VV-ja e pranon, u propozua të ndryshohej neni për kandidim të të dënuarve

Lëvizja Vetëvendosje e ka pranuar se kishte tentuar të ndryshonte nenin për kandidim të personave të dënuar, në kuadër të ndryshimeve që i propozoi te Ligji për Zgjedhjet.

Adnan Rrustemi nga kjo parti, në Interaktiv të KTV-së ka thënë se “kjo s’është ndryshim por është harmonizim me nenin 70 të Kushtetutës së Kosovës.

“Ne kemi qenë të bindur që vendimi i KQZ-së për të penguar kandidimin e Kurtit e Haxhiut, ka qenë i padrejtë. Ne s’kemi bërë kurrfarë ndryshimi, përveçse kemi marrë një nen të kushtetutës që flet për kufizimin për situatën kur deputeti humb mandatin. Është komplet ky paragraf ku thotë se personat e dënuar me një vit e më shumë burg në tri vitet e fundit nuk mund të kandidohen. Kushtetuta e konstaton se një i tillë humb mandatin”, ka thënë ai.

Lëvizja Vetëvendosje nuk e ka mohuar se në kuadër të propozimeve për ndryshime në Ligjin për Zgjedhje, ishte tentuar të bëhej ndryshimi i një neni me të cilin parashihej që të ndryshohej edhe pika e ndalimit për kandidim personave të dënuar në tri vitet e fundit.

Në zgjedhjet e 14 shkurtit, në listën e Vetëvendosjes nuk u lejuan të përfshiheshin disa kandidatë për deputetë duke u bazuar në aktgjykimin e fundit të Gjykatës Kushtetuese me të cilën i ndalohej kandidimi personave të dënuar për vepër penale me vendim të prerë në tri vitet e fundit.

Të premten, Vetëvendosje inicioi ndryshimet në Ligjin për Zgjedhje duke thënë se po mundohet që t’i hapë rrugë për votim më të lehtë diasporës. Megjithatë, siç ka thënë Eugen Cakolli nga KDI-ja, në këtë tentim ka pasur edhe një ndryshim në të cilin parashihej që kandidimi t’u ndalohej vetëm atyre që ishin të dënuar me një ose më shumë vite burgim.

“Kjo s'ka lidhje me votimin jashtë vendit”, ka thënë Cakolli.

E këtë nuk e ka mohuar shefja e Grupit Parlamentar të VV-së, Mimoza Kusari-Lila. Në një konferencë për media, pasi dështoi që ndryshimi të bëhej me procedurë të shpejtë, ka thënë se gjithçka është bërë konform procedurave shqyrtuese.

“Po flisni për nene që ishin të hapura për t’u diskutuar sot, janë nene për të cilat po i drejtohemi Gjykatës Kushtetuese. Ne nuk i referohemi neneve, por vendimit të Kushtetueses. Është bërë konform procedurave shqyrtuese, që të mos mbështetemi në vendimet e Kushtetueses, por në Ligjin Zgjedhor”, ka thënë ajo.

© KOHA. Të gjitha të drejtat janë të rezervuara.