LDK-ja e mban Prishtinën, LVV-ja e merr Mitrovicën

LDK-ja e para, do t’i udhëheqë komunat me rreth 460 mijë banorë

Lidhja Demokratike e Kosovës dhe Lëvizja Vetëvendosje kanë fituar zgjedhjet lokale në nga shtatë komuna. Por bazuar në numrin e banorëve, sipas regjistrimit të vitit 2024, LDK-ja do të ketë më “shumë pushtet” pasi do të udhëheqë komuna me rreth 100 mijë banorë më shumë se që kanë komunat e fituara nga VV-ja.

LDK-ja ka fituar të dielën në Prishtinë, me numrin më të madh të banorëve në Kosovë, si dhe në Pejë, Viti, Dragash e Junik. Paraprakisht kishte fituar edhe në Lipjan e Istog.

Edhe pse ka marrë një komunë më pak se VV-ja, Partia Demokratike e Kosovës ka fituar në komuna që kanë më shumë banorë dhe është e dyta në këtë ndarje. PDK-ja ka fituar në Prizren, Ferizaj, Skenderaj, Vushtrri, Kaçanik e Han të Elezit. Në total ajo udhëheq në komuna me rreth 390 mijë banorë.  

Lëvizja Vetëvendosje ka fituar në Gjilan e Mitrovicë të Jugut si dy prej shtatë qendrave më të mëdha të Kosovës. Kjo parti po ashtu ka fituar në Podujevë, Shtime e Kamenicë në raund të parë dhe në Fushë-Kosovë e Obiliq në raund të dytë. Në total, kjo parti udhëheq në komunat me rreth 350 mijë banorë.

Ndërkaq, Aleanca për Ardhmërinë e Kosovës ka fituar në pesë komuna me rreth 220 mijë banorë. Ajo ka fituar në Gjakovë, Suharekë, Rahovec, Klinë e Deçan.

Edhe pse ka fituar në 10 komunat me shumicë serbe, Lista Serbe udhëheq në komunat me rreth 65 mijë banorë

Malishevë me rreth 42 mijë banorë dhe Drenasi me 47 mijë udhëhiqen nga Nisma dhe Ramiz Lladrovci si kandidat i pavarur.

Edhe për nga sipërfaqja e territorit nga totali i komunave, LDK-ja ka më së shumti me rreth 2700 kilometra katrorë. LVV-ja me rreth 2100 kilometra katrorë, PDK-ja me rreth 1990 kilometra katrorë, AAK-ja me rreth 1830 kilometra katrorë kurse Lista Serbe me rreth 1700 kilometra katrorë.  

Çeku uron Ramën: Prishtinës i uroj të dalë nga kaosi

Hajrulla Çeku, kandidat i Lëvizjes Vetëvendosje, ka uruar Përparim Ramën e Lidhjes Demokratike të Kosovës për fitoren në balotazhin në Prishtinë.

Çeku ka thënë se i uron Ramës fitoren dhe Prishtinës që “të dalë nga kaosi në të cilin është futur”.

Ai është zotuar për përkushtim ndaj Prishtinës dhe opozitarizëm në Kuvendin Komunal.

“Kjo fushatë dhe takimet e mia me ju gjatë gjithë kësaj periudhe kanë qenë përvojë e jashtëzakonshme për mua. Ndjesinë e ngrohtë që ma keni dhuruar nuk do ta ndërroja me asgjë. Faleminderit nga zemra për çdo votë dhe për çdo përpjekje që keni bërë për ndryshimin që e besuam bashkë. Jemi shumë, dhe kjo më jep forcë e besim për të ardhmen e Prishtinës. Kjo garë tregoi se sa shumë njerëz e duan një Prishtinë më të mirë. E uroj z. Rama për fitoren dhe i uroj me zemër kryeqytetit tonë, Prishtinës, që përnjëmend të dalë nga kaosi në të cilin është futur”, ka shkruar Çeku në Facebook. “Si Lëvizje VETËVENDOSJE!, do të sigurohemi që nga opozita në Kuvendin Komunal të Prishtinës t’u qëndrojmë afër qytetarëve dhe të përcjellim secilin hap që qeverisja e ardhshme do ta ndërmarrë, duke u siguruar që interesi i qytetarëve dhe i qytetit të mbrohet deri në fund”.

Rama fitoi në balotazh me rreth 2800 vota më shumë se Çeku.

Rama: Prishtina tregoi që nuk e do bllokimin

Kryetari edhe për një mandat i Prishtinës, Përparim Rama, në tubimin festiv pas balotazhit të 9 nëntorit, ka thënë se qytetarët e Prishtinës edhe një herë treguan se dëshiron zhvillim e jo bllokim. 

Në fjalën e mbajtur pas fitores ndaj Hajrulla Çekut të Vetëvendosjes, Rama ka thënë se Prishtina tani po bëhet metropol.

