-
Nga:
Valbona Bytyqi
- 1 nëntor 2023 20:10
- Shpërndaje në:
125 kërkesa për riregjistrim të automjeteve me targa ilegale janë bërë nga serbët e veriut në ditën e parë të rrjedhjes së afatit të ri për konvertimin e tyre në RKS. Për t'i informuar qytetarët serbë lidhur me lehtësirat që kanë, të mërkurën u angazhuan pjesëtarët e Policisë. Një ekip i KOHË-s ka shoqëruar një patrullë policore, teksa zyrtarët e saj shpërndanë fletushka informuese
Asnjë veturë me targa të lëshuara nga autoritetet e Serbisë nuk i ka shpëtuar nismës për informim të fillimit të afatit të ri për konvertimin e tyre në RKS.
Vozitësit serbë me targa ilegale u ndaluan një nga një nga Policia dhe u informuan për mundësitë e lehtësirat që kanë për t'i marrë targat e Kosovës.
Fletushkat informuese në gjuhën serbe që iu shpërndanë atyre përmbanin informacione mbi afatet e mundësitë.
Disa prej serbëve shfrytëzuan këtë edhe për t'i pyetur policët për hollësi të tjera.
E disa të tjerë thanë se tashmë kanë aplikuar për konvertimin dhe se janë në pritje të marrjes së targave të reja.
Sipas informacioneve jozyrtare, vetëm të mërkurën deri në orën 14, në ditën e parë të rrjedhjes së afatit të ri, kërkesë për t'i regjistruar automjetet e tyre kanë bërë 125 serbë.
Zv.drejtori i Policisë për rajonin e veriut, Veton Elshani, tha se për vazhdimin e një afati të tillë ka pasur kërkesa të shumta nga serbët.
Tek bëri thirrje që të shfrytëzohet mundësia e dhënë, Elshani tha se qytetarët që ngasin vetura me targa ilegale do të jenë çdo ditë e më shumë të kufizuar.
"Nuk ka kurrfarë benefiti as nuk ka liri të lëvizjes as s`ka lëvizje të qartë dhe regjistrimi i këtyre veturave dhe konvertimi në RKS hap dyer edhe për Kosovë edhe për më gjerë", ka thënë Elshani.
Ai ka sqaruar edhe se si do të veprohet pas 1 dhjetorit, kur edhe përmbyllet afati i dytë për riregjistrim.
"Nëse një person e shohim me një veturë me targat ilegale pas kësaj date targat i largohen nga automjete vetura nuk do të jetë në lëvizje...lëvizja e atij automjeti nuk do të jetë në rrugë", ka deklaruar ai.
Vendimi, që afati për regjistrimin e automjeteve me denominime të targave “PR”, “KM”, “PZ”, “GL”, “UR”, “PE”, “DA” apo “ĐA të zgjatet deri më 1 dhjetor, është marrë dy ditë më parë nga Qeveria e Kosovës. Pronarët e këtyre veturave patën edhe një afat vitin e shkuar e që vazhdoi edhe në muajt e parë të këtij viti.
