I dërguari i Posaçëm i SHBA-së për dialogun Kosovë-Serbi, Richard Grenell, pas takimit me kreun e VV-së Albin Kurtin, tha se me të ka biseduar vetëm për çështjet ekonomike, derisa theksoi se dëshiron “të lë anash çështjet politike”.
Ambasadori Grenell tha se i ka kërkuar Kurtit që t’i lë anash mospajtimet politike, të formojë qeverinë dhe të përqendrohet në zhvillimin ekonomik të vendit. Kurse mesazh i veçantë ishte që taksa 100 për qind të cilën Kosova u ka vendosur importeve nga Serbia dhe Bosnje e Hercegovina, që nga nëntori i vitit 2018, duhet të hiqet.
Ai para mediave tha se Kurtit i ka thënë se “çështja e krijimit të qeverisë së Kosovës nuk është çështje e tij”, prandaj, tha ai, s’ka diskutuar për këtë temë, transmeton Koha.net.
“E inkurajuam Kurtin të ndjekë ligjin dhe çështja e taksës mbetet e rëndësishme, ajo duhet të hiqet”, tha Grenell.
“Po i them dy gjëra, i thashë Kurtit që vendet si Britania e Gjermania po e përcjellin situatën. I thamë të ndjekë ligjin nëse do që të arrihet suksesi. E dyta që ia thashë është për çështjet ekonomike. Gjëja më e rëndësishme, krijoni vende pune. Njerëzit janë të interesuar që të ndihmojnë ekonominë këtu, administrata e Trumpit ka qenë mjaft e suksesshme në rritje të ekonomisë duke ju ndihmuar bizneseve përmes qeverisë, tha ai.
Edhe
Grenelli kërkon nga Serbia t’i japë fund fushatës për tërheqjen e njohjes së Kosovës
Grenellin e shoqëroi edhe ambasadori amerikan në vendin tonë, Philip S. Kosnett.
“Jam duke provuar të injorojë politikën dhe të koncentrohem në ekonomi. Është shumë e rëndësishme që nëse duam të korrim sukses në ekonomi, duhet të hiqet taksa”, tha ai.