“Prishtina tregoi që ka zhvillim, tregoi që nuk dëshiron bllokim. Po shkojmë përpara drejt zhvillimit. E filluam katër vjet më parë me projekte të mëdha për transformim të kryeqytetit tonë të zemrës. Nuk është vend i vogël, Prishtinën tani po e bëjmë metropol së bashku”, ka thënë ai.

Rama tutje ka bërë thirrje për pushtetin qendror që të jetë bashkëpunues me kryeqytetin.

“E thërras qeverinë e tashme në detyrë dhe çfarëdo qeverie në të ardhmen që të jetë bashkëpunuese me kryeqytetin sepse kryeqyteti është zemra e gjithë Kosovës dhe e kombit tonë, prandaj kushdo që vjen në nivel qendror duhet të jetë bashkëpunues. E dini që i kam premtuar 1.5 miliardë investime, kështu që së bashku do ta transformojmë kryeqytetin e zemrës”, është shprehur ai.

KQZ-ja shpall rezultatet preliminare

Foto: Arkiv

Komisioni Qendror i Zgjedhjeve ka shpallur rezultatet preliminare për garën e balotazhit.

Sipas rezultateve, LDK-ja ka fituar më shumë komuna në rundin e dytë. Përparim Rama fitoi në Prishtinë, Gazmend Muhaxheri në Pejë, Bexhet Xheladini në Dragash, Ruzhdi Shehu në Junik e Sokol Haliti në Viti.

LVV-ja me Faton Pecin fitoi në Mitrovicë të Jugut, Alban Hysenin në Gjilan, Halil Thaçin në Obiliq e Valon Prebrezën në Fushë-Kosovë.

AAK-ja doli e para në Gjakovë me Ardian Gjinin, Bali Muharremajn në Suharekë, Smajl Latifi në Rahovec e Zenun Elezajn në Klinë.

PDK-ja fitoi në Prizren me Shaqir Totajn, në Kaçanik me Sabedin Vishin dhe në Vushtrri me Ferit Idrizin.

Kryesuesi i Komisionit Qendror të Zgjedhjeve, Kreshnik Radoniqi, ka thënë se shpreson që brenda javës së dytë të shpallen rezultatet përfundimtare të balotazhit që u mbajt sot. 

Ai ka thënë se votat e diasporës pritet të nisen gjatë fillimit të javës së ardhshme. 

Ai ka thënë se sipas ligjit votat do të nisen nesër e pasnesër, ndërsa në disa vende ku e hëna e marte e ardhshme janë pushim, do të nisen të mërkurën. 

“Deri në fund të javës së ardhshme shpresojmë t’i pranojmë të gjitha votat e diasporës, të shohim me dërgesat nga Australia e SHBA-ja nëse do të vijnë me kohë. Me rastin e arritjes do t’i vlerësojmë dhe do të fillojë numërimi. Shpresojmë që brenda javës së dytë t’i kemi rezultatet përfundimtare”, ka thënë Radoniqi në konferencë për media. 

Kurti: Fushë-Kosova do ta ketë mbështetjen e fuqishme të Qeverisë dhe timen si kryeministër

Albin Kurti

Kryetari i Lëvizjes Vetëvendosje, Albin Kurti, në tubimin festiv të kësaj partie në Fushë-Kosovë ku VV-ja fitoi në balotazh përball LDK-së, ka thënë se kjo komunë do ta ketë mbështetjen e Qeverisë së Kosovës dhe të tij si kryeministër. 

Kurti nga Fushë-Kosova ka premtuar se Vetëvendosja do ta bëjë ndryshimin e madh me kryetarin e ri.

“Pas dy dekadave të partisë pushtet, të pushtetit parti, LVV-ja e bëri ndryshimin e madh me kryetarin e ri. Valon Prebreza do të sjellë demokraci, mirëqenie, zhvillim dhe funksionalitet, dinjitet dhe barazi për të gjithë. Këto janë zgjedhjet e katërta në të cilat VV-ja merr pjesë në garat për komunat e Kosovës. Valon Prebreza do ta ketë mbështetjen e fuqishme të parezervë, të pakursim e papushim të Qeverisë së Republikës së Kosovës dhe timen si kryeministër”, ka thënë Kurti. 

Pas 25 vjetëve Fushë-Kosova më nuk do të udhëhiqet nga Lidhja Demokratike e Kosovës. 

Valon Prebreza i Lëvizjes Vetëvendosje pritet të marrë drejtimin e Fushë-Kosovës. 
Kur janë procesuar 81.36 për qind të vendvotimeve, Prebreza kryeson me 8575 vota, ndërsa Besnik Osmani i LDK-së i ka 7031 vota. 

VIDEO:

Vetëm në katër komuna kryetarë të rinj

Vetëm në katër komuna me shumicë shqiptare do të ketë kryetar të rinj pas zgjedhjeve lokale të mbajtura më 12 tetor dhe ato të balotazhit më 9 nëntor.

