Kuvendi i Kosovës ka zgjedhur kryetarin dhe katër anëtarët e Bordit të Organit Shqyrtues të Prokurimit.
61 deputetë të shumicës parlamentare votuan pro zgjedhjes së Bordit të OSHP-së, derisa partitë opozitare e kishin lënë sallën më herët, pas dështimit për votim të Projektligjit për Trustin.
Kryetare e bordit u zgjodh Vjosa Gradinaj-Menxhuani, ndërsa anëtarë Nita Bejta, Kimete Gashi, Vedat Peterqoj dhe Agon Ramadani.
Paraprakisht, kryeministri Albin Kurti tha se kanë ushtruar diskrecionin e përzgjedhjes së kandidatëve për bord të OSHP-së, pasi komisioni ka qenë i pakënaqur me kandidatët që kanë aplikuar.
“Ajo që duhet potencuar është se komisioni ishte i pakënaqur me kandidatët që kanë aplikuar, qoftë në kuptim të përvojës së tyre profesionale dhe profesionalizimit në përgatitjen e kandidaturës. Në këtë kuptim, komisioni kishte rekomanduar qeverisë që të ushtrojë diskrecionin në përzgjedhjen e kandidatëve sipas të drejtës që i takon. Ky është pranuar dhe ne kemi ushtruar kompetencën tonë të garantuar me ligj dhe kemi votuar listën e kandidatëve”, tha ai.
Qindra miliona euro janë bllokuar në institucionet e ndërmarrjeve publike, si pasojë e moszgjedhjes së Bordit të OSHP-së qe më shumë se një vit.
Për qindra tenderë, bizneset kanë paraqitur ankesa e institucionet kanë ndalur derdhjen e miliona eurove, ngase ato duhet që në bazë të Ligjit për Prokurim të shqyrtohen nga bordi i saj.
Kësisoj, me qindra afate ligjore për vendim rreth ankesave janë tejkaluar.
Kuvendi sot miratoi edhe disa projektligje, në mesin e tyre atë për pyjet, parandalimin dhe kontrollin e integruar të ndotjes dhe Projektligjin për zbatimin e Sanksioneve Financiare Ndërkombëtare të Shënjestruara.
Pas miratimit të tyre, kryetari i Kuvendit, Glauk Konjufca mbylli punimet e sotme derisa tha se pikat e mbetura në rend të ditës do t’i vazhdojnë javën e ardhshme.
