13:19

Qeveria Hoti premton 400 milionë euro për rimëkëmbje ekonomike, nëse vjen në pushtet

Deputeti dhe Sekretari organizativ i LDK-së, Arban Abrashi është deklaruar për media pas takimit që thirri Avdullah Hoti, kandidat për kryeministër nga Lidhja Demokratike e Kosovës.

Ai tha se Qeveria Hoti synon që deri në vjeshtë të ndajë 400 milionë euro.

Abrashi i është referuar Hotit si kryeministër, ndonëse dekreti për mandatimin e tij nga presidenti Hashim Thaçi ka përfunduar në Gjykatën Kushtetuese. VV-ja thotë se vetëm asaj si parti fituese e zgjedhjeve të fundit i takon formimi i qeverisë.

"Programi qeverisës do të ketë dy shtylla. E para për menaxhimin e pandemisë, ku synojmë të përfshijmë të gjitha protokollet, sidomos ato të Komisionit Evropian dhe e dyta, rimëkëmbjen ekonomike. Çdo ditë e humbur me qeverinë Kurti po shkakton dëme ekonomike për bizneset, synojmë të kemi një pako gjeneroze, ku deri në vjeshtë do të shpërndajmë së paku 400 milionë euro, e më të kalojmë edhe te një miliardshi, që e ka përmendur kryeministri Hoti", ka thënë Abrashi.

Hoti sot gjatë ditës tha se qeveria me të në krye do të investojë për rimëkëmbje ekonomike e shkaktuar nga pandemia.

“Në programin për rimëkëmbje ekonomike te Qeverisë së re kemi paraparë dyfishim të të gjitha subvencioneve në bujqësi, krahas masave për mbështetje të kredive bujqësore dhe investimeve në sisteme të ujitjes”, tha sot gjatë ditës Hoti përmes një njoftimi në Facebook.

10:56

Hoti pritet që sot t’ua prezantojë bashkëpartiakëve planprogramin qeverisës

I nominuari nga Lidhja Demokratike e Kosovës për kryeministër, Avdullah Hoti pritet që sot t'i takojë deputetët e partisë së tij.

Siç mëson KOHA, në takimin i cili do të fillojë në orën 13:00, Hoti do t’ua prezantojë bashkëpartiakëve të tij planprogramin qeverisës.

Ky takim është duke u mbajtur derisa kjo parti është në pritje të vendimit të Kushtetueses për dekretin e presidentin.

Gjykatës Kushtetuese i kanë mbetur edhe tetë ditë deri në nxjerrjen e vendimit për mandatarin e qeverisë.

29 maji është afati i fundit kur Kushtetuesja duhet të vendosë nëse është në përputhje me aktin më të lartë juridik dekreti i presidentit për mandatimin e Avdullah Hotit për kryeministër.