Ndryshim të pushtetit ka vetëm në Mitrovicën e Jugut, Fushë-Kosovë e Obiliq. Në të tria komunat kanë fituar kandidatët e Lëvizjes Vetëvendosje.

Faton Peci fitoi në Mitrovicë, Valon Prebreza në Fushë-Kosovë e Halil Thaçi në Obiliq.

Ndërkohë, në Kaçanik vazhdon të jetë në pushtet Partia Demokratike e Kosovës. Por në vend të Besim Ilazit, kryetar do të jetë Sabedin Vishi.

Kurti: Të gjitha partitë ishin bashkë kundër VV-së

Kryetari i Lëvizjes Vetëvendosje, Albin Kurti, e ka cilësuar sukses për partinë e tij fitoren në 7 komuna në nivel vendi në zgjedhjet lokale. Sipas tij, fitorja në katër komuna në balotazh u arrit pavarësisht se “të gjithë të tjerët janë bashkuar kundër VV-së”.

“Është një situatë e paprecedentë në historinë politike elektorale të Kosovës andaj ky është një sukses i VV-së dhe i qytetarëve. Po i presim rezultatet ende në komunat e tjera. Me siguri që do t’iu drejtohemi sërish kur t’i marrim ato, mirëpo tash më duhet të shkojë me nxitim në tubimin festiv së pari në Fushë-Kosovë, pastaj në Kastriot e mandej në Mitrovicë”, ka thënë Kurti në një deklaratë për mediat.

Lëvizja Vetëvendosje pati fituar në raundin e parë në Podujevë, Shtime e Kamenicë. Ndërsa nga 12 komuna në të cilat garoi në balotazh, ka fituar në Mitrovicë të Jugut, Gjilan, Obiliq e Fushë-Kosovë.

Përfundon numërimi në Vushtrri, Idrizi edhe një mandat në krye

Ferit Idrizi i PDK-së do të drejtojë Vushtrrinë edhe për një mandat. Kur janë numëruar të gjitha votat, bazuar në rezultatet preeliminare Idrizi ka marrë 14 mijë e 427 vota, ndërsa Sylejman Meholli i Lëvizjes Vetëvendosje ka marrë 12 mijë e 158. 

PDK-ja, bazuar në rezultatet preeliminare, në balotazh ka fituar edhe në Prizren me Shqir Totajn e Kaçanik me Sabedin Vishin. 
Idrizi e ka shpallur fitoren. 

“Të dashur qytetarë të Vushtrrisë. Fitorja e sotshme, është e gjitha meritë e secilit prej jush që ka besuar fuqishëm nga dita e parë në vizionin tonë, duke na nderuar me mandatin tonë të dytë. Ka qenë një proces i jashtëzakonshëm e demokratik, andaj ju falënderoj nga zemra secilin prej jush për secilën votë, fjalë e mesazh. Do të vazhdoj të jem kryetari i të gjithë qytetarëve, pa dallim. E këtë mandat, projekte të mëdha na presin. Shihemi sonte nga ora 21:00 në sheshin “Adem Jashari”, ta festojmë bashkë këtë fitore tonën”, ka shkruar Idrizi në Facebook. 

 

Hartë e re e partive nëpër komuna

Ngjyra të reja ka marrë harta politike e udhëheqjes së komunave në Kosovë, pas raundit të dytë të zgjedhjeve lokale të mbajtur më 9 nëntor. Lëvizja Vetëvendosje dhe Lidhja Demokratike e Kosovës, pas numërimit të votave në vendvotime, kanë siguruar udhëheqjen e nga shtatë komunave.

Lëvizja Vetëvendosje pati fituar në raundin e parë në Podujevë, Shtime e Kamenicë. Ndërsa nga 12 komuna në të cilat garoi në balotazh, ka fituar në Mitrovicë të Jugut, Gjilan, Obiliq e Fushë-Kosovë.

Lidhja Demokratike e Kosovës në raundin e parë pati fituar në Istog e Lipjan, ndërsa në balotazh triumfoi në Prishtinë, Pejë, Dragash, Junik e Viti.

Partia Demokratike e Kosovës pos Skenderajt, Ferizajt e Hanit të Elezit në raundin e parë, më 9 nëntor fitoi edhe në Prizren, Kaçanik dhe Vushtrri.

Aleanca për Ardhmërinë e Kosovës do të udhëheqë në 5 komuna. Pas fitores në Deçan, në raund të dytë doli e para edhe në Gjakovë, Suharekë, Rahovec e Klinë.

Lista Serbe pati fituar 9 komuna në raundin e parë, ndërsa në të dytin pa kundërshtar fitoi në Kllokot dhe është subjekti me më së shumti komuna nën udhëheqje.

