LDK e VV dërgojnë në Kushtetuese Projektligjin për Dialog, paralajmërohen protesta

Ligji për Dialogun, i cili të enjten mori votat e deputetëve, pa LDK-në e Vetëvendosjen, javën që vjen, do të përfundojë në Kushtetuese.

Vetëvendosje e LDK, veçse kanë nisur punën në këtë drejtim, e brenda afatit ligjor atë do ta kontestojnë në Kushtetuese, raporton KTV.

Albulena Haxhiu, që është edhe kryetare e Komisionit për Legjislacion, ka thënë se shumë nene të projektligjit për dialogun bien ndesh me Kushtetutën, e sidomos neni përmes së cilit e zhbën ligjin për marrëveshje ndërkombëtare, ligj ky që buron nga Kushtetuta.

Por, opsion nuk është vetëm Gjykata Kushtetuese. Marsi do të jetë edhe muaj i protestave, ka thënë ajo.

Bashkë me ligjin, të enjten, dritë jeshile iu dha edhe platformës, ky dokument që nuk është më shumë se një rezolutë e Kuvendit, pa karakter obligativ.

Edhe Arbëri 14 mar 2019 Ligji për Dialogun nesër dërgohet në Kushtetuese

Artan Murati nga KDI-ja tha se pa pasur një konsensus të gjerë politik në Kuvend do të jetë e pamundur që të materializohet kjo platformë, sepse nuk garantohet se do të ketë edhe miratim të ndonjë marrëveshjeje potenciale me Serbinë.

Një ditë më herët, në Kuvendin e Kosovës, partitë në pushtet, me mbështetje të PSD-së, mezi arritën t’i siguronin votat për ta kaluar Projektligjin për Dialogun e Platformën e hartuar nga ekipi shtetëror për dialog.