Gërvalla: Do të krijojmë diferencim të pagave të ambasadorëve

Ministrja e Punëve të Jashtme, Donika Gërvalla ka thënë se një diplomat merr të njëjtën pagë si në Tiranë si në Tokio dhe Washington. Ajo ka premtuar diferencim të pagave të ambasadorëve.

Gërvalla ka thënë se kanë krijuar një komision, kanë hartuar një propozim të cilin do të ia paraqesin Qeverisë lidhur me një strukturë tjetër të pagave.

“Në do të duhej të i përshtateshim standardit jetësor. Për shkak se dikujt i ulet paga e dikujt i shtohet atje. Çështja e pagës ka qenë çështja kryesore. Unë jam habitur kur në vende si Washingtoni e Japonia e kam parë që njerëzit nuk aplikojnë atje. Fillimisht kam menduar për shkak të akomodimit të partnerëve politikë... tek më pas e kam konstatuar se është çështje e pagës. Propozimi është gati dhe ambasadorëve iu kam premtuar në fillim që të realizojmë një diferencim të tillë të pagave”, ka thënë ajo.

Komisioni për Punë të Jashtme është mbyllur për media.

Gërvalla tutje ka shtuar se nuk presin ndonjë rezultat nga takimet me Serbinë pasi sipas saj në pranverën e ardhshme presidenti serb, Aleksandar Vuçiq hyn në zgjedhje.

Ajo ka thënë se dialogu është e vetmja rrugë për gjetjen e zgjidhjeve edhe me fqinjin verior por nevojitet një gjuhë tjetër nga Serbia dhe një seriozitet i partnerëve në këtë proces.

Ndërkaq sa i përket çështjes së vizave, ajo ka thënë se më së voni pas zgjedhjeve në Francë do të hiqet skepticizmi i këtij shteti për liberalizmin e vizave.

“Rezultati qëndron në atë që nga takimi i kaluar ka pasur shkëmbime shumë intensive sidomos jo vetëm me Francën, jo vetëm MPJ por edhe MPB ka qenë shumë e angazhuar që dilemat të mund të sqaroheshin. Nga z. Sveçla kam dëgjuar që takimet me delegacionet franceze kanë qenë shumë të frytshme. Nuk dua të përjashtoj mundësinë që shumë shpejt të kemi ndryshim të kësaj qasje. Ne shpresojmë që më së voni pas zgjedhjeve në Francë do të zgjidhet kjo çështje”, ka thënë ajo.

Ministrja e Punëve të Jashtme dhe Diasporës, Donika Gërvalla, në Komisionin për Punë të Jashtme ka thënë se janë duke punuar për njohje të reja në gjithë botën, përfshirë edhe me 5 shtetet e Bashkimit Evropian që nuk e kanë bërë një gjë të tillë. Ajo ka thënë se në këto shtete ka progres, në përjashtim të njërit vend.

Ajo tutje ka folur edhe për ‘Open Ballkan’ ku ka thënë se Kosova nuk ka marrë asnjëherë ftesë zyrtare.

Sa i përket çështjes së anëtarësimit në organizata ndërkombëtare ajo ka thënë se kanë një strategji të qartë të formuluar dhe punuar me shumë kujdes për anëtarësim.

“Nëse keni pyetje për kë e kush ju kisha lut që të kalojmë në mbledhjen pa praninë e mediave sepse kam frikën e dëmtimit të proceseve. Kemi një ashpërsim të qartë të gjuhës së Serbisë dhe Rusisë. Si Kosovë kemi qenë shumë të qartë në sensibilizimin e fqinjëve dhe partnerëve në gjuhën e përdorur nga Serbia kohën e fundit. Ka qenë në agjendë lidhja e marrëveshjeve rajonale për qarkullimin me ID kartë, mirëpo bllokadat e Serbisë e kanë pamundësuar një gjë të tillë. Serbia aspak nuk është e gatshme që të lejojë asnjë qytetarë që të kalojë në Serbi me letërnjoftim”, thuhet në njoftim.

Ajo ka thënë se përmes iniciativës Open Ballkan është tentuar të krijohet një paralele jo vetëm për rrugën drejt BE-së por edhe procesit të Berlinit.

“Jemi deklaruar qartë se as nuk kërkojnë alternativa ndaj anëtarësimit në BE-së e as për iniciativat që më shumë janë fjalë goje. Republika e Kosovës nuk ka marrë asnjëherë një përshkrim për çfarë është Open Ballkan e nuk ka marrë as një ftesë zyrtare për të qenë pjesë e saj përveç asaj që është deklaruar”, ka thënë ajo.

© KOHA. Të gjitha të drejtat janë të rezervuara.