Burri i Donika Kadaj Bujupit punësohet në Telekom, deputetja thotë se “juristi ishte 20 vjet pa punë”

13 March 2019 21:56

Përveç privilegjeve që ua ofron pozita e të qenit deputet në Kuvendin e Kosovës, shumë prej tyre, kryesisht ata që janë në pushtet, shfrytëzojnë autoritetin për të punësuar familjarë nëpër institucionet publike.

Telekomi i Kosovës është bërë dera e parë për këto punësime.

28-vjeçari Genc Nitaj, mori kontratën më 28 gusht të vitit të kaluar, si zyrtar i marketingut në këtë ndërmarrje.

Genci është djali i deputetit të AAK-së, ish-gazetarit Muharrem Nitaj.

Por, Nitaj ka mohuar të ketë përdorur autoritetin e tij për ta punësuar të birin në ndërmarrjen e cila atë kohë ishte nën menaxhimin e Gent Begollit, një ish-zyrtari të AAK-së.

Sipas tij, djali u punësua me meritë dhe ka kualifikim më të lartë sesa pozita që e mban aktualisht, e që është zyrtar i marketingut.

Donika Kadaj-Bujupi, që u kthye në AAK pasi e braktisi Vetëvendosjen, gjithashtu ka të punësuar familjarë në Telekom.

Nga 1 gushti i 2018-s, Naser Bujupi, bashkëshorti i saj, u punësua agjent i shitjes në Telekom.

Ajo ka thënë se bashkëshorti i saj është jurist dhe për 20 vjet ka qenë i papunë.

Sipas një raporti zyrtar të Telekomit, 234 persona janë punësuar në periudhën shkurt 2018- 2019.

Në total, Telekomi ka 2 mijë e 540 punëtorë, për dallim prej 2 mijë e 295 sa kishte në vitin 2016

© KOHA. Të gjitha të drejtat janë të rezervuara.

Komentet

Hajriz14/03/2019 15:41

Në emisionete tv21 click,i ndëgjonim Muharrem Nitajn,Dukagjin Goranin,e kur thirrej edhe Donika Kaden,duke na u përbe se sa të ditur dhe të ndershëm janë.Sa po e fituan pak pushtet,nisen të flasin dhe të veprojnë ndryshe,nga qysh ishin deklarue vet.Tani këta intelektual të ,,dëshmuar,, u shpërfaqen tamam si ishin,matrapazë,rrenacak e tregtar të pisët.

Shto koment

Të ngjashme