Seanca për presidentin, Nasuf Bejta kundërkandidat i Osmanit

Seanca për votimin e presidentit pritet të mbahet pasditen e të premtes. Në garë, përveç Vjosa Osmant do të kandidojë edhe Nasuf Bejta.

Në zgjedhjet e 14 shkurtit, Bejta garoi në listën e Lëvizjes Vetëvendosje me numër 64 dhe ishte përfaqësues i Iniciativës së Vjosa Osmanit në listë, raporton Koha. 

Në zgjedhjet e fundit ai mori mbi 5 mijë vota, ndërsa më herët pati qenë anëtar i LDK-së.

Bejta ka deklaruar se po kandidon për ta ndihmuar procesin, “që shteti të ketë institucione stabile”.

“Ky stabilitet është i mundshëm vetëm kur ta përmbyllim procesin me zgjedhjen e presidentit të vendit. Pra, unë po vihem në shërbim institucional për ta përmbyllë vullnetin e qytetarëve të shprehur më 14 shkurt. Për mua është nder që të jem në shërbim të interesit shtetëror. E ky vullnet konsiston që vendi të bëhet me president”, ka shkruar ai në Facebook.

Lëvizja Vetëvendosje thuhet se ka mbledhur nënshkrimet për seancën e jashtëzakonshme për votimin e Vjosa Osmanit si presidente e Kosovës.

Përparim Kryeziu i tha KOHËS se seanca e Kryesisë së Kuvendit pritet të mblidhet brenda orëve të pasdites të së premtes.

“Janë mbledhur nënshkrimet për seancë. Gjasat janë që po, pasdite mund të mbahet, por nuk është vendosur ende. Pritet të vendoset pas mbledhjes së Kryesisë”, tha ai.

Siç mëson Koha, mbledhja e Kryesisë së Kuvendit pritet të mbahet në orën 15:00.

Lëvizja Vetëvendosje ka filluar t’i mbledhë nënshkrimet për seancë të jashtëzakonshme për votimin e Vjosa Osmanit si presidente e Kosovës, mëson Koha.

Ende nuk është vendosur ora se kur do të thirret kjo seancë.

Aktualisht, në Kuvend po mbahet seancë plenare me tri pika të tjera të rendit të ditës.

Osmani dhe partia e cila e ka kandiduar për këtë pozitë, kanë kohë deri të hënën më 5 prill që t’i nisin procedurat për zgjedhjen e kreut të shtetit. Kjo meqë afati prej një muaji për zgjedhjen e kreut të shtetit, para përfundimit të mandatit të presidentit aktual, vlen edhe për ushtruesin e detyrës.

© KOHA. Të gjitha të drejtat janë të rezervuara.