Ramiz Lladrovci veçse pati fituar në Drenas, sikurse edhe Nisma në Malishevë.

Në Mamushë në balotazh ka fituar KDTP-ja.

Vetëm në një nga 18 komunat u përmbys rezultati në balotazh

Vetëm në një nga 18 komunat u përmbys rezultati në balotazh në krahasim me rundin e parë. Bëhet fjalë për Obiliqin.

Në rund të parë, Xhafer Gashi i LDK-së ishte i pari me 5859 vota apo 46.20% krahasuar me Halil Thaçin e LVV-së që kishte 5626 vota apo 44.37%.

Por në balotazh, Thaçi mori 6353 vota apo 51.24%. E Gashi pati 6046 vota apo 48.76%.

AAK-ja shpall fitoren në 4 komuna

Aleanca për Ardhmëri të Kosovës ka shpallur fitore në 4 komuna. Në balotazhin e mbajtur të dielën, kandidatët e AAK-së kanë fituar në Gjakovë, Suharekë, Rahovec dhe Klinë.

Ardian Gjini ka fituar edhe një mandat në Gjakovë, i treti për të. Ai ka marrë mbi 56 për qind të votave, duke mposhtur kandidatin e Lëvizjes Vetëvendosje, Ardian Gola. 

“Kemi fituar me 58 për qind të votave, pa i llogarit ato me kusht dhe të diasporës që s’kanë mundësi me ndryshua rezultatin shumë”, tha Gjini.

Në Suharekë, Bali Muharremaj, ka marrë edhe një mandat, duke e mposhtur Ardian Shalën e LDK-së në balotazh. 

Në Rahovec, Smajl Latifi, do të udhëheqë edhe për një mandat. Ai mposhti në balotazh Ali Dulën e Vetëvendosjes. 

“JEMI FITUES! Qytetarë të dashur të Rahovecit, fitorja është e jona! Nesër nisim punët e projektet e mëdha, por sonte është festë për të gjithë qytetarët anekënd Rahovecit. Siç kam qenë përherë, edhe në këtë mandat  do të jem kryetar i të gjithë qytetarëve, me drejtësi, barazi, transparencë e llogaridhënie. Le të mblidhemi nga ora 08:30 në Rahovec, nga ora 09:00 në Krushë të Madhe, nga ora 09:30 në Xërxë, nga ora 10:00 në Fortesë e nga ora 10:30 në Ratkoc! Urime të gjithëve e faleminderit për kulturën e qytetarinë përgjatë këtij procesi demokratik zgjedhor!” – ka shkruar Latifi. 

E Zenun Elezaj do të jetë në krye të Klinës edhe për 4 vjet. Ai mposhti në balotazh Sokol Bashotën e PDK-së. 

“Fitore e madhe!  Fitore e të gjithë qytetarëve të Klinës!  Faleminderit secilit qytetar për besimin dhe mbështetjen! Kjo është fitore e përbashkët, fitore e punës, e besimit dhe e dashurisë për Klinën tonë. Urime!” – ka shkruar Elezaj në Facebook. 

Kryetari i Aleancës për Ardhmërinë e Kosovës, Ramush Haradinaj ka deklaruar se kanë rritur votat në nivel nacional dhe se kanë fituar në të gjitha komunat që ka qeverisur deri tani.

Ai para mediave ka përgëzuar kandidatët e komunave ku si parti kanë fituar zgjedhjet.

“Urime të gjithë qytetarëve të vendit, të gjithëve, për zgjedhjet e lira e të mira që kanë ndodhur sot. I falënderoj të gjitha institucionet e vendit për punën që kanë bërë. Po ashtu, i bashkohem festës në Suharekë ku po festojnë kolegët tonë. Qytetarët e Suharekës i përgëzoj për fitoren e tyre. Vërtet kryetari Bali Muharremaj është kryetari më i mirë. I bashkohem festës në Rahovec. Qytetarët e Rahovecit i janë bashkuar kryetarit të tyre, Smajl Latifit. I bashkohem po ashtu festës në Gjakovë. Ardian Gjini e ka arritur fitoren më bindëse të mundshme, ky është një lajm i mirë edhe për Gjakovën sepse vërtet ka bërë një punë të mirë. I bashkohem festës në Klinë, kryetari Zenun Elezaj ka fituar bindshëm. Deçani vazhdon me festu, edhe pse në rund të parë. AAK i ka fituar të gjitha komunat që ka qeverisur me to. Është një rezultat i mirë, jemi të gëzuar. Është një ndjenjë përgjegjësie, i lus kryetarët që të punojnë”, tha ai.

Sipas tij, është konfirmuar një besim i rritur për AAK-në në nivel nacional.

“Kemi marrë për parti 87 mijë e 500 vota, e kemi rritu numrin prezencën tonë, në disa komuna do të qeverisim, në disa tjera do të bashkë qeverisim”, tha ai.
 

