PSD-ja: Organet e drejtësisë janë vënë në shërbim të Kurtit

Partia Socialdemokrate ka thënë se organet e drejtësisë janë vënë në shërbim të pushtetit të kryeministri Albin Kurti, pas arrestimit të kryetarit të kësaj partie, Dardan Molliqaj.

Sipas PSD-së, arrestimi i Molliqajt është bërë në mënyrë të jashtëligjshme e skandaloze. PSD-ja pretendon se urdhërarresti i Policisë është duke u përpiluar tek tash pas arrestimit të tij. 

“Ftesat për intervistim, përkatësisht dorëzimi personal i tyre nga ana e Policisë së Kosovës nuk është realizuar në përputhje me Kodin e Procedurës Penale. Privimi i dhunshëm nga liria i Dardanit përbën abuzim me pushtetin nga ana e të gjithë zinxhirit përgjegjës brenda sistemit të drejtësisë. Arrestimi i tij është krejtësisht joproporcional dhe në shpërputhje me kushtet ligjore për një veprim të tillë. Ky arrestim ka mund të ngjajë sot në çdo kohë. Ai ka qenë në zyrë dhe nëpër takime të ndryshme në Prishtinë përgjatë këtyre dy ditëve. Tash, pasi që është arrestuar, po kuptojmë që urdhërarresti i policisë është duke u përpiluar”, thuhet në reagimin e tyre.

Partia Socialdemokrate tutje thotë se do i mbajë përgjegjës dhe do ndërmarrë të gjitha veprimet ligjore kundër të gjithë atyre që sonte abuzuan pushtetin e tyre për ta privuar nga liria Dardan Molliqajn.

“Arrestimi i panevojshëm i sotëm është i motivuar politikisht dhe është sulm i drejtpërdrejtë ndaj veprimeve tona opozitare”, përfundon reagimi i tyre.

Molliqaj u arrestua sonte për shkak goditi me shuplakë një polic gjatë protestës të së shtunës kundër shtrenjtimit të rrymës, të thirrur nga partia që e udhëheq.

Kryetari i Lidhjes Demokratike të Kosovës, Lumir Abdixhiku, ka thënë se arrestimi i sontëm i kryetarit të Partisë Socialdemokrate, Dardan Molliqaj, është shije e një hakmarrjeje të pastër politike.

Abdixhiku thotë se arrestimi i dhunshëm i Molliqajt është i papranueshëm për partinë e tij dhe kundër standardeve bazike të demokracisë.

“Kurti dhe Qeveria e tij nuk guxojnë të përdorin pushtetin policor për kërcënime e arrestime politike; sidomos kur për alternativë kanë ndjekjen normale e njerëzore të rrugëve procedurale sipas rregullave tashmë të njohura. I bëjë ftesë organeve të rendit të ruajnë integritetin e tyre profesional e të pavarur dhe të mos bëhen pjesë e këtij teatri politik të një Qeverie paranoike”, ka shkruar Abdixhiku në Facebook.

Reagime për arrestimin e Molliqajt pati edhe nga deputeti Behxhet Pacolli që tha se një arrestim i tillë “është lajm i keq për demokracinë".

Ndërsa, kryetari i AAK-së, Ramush Haradinaj, ka thënë se Policia e Kosovës dhe Prokuroria i ka procedurat e parapara për këto raste nëse ka shkelje të ligjit.

“Policia e Kosovës dhe Prokuroria i ka procedurat e parapara për këto raste nëse ka shkelje të ligjit, mendoj se nuk kanë mund ta arrestojnë, por kanë mund ta dërgojnë një ftesë. Çështja e arrestimit është pak e çuditshme për mua. Kauza e protestës ishte mjaft e drejtë për rritjen e shtrenjtimit të rrymë”, tha Haradinaj në RTK.

Molliqaj u arrestua sonte për shkak goditi me shuplakë një polic gjatë protestës të së shtunës kundër shtrenjtimit të rrymës, të thirrur nga partia që e udhëheq.

© KOHA. Të gjitha të drejtat janë të rezervuara.