Kunata e kryeministrit Haradinaj punësohet pa konkurs si zv/drejtoreshë e Financave në Telekom

Ardiana Thaçi Mehmeti Ardiana Thaçi Mehmeti 15 March 2019 19:11

Pozitë shumë të rëndësishme brenda Telekomit, ka marrë muajin e kaluar Vesmira Haxhaj - Haradinaj.

Zëvendësdrejtoresha e re e Financave në ndërmarrjen publike, është kunata e kryeministrit të vendit, Ramush Haradinaj – gruaja e vëllait të tij, Frashër Haradinaj, raporton KTV.

Ka disa javë që ajo është parë në punën e saj të re, por KTV-ja ka mundur të vërtetojë se ajo e ka marrë kontratën nga 22 shkurti, kurse në sistem ka hyrë vetëm brenda kësaj jave.

Ani pse rroga e saj prej rreth 2,200 eurosh, është pak më e vogël se e kunatit-kryeministër dhe e barasvlershme me atë të kunatit tjetër, deputetit Daut Haradinaj, ajo është vënë në këtë pozitë pa u shpallur fare konkurs.

Në një intervistë për KTV-në, në qershor të vitit të kaluar, Haradinaj kishte thënë se njerëzit e Aleancës nuk kishin guxuar as të konkurrojnë për vende pune në kohën që kjo parti ishte në opozitë.

Kohavisioni ka dërguar pyetje edhe te Zyra e Kryeministrit të Kosovës, Ramush Haradinaj, nëse ai ka përdorur autoritetin e tij për ta punësuar kunatën në Telekom, por Kryeministria nuk ka kthyer përgjigje.


Përgjigje për këtë emërim apo punësim nuk ka dhënë as menaxhmenti i Telekomit, pavarësisht që televizioni ka pritur dy ditë për përgjigje.

Kontakti me Haxhaj-Haradinajn, zëvendësdrejtoreshën e re të Financave, ka qenë i pamundur.

Punësimi i saj e shton listën e gjatë të të punësuarve me nepotizëm, në valën e madhe të punësimeve në Telekom, të nisur nga shkurti i vitit 2018, pak muaj pasi që AAK-ja e mori pushtetin.

Pikërisht pas raportimeve të vazhdueshme të KTV-së, Policia e Kosovës ka konfirmuar se ka nisur hetimet për këto punësime.

Prokuroria, gjithashtu, ka konfirmuar se tashmë janë marrë dokumentacione nga zyrat e Telekomit, në shërbim të këtyre hetimeve.

© KOHA. Të gjitha të drejtat janë të rezervuara.

Komentet

albani16/03/2019 17:33

Kjo vetem ka marre permasa te krimit te organizuar ne Nderrmarjet publike, e posacrishte ne PTK. Qeveria si aksionare ne kete Nderrmarrje duhet te nderrmerre masa urgjente per nderprerjen e kketij krimi. Eshte jo ligjore dhe tejet e pamoralsheme se shume nepotike te punsohet vetem nji kategori njerzishe te aferte me pushtetaret dhe partite ne pushtet. Arsyetimi se pjestaret e disa partive kan qene te diskriminuar, nuk arsyeton keto veprime abuzive dhe te denusheme.

Ramiz Bujupi16/03/2019 17:33

Nepotizmi eshte nje tradite shume e hershme mes Shqiptarve neper institucioneve publike. Ne fakt nje dukuri e tille eshte dhe ka qen e pritshme,me keto veprime vetem vuloset kjo priteshmeri e cila ka pasojat shume te renda ne ndertimin e shoqerie transparente, ku duhet te mbizotrojne vetem kompetenca dhe profesionalizem.

Shto koment

Të ngjashme