Xhafer Gashi jep dorëheqje nga të gjitha funksionet në LDK

Kandidati i LDK-së për Obiliqin, Xhafer Gashi, ka dhënë dorëheqje nga të gjitha funksionet në këtë parti pas humbjes në zgjedhjet lokale.

“Falënderoj secilin prej juve edhe shumë të tjerë që s’janë prezentë këtu. Meqenëse jemi mundu me organizu, ndoshta nuk ia kemi dalë për arsye se dikun na kanë vjedhë atëherë unë si kryetar i degës së LDK-së në Obiliq e marr përgjegjësinë për humbjen dhe jap dorëheqje nga Këshilli i Përgjithshëm, nga kryesia e Lidhjes Demokratike dhe nga kryetar i nëndegës. Do të jem gjithmonë mbështetës i LDK-së”, ka thënë Gashi.

Gashi ishte kryetar i Obiliqit për 12 vjet.

Në balotazh u mposht nga Halil Thaçi i LVV-së.

PDK-ja e shpall fitoren në Prizren

Shaqir Totaj do të jetë në krye të Prizrenit edhe për 4 vjet. Kur janë procesuar 97.46 të vendvotimeve, bazuar në rezultatet preeliminare të KQZ-së, Totaj kryeson me 24 mijë e 711 vota, ndërsa Artan Abrashi i Vetëvendosjes i ka 21  mijë e 100 vota. 

Kryetari i PDK-së, Memli Krasniqi, në një paraqitje për media së bashku me Totajn ka shpallur fitoren në Prizren. 

Ai ka thënë se garanton që Prizreni do të vazhdojë transformimin. 
 

LDK-ja shpall fitoren në pesë komuna

Lidhja Demokratike e Kosovës ka shpallur fitoren në Komunën e Prishtinës, në balotazhin e së dielës. Lumir Abdixhiku, kryetar i kësaj partie, në një konferencë për media ka thënë se kjo ka qenë fitore e idesë dhe punës.

Abdixhiku ka thënë se pos Prishtinës, LDK-ja ka fituar edhe në Pejë, Viti, Dragash e Junik në balotazh, pos Lipjanit e Istogut që kishte fituar në raundin e parë.

Sipas tij, me shtatë komuna “LDK-ja është partia me numrin më të madh të komunave me të cilat do të qeverisë”.

E PërRama ka folur edhe për kundërkandidatin e tij, Hajrulla Çekun e Lëvizjes Vetëvendosje të cilit i ka kërkuar “reflektim”.

“E ftoj të reflektojë me frymë qytetarie. Prishtina ka nevojë për bashkëpunim jo bllokim. Qytetarët s’meritojnë pengesa, por punë të përbashkët. Për këtë qytetari ka folur dhe fjala e tij është vendim. Prishtina ecën përtej. Është qytet që nuk e pret të ardhmen por e ndërton atë”, ka thënë Rama.

Hyseni shpall fitoren në Gjilan

Alban Hyseni i Vetëvendosjes ka shpallur fitoren në Gjilan. Ai do ta drejtojë këtë komunë edhe për 4 vjet. 

Bazuar në rezultatet preeliminare të publikuara nga KQZ-ja, Hyseni ka fituar 61.06 për qind të votave, ndërsa Arbër Ismajli i LDK-së i ka 38.94 për qind. 

“Unë jam shumë i nderuar që përmes jush e shpalli fitoren në komunën e Gjilanit. Rezultati është i bindshëm dhe i thellë të fitores sonë, mbi 60 për qind”, tha Hyseni.

Alijaj: AAK-ja u bë argat i LDK-së në Prishtinë, e PDK-ja e bindi votuesin për Ramën

Njohësi i çështjeve politike, Artan Alijaj, ka vlerësuar se bashkëpunimet politike që janë parë në nivel qendror tashmë janë reflektuar edhe në zgjedhjet lokale, veçanërisht në Prishtinë.

Në edicionin special të KTV-së për balotazhin në 18 komunat, Alijaj ka thënë se në kryeqytet tashmë “është punë e kryer” që ekziston një koalicion i heshtur mes Lidhjes Demokratike të Kosovës, Partisë Demokratike të Kosovës dhe Aleancës për Ardhmërinë e Kosovës.

“Këto koalicione tashmë janë materializuar edhe në nivelin lokal, mendoj se edhe në Prishtinë veçmë është punë e kryer që kemi një koalicion mes LDK-së, PDK-së e AAK-së. Mendoj se qysh në rundin e parë AAK-ja ia ka dhënë argatin LDK-së, pasi që ishin votat e AAK-së që ia mundësuan pjesëmarrjen në balotazh z.Rama, ndërsa po shihet që ka arritur PDK-ja të bindë votuesin e vet që të votojë për z.Rama dhe si rezultat, duke iu falënderuar ndoshta votës së PDK-së, z.Rama do të jetë kryetar edhe për katër vjet”, ka thënë ai. 

