Ministrja e Punëve të Jashtme, Donika Gërvalla-Schwarz, ka thënë se Kosova do të anëtarësohet shumë shpejt në Këshill të Evropës.
Sipas saj, situata është në favor të Kosovës dhe se për këtë çështje “është bërë progres i mirë”.
“Ne kemi vendosur ta dorëzojmë aplikimin për anëtarësim në maj dhe ka lëvizje në aspektin e trajtimit. Delegacioni ynë nga Kuvendi i Kosovës për herë të parë do të marrë pjesë në Asamblenë Parlamentare me të drejtë të plotë fjale dhe ky është një progres i mirë”, ka thënë Gërvalla në një intervistë për televizionin publik.
Ajo ka thënë se shumë shtete në procesin e anëtarësimit kanë pritur me vite të tëra, por beson se në rastin e Kosovës, një gjë e tillë do të arrihet shumë shpejt.
“Besoj se Kosova do të shënojë një prej rekordeve për anëtarësim të shpejtë në Këshillin e Evropës sepse mendoj se edhe atmosfera por edhe progresi i Kosovës e mundëson një gjë të tillë“, ka shtuar ministrja.
Edhe
Gërvalla kërkon anëtarësim të shpejtë të Kosovës në Këshill të Evropës
Sa i përket pohimeve të palës serbe se Kosova është hequr nga agjenda në mbledhjen e 5 tetorit, ajo ka thënë se një gjë e tillë nuk qëndron.
Duke komentuar raportet me Shqipërinë, Gërvalla ka thënë se mospajtimi është tek iniciativa e “Ballkanit të Hapur”.
“Diplomacia shqiptare ka qenë e angazhuar rreth pavarësimit të Kosovës, rreth njohjes dhe forcimit të shtetësisë kudo. Në këtë sferë nuk ka ndryshuar asgjë. Kemi një temë, e cila nuk është për t’u fshehur e ku nuk pajtohemi - është Ballkani i Hapur dhe është qasja e kryeministrit Edi Rama ndaj kësaj iniciative. Ne mendojmë se me refuzimin e Ballkanit të Hapur kemi pasur shumë të drejtë, sidomos duke pasur parasysh rrethanat gjeopolitike, por edhe brenda një familje vëllezërit dhe motrat nganjëherë nuk e ndajnë të njëjtin mendim”, ka theksuar ajo.
Gërvalla ka dërguar mesazh të qartë diplomatëve dhe politikbërësve në Shqipëri se rruga Tiranë – Beograd kalon përmes Prishtinës.
Edhe
Gërvalla për anëtarësimin në KiE: Kosova gjithmonë duhet t’i mbipërmbushë kërkesat
”I them koleges sime dhe të gjithë diplomatëve shqiptarë se duhet të jetë e qartë për Tiranën zyrtare, se rruga Tiranë-Beograd kalon nga Prishtina edhe gjeografikisht edhe politikisht. Nganjëherë e kam përshtypjen që kjo duhet theksuar. Sidoqoftë, përkushtimi i diplomacisë së Shqipërisë për të ndihmuar Kosovën në përmirësimin e gjendjes së saj ndërkombëtare është i pandërprerë”, është shprehur Gërvalla.
Ajo ka thënë se në interes të rajonit dhe në interes të zvogëlimit rus në Ballkanin Perëndimor është shfuqizimi i iniciativës së Ballkanit të Hapur.
