Thaçi ende pa iu përgjigjur ftesës së Kurtit, niset për Gjermani

Derisa kryeministri i Kosovës Albin Kurti, i bëri ftesë për takim presidentit Hashim Thaçi, ky i fundit veçse është nisur për në Munih të Gjermanisë.

Përmes kumtesës zyrtare nga presidenca, thuhet se Presidenti i Republikës së Kosovës, Hashim Thaçi, ka udhëtuar sot për në Gjermani, ku do të marrë pjesë në Konferencën e Sigurisë së Munihut.

“Në margjinat e Konferencës së Sigurisë së Munihut, presidenti Thaçi do të ketë takime të ndryshme bilaterale, ndër të tjera edhe me senatorët amerikanë Ron Johnson dhe Chris Murphy, me Ndihmëssekretarin e Departamentit të Shtetit, Philip Reeker, pastaj me Drejtorin Politik të Ministrisë së Jashtme të Mbretërisë së Bashkuar, Richard Moore, si dhe me Ministrin e Jashtëm të Sllovakisë, Miroslav Lajçak”, thuhet më njoftim, transmeton Koha.net.

Në kumtesë, theksohet se, po ashtu, presidenti Thaçi në kuadër të kësaj konference do ta takojë edhe të dërguarin e posaçëm të Presidentit Trump për dialogun Kosovë – Serbi, ambasadorin Richard Grenell.

Kryeministri i Republikës së Kosovës, Albin Kurti, me anë të letrës zyrtare ka ftuar sot në takim Presidentin e Republikës së Kosovës, Hashim Thaçi, për të bashkërenduar qëndrimet për politikën e jashtme, para udhëtimit në Konferencën për Siguri në Munih të Gjermanisë.

Kurti e ka ftuar Thaçin sot për në orën 12:00, 16:00 ose 17:30. Ia ka shtuar gjithashtu si opsion edhe mbrëmjen.

"Le ta japim tërë kapacitetin tonë intelektual e patriotik në prezantimet e takimet qe do t'i bëjmë. Ju ftoj për sot në orën 12:00, 16:00 ose 17:30 apo edhe në mbrëmje qe te takohemi e te dakordohemi se bashku për temat e për qëndrimet tona", thuhet mes tjerash në letër.

Fillimisht, Kurti ekskluzivisht mbrëmë në Rubikon të KTV-së e ftoi Thaçin për takim.

“Të jetë një takim kur ne i shtrojmë këto gjëra, sepse nuk mund të lejojmë që shteti i Kosovës që sulmohet aq shumë, të ketë zëra të ndryshëm. Meqenëse nuk u takuam deri tash i bëj ftesë presidentit që të takohemi për t’u dakorduar për të gjitha proceset ndërkombëtare. Fundja edhe një letër e Trumpit drejtuar presidentit Thaçi kërkon zë të unifikuar”, tha mbrëmë Kurti.

+ 1

© KOHA. Të gjitha të drejtat janë të rezervuara.