Sipas tij, po të mos ekzistonte bllokada në nivel qendror, PDK-ja dhe kandidati i saj, Uran Ismaili, do të kishin mundësinë të konsideronin një marrëveshje të mundshme me Lëvizjen Vetëvendosje.

“Ky është rezultat i kësaj bllokade që e kemi në nivel qendror, po të mos ishte kjo bllokadë, PDK-ja dhe Uran Ismaili do ta konsideronin ndoshta një marrëveshje të mundshme me Lëvizjen Vetëvendosje”, ka thënë ai.
 

Pas 25 vjetëve Fushë-Kosova nuk është bastion i LDK-së

Pas 25 vjetëve Fushë-Kosova më nuk do të udhëhiqet nga Lidhja Demokratike e Kosovës. 
Valon Prebreza i Lëvizjes Vetëvendosje pritet të marrë drejtimin e Fushë-Kosovës. 

Kur janë procesuar 81.36 për qind të vendvotimeve, Prebreza kryeson me 8575 vota, ndërsa Besnik Osmani i LDK-së i ka 7031 vota. 

LDK-ja ka udhëhequr me Fushë-Kosovën që nga paslufta. 
 

Bali Muharremaj fiton edhe një mandat

Bali Muharremaj i AAK-së e ka fituar mandatin e tretë si kryetar i Suharekës.

Pas numërimit të të gjitha votave, Muharremaj ka marrë 11.640 vota apo 55.60%.

Ardian Shala i LDK-së ka marrë 9295 vota 44.40%.

Përmes një shkrimi në Facebook, Shala ia uroi fitoren Muharremajt. 

Garë shumë e ngushtë në Obiliq, Viti e Kaçanik

Foto: Ilustrim

Photo: Driton Paçarada

Gara në komunat e Obiliqit, Vitisë e Kaçanikut është shumë e ngushtë. 

Në Obiliq, pas procesimit të 69.70 për qind të vendvotimeve, Halil Thaçi i Lëvizjes Vetëvendosje kryeson me 4292 vota e Xhafer Gashi i LDK-së i ka 4187 vota.  

Në Kaçanik, Sabedin Vishi i PDK-së po kryeson me 6042 vota, ndërsa Jeton Raka i Vetëvendosjes i ka 5867 vota, ndërsa janë procesuar 81.82 për qind të vendvotimeve. 

Në Viti pas procesimit të 84.38 për qind të vendvotimeve, po kryeson Sokol Haliti i LDK-së me 6792 vota, ndërsa Arsim Ademi i Vetëvendosjes i ka 6405 vota.

Gjini drejt edhe një mandat në krye të Gjakovës

Ardian Gjini

Ardian Gjini i AAK-së do të jetë edhe një mandat në krye të Gjakovës. 

Bazuar në rezultatet preeliminare të publikuara nga KQZ-ja, kur janë procesuar 84.25 për qind të vendvotimeve, Gjini kryeson me 57.60 për qind të votave, ndërsa kundërkandidati i tij në balotazh Ardian Gola i Lëvizjes Vetëvendosje i ka 42.40 për qind. 

Për Gjinin do të jetë mandati i tretë në krye të Gjakovës. 

Totaj: Fitorja u takon qytetarëve të Prizrenit

Kryetari aktual i Prizrenit, Shaqir Totaj, ka thënë se fitorja u takon qytetarëve.

Totaj është zgjedhur edhe për një mandat në krye të Prizrenit.

“Prizreni është qytet me shumë vlera historike. Kjo fitore u takon qytetarëve të Prizrenit sepse kanë dit me votu, kanë dit me vlerësu”, ka thënë ai.

Totaj prin në Prizren

Shaqir Totaj i PDK-së pritet ta ruajë pozitën e kryetarit të Prizrenit.

Pas 110 nga 236 vendvotime të numëruara, Totaj ka 11.360 vota apo 58.84%.

Artan Abrashi i LVV-së ka 7948 vota apo 41.16%.  

Muhaxheri shpall fitoren

Gazmend Muhaxheri ka shpallur fitoren në Pejë. Ai është rrugës për mandatin e katërt.

Gjatë fjalimit të fitores, Muhaxheri ka thënë se gara ka qenë fer dhe i rekomandoi kundërkandidatit të tij të përgatitet më mirë herën tjetër.

Muhaxheri është bindshëm në epërsi ndaj Taulant Kelmendit të LVV-së.

Gazmend Muhaxheri i LDK-së është në rrugën e duhur për ta fituar edhe një mandat si kryetar i Pejës.

Sipas numërimit të 70 nga 140 vendvotime, Muhaxheri ka marrë 9450 vota apo 62.27% krahas 5725 votave apo 37.73% të Taulant Kelmendit të LVV-së.

