Qeveria e Gjermanisë ka pranuar se ka bërë një propozim në kuadër të dialogut Kosovë-Serbi, pak ditë pasi presidenti i Serbisë, Aleksandar Vuçiq, konfirmoi se Franca dhe Gjermania kanë dalë me propozim, e iniciativa u konfirmua edhe nga liderët e Kosovës.
Në një përgjigje për KOHËN nga Zyra për Media e Qeverisë Gjermane është thënë se Gjermania dhe Franca mbështesin tërësisht dialogun në mes të Kosovës dhe Serbisë, të lehtësuar nga emisari i posaçëm, Miroslav Lajçak. Qeveria e Gjermanisë nuk ka dhënë detaje për propozimin, që ka thënë se është diskutuar në konfidencialitet.
“Është bindje e fortë e jona se çështjet politike lidhur me rrugën drejt normalizimit të plotë duhet të trajtohen në mënyrë më vendimtare dhe të shpejtë, ashtu që të mos ketë vend për përshkallëzim në terren. Në takimet e fundit të nivelit të lartë kjo është theksuar dhe propozimet për këtë qëllim janë diskutuar në mënyrë konfidenciale. Këto diskutime janë duke vazhduar”, kanë thënë në Qeverinë e Gjermanisë.
Kjo iniciativë është bërë publike nga presidenti i Serbisë, Aleksandër Vuçiq, javën që lamë pas. Sipas tij, propozimi nga Gjermania dhe Franca nënkupton ulëse për Kosovën në OKB në këmbim të përshpejtimit të anëtarësimit të Serbisë në BE.
E kryeministri Albin Kurti propozimin e ka quajtur test për ta matur disponimin e palëve. Ndonëse pa dhënë detaje shtesë lidhur me përmbajtjen e propozimit, Osmani ka thënë se ajo është serioze. “Çdo iniciativë e partnerëve tanë është serioze. Iniciativa është që të intensifikohet procesi i dialogut dhe natyrisht si Franca, si Gjermania, kanë qenë historikisht partnere, aleate dhe mbështetëse të Republikës së Kosovës”, ka thënë Osmani të martën.
Për propozimin, të martën, është deklaruar edhe ambasadori amerikan në Serbi, Chrisptoher Hill.
“Sigurisht që kemi pasur diskutime të gjera me Bashkimin Evropian lidhur me të. E dimë që BE-ja ka zhvilluar diskutime të gjera me udhëheqësit këtu në Beograd dhe në Prishtinë. S`do të doja të hyja në detaje sepse ka diskutime të mëtejme që duhet të bëhen. Por, ne mirëpresim interesimin e përfaqësuesve të lartë të BE-së për ta adresuar këtë çështje dhe pasqyrimin e tyre në mënyrë që të ecet përpara”, ka deklaruar Hill.
KOHA ka pyetur për propozimin e përfolur edhe në Bashkimin Evropian, por përgjigje nuk ka marrë.
© KOHA. Të gjitha të drejtat janë të rezervuara.
