaskimin total të tyre”, thuhet në reagim.

Naser Sahiti u shkarkua nga posti i rektorit javën e shkuar. Zëvendëse e tij është emëruar Luljetë Plakolli – Kasumi, ndërsa të hënën është hapur konkursi për rektor të ri.