Muhaxheri është kryetar i Pejës nga viti 2013. 

KQZ: Procesi zgjedhor i qetë, dalja më e ulët se në raundin e parë

Foto: Arkiv

Kryesuesi i Komisionit Qendror të Zgjedhjeve, Kreshnik Radoniqi, ka thënë se procesi i balotazhit të dielën, bazuar në raportimet nga vendvotimet, ka qenë i qetë dhe nuk është raportuar për raste që do të rrezikonin integritetin e zgjedhjeve. 

Kur janë procesuar të dhënat nga 99.69 për qind të vendvotimeve, numri i pjesëmarrjes në votime ishte 32.80 për qind, bazuar në të dhënat e KQZ-së. 

Në raundin e parë më 12 tetor, në 18 komunat që ishin në balotazh të dielën, dalja ishte 38.91 për qind. 
Radoniqi ka thënë se së shpejti do të dilet me rezultatet preeliminare, ndërsa ka thënë se ka nisur edhe afati 48-orësh ku palët e pakënaqur mund të dorëzojnë ankesat në Panelin Zgjedhor për Ankesa e Parashtresa. 

 

Publikohen rezultatet e para në Prishtinë

KQZ-ja ka publikuar rezultatet e para në Prishtinë.

Sipas numërimit të katër nga 268 të vendvotimeve, Përparim Rama i LDK-së ka marrë 228 vota karshi 203 të Hajrulla Çekut.  

Tahiri i PDK-së: Të ruhet çdo votë

Kandidati i Partisë Demokratike të Kosovës për kryetar të Mitrovicës, Arian Tahiri, ka bërë thirrje “për ruajtje të çdo vote” në balotazhin në të cilin ai u përball me Faton Pecin e Lëvizjes Vetëvendosje.

“Qytetarët e Mitrovicës e thanë fjalën e tyre. Tani është radha e komisionerëve dhe vëzhguesve që ta numërojnë çdo votë me kujdes e ndershmëri, duke respektuar vullnetin e votuesve mitrovicas. Le të tregojmë maturi, sepse besimi i qytetarëve është më i vlefshëm se çdo rezultat. Faleminderit, Mitrovicë! 🙏” ka shkruar ai në Facebook pas mbylljes së qendrave të votimit.

Mitrovica ishte një prej pak komunave në të cilën pati dalje më të madhe se në raundin e parë të zgjedhjeve.

KQZ-ja nis publikimin e rezultateve

Komisioni Qendror i Zgjedhjeve ka nisur publikimin e rezultateve për garën e balotazhit.

Rezultatet mund t’i shihni duke klikuar KËTU

DnV: Angazhimi i kryeministrit gjatë zgjedhjes lokale vuri në pikëpyetje neutralitetin institucional

Photo: Driton Paçarada

Demokracia në Veprim (DnV) ka vlerësuar se angazhimi i kryeministrit në detyrë, Albin Kurti, gjatë ditës duke shkuar në disa komuna, ka vënë në pikëpyetje neutralitetin institucional dhe krijon perceptim të ndërhyrjes në procesin zgjedhor.

DnV-ja ka thënë se qytetarët kanë votuar lirshëm, ndërsa procesi në qendra të votimit është menaxhuar në mënyrë përgjithësisht të rregullt. DnV ka thënë se ndryshim ka qenë kufiuzimi dhe zbatimi më i rreptë i procedurës së votimit me asistencë.

“Një ndryshim i rëndësishëm në këtë raund ka qenë kufizimi dhe zbatimi më i rreptë i procedurës për votimin me asistencë, i cili ka sjellë një ulje të dukshme të rasteve të tilla në krahasim me raundin e parë. Megjithatë, ndryshimi i mënyrës së zbatimit të këtij rregulli nga ana e KQZ-së¸në mes të dy raundeve, ka krijuar vështirësi për shumë qytetarë – sidomos ata të shtyrë në moshë ose me probleme në shkrim-lexim, të cilët janë kthyer pa mundur të votojnë për shkak të mungesës së dokumentacionit të kërkuar nga KQZ”, ka thënë DnV.

Po ashtu DnV-ja tha se angazhimi publik i kryeministrit në detyrë gjatë ditës së zgjedhjeve, në disa komuna, vë në pikëpyetje neutralitetin institucional. DnV-ja ka bërë thirrje që të ruhet qetësia.

“DnV thekson gjithashtu që angazhimi publik i Kryeministrit në detyrë gjatë ditës së zgjedhjeve, në disa komuna, e vë në pikëpyetje neutralitetin institucional dhe krijon perceptimin e ndërhyrjes në proces zgjedhor. Ky element, ndonëse nuk ka ndikuar drejtpërdrejt në mbarëvajtjen e procesit, bie ndesh me parimin e barazisë së garës dhe standardet e sjelljes gjatë ditës së zgjedhjeve. DnV thekson se përfundimi i suksesshëm i këtij raundi duhet të pasohet me transparencë dhe saktësi të plotë gjatë procesit të numërimit dhe publikimit të rezultateve. Po ashtu, kërkojmë nga subjektet politike që të presin publikimin e rezultateve preliminare nga KQZ-ja, para se të deklarojnë fitoret, në mënyrë që të ruhet qetësia”, thuhet në komunikatë pas balotazhit në 18 komuna.

