Arbëri

Hidrodrini: Nuk ka tregues se uji i pijshëm nga ujësjellësi ka shkaktuar situatën në Deçan

Kompania rajonale e ujësjellësit “Hidrodrini” ka ardhur në përfundim se nuk ka tregues që uji i pijshëm nga sistemi i këtij ujësjellësi, të ketë qenë shkaktar i shqetësimeve shëndetësore dhe simptomave që janë paraqitur nga banorët e zonave të prekura në Deçan.

“Është konfirmuar dhe konstatuar se bazuar në analizat e gjertanishme (16.07.2021) nga IKSHPK të cilat edhe ishin në dispozicion dhe u prezantuan në takim nga ana e IKSHPK-së, nuk ka tregues që uji i pijshëm nga sistemi i ujësjellësit 'Hidrodrini', të ketë qenë shkaktar i shqetësimeve shëndetësore dhe simptomave që janë paraqitur nga banorët e zonave të prekura, të cilët kanë kërkuar ndihmë në QKMF në Deçan”, thuhet në komunikatën e lëshuar nga “Hidrodrini” pas takimit në përbërje të përfaqësuesve të “Hidrodrinit” dhe mekanizmave shetërorë e shëndetësor.

Hidrodrini po ashtu ka ardhur në përfundim se ndërprerja e ujit të pijshëm për zonën në fjalë, ka qenë vendim jo i duhur, sepse është në kundërshtim me procedurat që zbatohen në këso raste pasi siç është thënë, mund t’i ketë orientuar qytetarët për furnizim nga bunarët (puset), private, e që mund të jenë potencial kontaminimi.

Po ashtu është kërkuar që të ndërmerren urgjentisht masa në trajtimin e sistemeve të Ujsjellësit të cilat do rrisin dhe përmirësojnë sigurinë fizike të komponentëve të ujit të sistemit furnizues.