Kuvendi ka emëruar anëtarin e Bordit të Organit Shqyrtues të Prokurimit. Me 59 vota është zgjedhur anëtare Batisha Ibrahimi.
Qeveria pati propozuar dy kandidatë - Batisha Ibrahimi dhe Meriton Zika - për pozitën e një anëtari të Bordit. Kjo pasi Kimete Gashi ishte shkarkuar nga pozita e anëtares me propozimin e Qeverisë, për shkak të tenderit të Ministrisë së Shëndetësisë për insulina.
Qeveria e pati iniciuar shkarkimin e Gashit pas insistimeve të OSHP-së që të procedohet me tenderin për insulina, pavarësisht se kompania fituese s’i ka garancitë e cilësisë për produktin që përdoret për trajtimin e diabetit.
KOHA pati raportuar në vazhdimësi se si Ministria e Shëndetësisë ka refuzuar për afro dy vjet nënshkrimin e tenderit për insulina me arsyetimin se kompania fituese nuk ka garancitë e cilësisë për këtë produkt. Organi Shqyrtues i Prokurimit i ka dhënë vazhdimisht të drejtë kompanisë farmaceutike që nuk e ka certifikatën e cilësisë dhe të sigurisë së barit. Në rastin më të fundit, të prillit, OSHP-ja pas orarit të punës i ka dërguar urdhëresë Ministrisë së Shëndetësisë që të procedojë me këtë tender. E për këtë, OSHP-ja i pati dhënë Ministrisë pesë ditë afat. Ky tender është hapur në fundin e vitit 2020, kur ministër ishte Armend Zemaj e sekretar i atëhershëm Ardian Mehmetaj. Prej vitit 2021, menaxherët aktualë të Ministrisë së Shëndetësisë kanë kërkuar që ky tender të anulohet e më pas, në një tender të ri të aplikojnë kompanitë që kanë Autorizim Marketingu.
Dështon votimi i marrëveshjeve ndërkombëtare
Ka dështuar të hedhen në votim marrëveshjet ndërkombëtare në Kuvendin e Kosovës.
Kuvendi nuk ka pasur numrat e mjaftueshëm të deputetëve – 80 deputetë të pranishëm – për t’i votuar ato.
Megjithatë, deputetët e pranishëm kanë vazhduar me prezantimin e katër prej këtyre marrëveshjeve të cilat deri tash nuk janë prezantuar në Kuvend nga kabineti qeveritar.
Lidhja Demokratike e Kosovës para se të fillonte trajtimi i marrëveshjeve ndërkombëtare e ka lëshuar sallën. Deputeti Driton Selmanaj ka thënë se deputetët e partisë së tij nuk mund të qëndrojnë në sallë kur prezentë nuk janë as të gjithë deputetët e shumicës.
Ndërkaq, Kuvendi ka miratuar në shqyrtim të parë Projektligjin për ndryshimin dhe plotësimin e Ligjit për zyrtarët publikë.
Shqyrtimi i parë i Projektligjit për provimin e maturës shtetërore ka kaluar në seancë tjetër në mungesë të votave.
Marrëveshjet ndërkombëtare, Murati: 300 milionë euro po presin, ju lus të votoni
Ministri i Financave, Hekuran Murati, u ka kërkuar deputetëve të opozitës që të votojnë marrëveshjet ndërkombëtare.
Murati ka theksuar se janë 300 milionë euro që janë bllokuar me bojkotin e votimit të marrëveshjeve në Kuvend. Marrëveshjet ndërkombëtare nuk janë votuar që një kohë fillimisht nga tri partitë opozitare, PDK-LDK-AAK, e më pas dy të fundit ishin shprehur se do të votonin ndërsa PDK-ja ka vazhduar ta bojkotojë votimin e tyre.
“Janë diku rreth 300 milionë euro vlerë në marrëveshjet ndërkombëtare që po presin ratifikimin nga Kuvendi. E di se disa GP kanë shprehur mbështetjen. Por iu isha lutur që si Kuvend ta kryeni obligimin. Janë 300 milionë euro që po presin”, ka thënë Murati.
S’kalon propozimi i PDK-së që të diskutohet për raportin e DASH-it
Nuk ka kaluar propozimi i Partisë Demokratike të Kosovës që në seancën e Kuvendit të enjten të futet në rend dite diskutimi në lidhje me raportin e Departamentit Amerikan të Shtetit.
Megjithëse pro saj ishte edhe Lidhja Demokratike e Kosovës, propozimi u pamundësua meqë deputetët e Vetëvendosjes votuan kundër ndryshimit të rendit të ditës.
Kryetari i Grupit Parlamentar të PDK-së, Abelard Tahiri, ka thënë se sot nuk ka asgjë më të rëndësishme sesa dy raportet e fundit ndërkombëtare për Kosovën. Sipas Tahirit, këto raporte shpërfaqin një gjendje të zymtë dhe aspak të mirë të Kosovës.
E, shefi i GP të LDK-së, Arben Gashi, ka thënë se raporti i DASH-it ka gjetur shumë shkelje. Ai ka përmendur çështjen e lirisë së mediave dhe ndërhyrjet politike në drejtësi.
LEXO EDHE:
Kuvendi sot mban seancë plenare, në rend dite sërish marrëveshjet ndërkombëtare
Kuvendi i Kosovës sot do të mbajë seancë të re plenare ku përveç deklarimeve jashtë rendit të ditës dhe pyetjeve parlamentare në rend dite është votimi i disa marrëveshjeve ndërkombëtare dhe shqyrtimi i disa të tjerave.
Votimi i marrëveshjeve ndërkombëtare ka dështuar disa herë radhazi si pasojë e mungesës së konsensusit pushtet - opozitë.
Si pasojë e mosvotimit të marrëveshjeve ndërkombëtare, ministrat disa herë kanë refuzuar t’u përgjigjen pyetjeve të deputetëve.
Kuvendi në seancën e së enjtes do të shqyrtojë në parim edhe Projektligjin për ndryshimin dhe plotësimin e Ligjit për zyrtarët publikë, Projektligjin për provimin e maturës shtetërore si dhe Projektrezolutën për vlerësimin e punës së Komisionit të Pavarur për Media për vitin 2022.
Gjithashtu Kuvendi pritet të emërojë një anëtar të Bordit të Organit Shqyrtues të Prokurimit.
Seanca do të nisë në orën 10:00.
