VV-ja e LDK-ja e dërgojnë në Kushtetuese Ligjin për Dialog

VV-ja e LDK-ja thonë se Ligji për Dialogun shkel kushtetutën, paralajmërojnë protesta

15 March 2019 12:23
14:46

Lëvizja Vetëvendosje dhe Lidhja Demokratike, pasi e kanë dërguar në Gjykatën Kushtetuese Ligjin për detyrat, përgjegjësitë dhe kompetencat e Delegacionit shtetëror të Republikës së Kosovës, njëzëri u shprehën se e kundërshtojnë në tërësi kushtutetshmërinë e këtij ligji.

Deputeti i LDK-së, Driton Selmanaj, tha se ky ligj shkel kushtetutën së paku në nëntë nene.

“Ne po e kontestojmë në tërësi këtë projekt ligj, ky projektligj shkel nenin 2, nenin 4, nenin 7, 18, 20, 90 dhe 94, dhe të gjitha këto shkelje antikushtetuese”, tha ai, transmeton kp.

Sipas tij, përmes këtij ligji po krijohet një tendencë që të avancohet një trup, si ekipi i dialogut e që është antikushtetues.

“Kjo përpjekje e cenon rëndë hierarkinë e institucioneve dhe synon që të deformohen pushtetet në Kosovë“, shtoi Selmanaj.

Kurse, deputetja e VV-së, Albulena Haxhiu, tha se presidenti i vendit ka marrë përsipër çështjen e dialogut, pa asnjë autorizim nga Kuvendi, gjë që sipas saj është antikushtetuese.

“Kuvendi deri më tani do të duhej që ndalonte Presidentin Hashim Thaçi të dialogojë për ndarje të Kosovës.”

Ajo konsideron se përmes këtij ligji po mundohen që t’ia përshtatin mënyrën e dialogun presidentit Thaçi.

Haxhiu bëri të ditur se kanë kërkuar që menjëherë të vendoset masë e përkohshme për të ndaluar këtë ekip të marrë ndonjë veprim për dialogun me Serbinë.

Ajo ka paralajmëruar se për të kundërshtuar këtë çështje do të organizojnë edhe protesta.

Protestat nuk i përjashtoi as deputeti Selmanaj, i cili tha se megjithatë i shohin si mjetin e fundit të kundërshtimit.

12:23

VV-ja e LDK-ja e dërgojnë në Kushtetuese Ligjin për Dialog

Lëvizja Vetëvendosje dhe Lidhja Demokratike e kanë dërguar në Gjykatën Kushtetuese Ligjin për detyrat, përgjegjësitë dhe kompetencat e Delegacionit shtetëror të Republikës së Kosovës.

Lidhur me pikat në të cilat kundërshtohet ky ligj, pritet që zyrtarët e këtyre dy partive të flasin në një konferencë për medie, të paralajmëruar për në orën 14, që do të mbahet në ambientet e Kuvendit të Kosovës, raporton KTV.

Kujtojmë se Ligji për Dialog kaloi në lexim të dytë në seancën e mbajtur më 7 mars, kur edhe u miratua edhe Platforma për dialogun.

© KOHA. Të gjitha të drejtat janë të rezervuara.

Komentet

Shto koment

Të ngjashme