Kushtrim Veliu, student i mjekësisë në njërin prej kolegjeve private në Kosovë ka treguar se si kishte dalë i mashtruar pa diplomë valide, pas studimeve tri-vjeçare në këtë institucion.
Veliu ka rrëfyer në “Java Sonte me Rronin” në KTV se pasi kishte përfunduar bachelorin në këtë kolegj, në drejtimin e ergoterapisë, dhe pasi kishte punuar për dy vjet si asistent klinik në të njëjtin institucion, kishte vendosur që të vazhdonte studimet master në Fakultetin e Shkencave Mjekësore Teknike në Tiranë, mirëpo aty e kishe kuptuar se libri amzë për gjeneratën kur ai kishte studiuar nuk ekzistonte fare në Ministri të Arsimit.
“I kam filluar studimet në vitin 2013 në Kolegjin në drejtimin e ergoterapisë, dhe kur e kam bërë si zgjedhje kam qenë i sigurt për dy arsye: e para se ka qenë drejtim deficitar dhe e dyta e kam bërë një thirrje telefonike te Agjencia e Akreditimit dhe ata më kanë njoftuar se të gjitha drejtimet e mjekësisë në këtë kolegj janë të akredituara. Në vitin 2016 e kam përfunduar bachelorin dhe jam punësuar si asistent klinik për dy vite në të njëjtin institucion. Në vitin 2018 vendosa ta lë punën dhe të vazhdoj rrugëtimin akademik në Fakultetin e Shkencave Mjekësore Teknike në Tiranë, drejtimi logopedi. Disa kolegë atje më kanë informuar se nuk mund të vish të regjistrohesh nëse nuk e ke vulën apostile të Ministrisë së Punëve të Jashtme, dhe se paraprakisht duhej ta kisha vulën e Ministrisë së Arsimit. Në ministri më thanë që duhet të plotësohet një formular të cilët duhet ta plotësojë zyra e diplomave në kolegjin ku i ke kry studimet. Kam shkuar në kolegj, u plotësua formulari dhe jam kthyer në Ministri dhe aty për herë të parë e kam marrë vesh se libri amzë për vitin 2013/2014 nuk ekziston fare në atë institucion”, ka shpjeguar Veliu.