Sot gjatë ditës, Kurti qëndroi në disa komuna. Në Mitrovicë madje një kafene u mbyll me arsyetimin për të shmangur tensionet e mundshme.

Tre të ndaluar për vepra penale kundër të drejtave të votimit

Prokurori i Shtetit ka njoftuar se deri në këto momente ka ndaluar tre persona për vepra penale që lidhen me procesin zgjedhor në raundin e dytë të zgjedhjeve për kryetarë komunash.

Sipas njoftimit, rreth 80 prokurorë dhe personel i sistemit prokurorial janë angazhuar gjatë gjithë ditës për të siguruar mbarëvajtjen e procesit zgjedhor dhe po vazhdojnë punën e tyre edhe gjatë numërimit të votave.

Pas verifikimit të informacioneve të pranuara gjatë ditës, është konstatuar se vetëm dy raste paraqesin elemente të veprave penale kundër të drejtave të votimit.

Rasti i parë është regjistruar në Fushë-Kosovë, ku dy persona janë ndaluar për 48 orë nën dyshimin për veprën penale “Dhënia ose marrja e ryshfetit në lidhje me votimin”.

Rasti i dytë është regjistruar në Klinë, ku një person është ndaluar për 48 orë nën dyshimin për “Cenim të fshehtësisë së votimit”.

Në balotazh votuan mbi 32.5 për qind e qytetarëve me të drejtë vote

Foto: Arkiv

Photo: Driton Paçarada

Mbi 32.5 për qind e qytetarëve me të drejtë vote në 18 komunat që ishin në balotazh, kanë shfrytëzuar të drejtën e tyre për votë të dielën. Pas procesimit të dhënave prej afro 99 për qind të vendvotimeve në nivel vendi, dalja rezulton se është 32.64 për qind.

Ndërkaq në raundin e parë në të gjitha komunat, dalja ishte rreth 40 për qind.

Festë e LDK-së në Prishtinë

Selia e Lidhjes Demokratike të Kosovës në Prishtinë është parë në festë menjëherë pas mbylljes së qendrave të votimit.

Kryetari aktual i kryeqytetit, Përparim Rama, e shpalli fitoren, duke i uruar aktivistët e partisë.

Përfundon periudha për votim

Foto: Arkiv

Në 18 komunat ku ka pasur balotazh në orën 19:00 ka përfunduar periudha e votimit.

Sipas KQZ-së, procesi ka kaluar kryesisht i qetë dhe pa incidente të mëdha, ndërsa gjatë ditës janë raportuar vetëm disa vonesa të vogla në hapjen e qendrave të votimit në disa zona e fotografim të fletëvotimeve.

Rezultatet e para preliminare pritet të publikohen nga Komisioni Qendror i Zgjedhjeve gjatë minutave në vazhdim.

Mbi 28% pjesëmarrje në zgjedhje deri në orën 17:00

Fiks 28.63 për qind është pjesëmarrja në zgjedhje e qytetarëve me të drejtë vote deri në orën 17:00 nga 100 për qind e vendvotimeve të procesuara, ka njoftuar Komisioni Qendror i Zgjedhjeve.

Duke u mbështetur në të dhënat e publikuara nga KQZ-ja, 376,971 persona kanë votuar deri në këtë orë nga 1 milionë e 316 mijë e 672 votues të regjistruar.

Krahasuar me periudhën e njëjtë të rundit të parë, pjesëmarrja sot është më e ulët. 

Deri në orën 17:00 më 12 tetor patën votuar 33 për qind e qytetarëve me të drejtë vote.

Krahasimi i votimit sot me të raundit të parë: 

AAK-ja ankohet në Junik: Po votojnë edhe ata që s’janë banorë të kësaj komune

Kryetari i Aleancës për Ardhmërinë e Kosovës, Ramush Haradinaj, ka thënë se në komunën e Junikut po votojnë edhe qytetarë që nuk janë banorë të kësaj komune.

Ai ka paralajmëruar edhe padi.

“Të dhënat tona nga shtabi në Junik, tregojnë se shumë persona po marrin pjesë në procesin e votimit në Junik pa qenë banorë të kësaj komune. Kujtojmë se një veprim i tillë përbën shkelje të ligjit dhe çdo rast i tillë do t’i përcillet institucioneve përkatëse, përfshirë Prokurorinë, për hetim dhe veprim, ku do të bëjmë padi për secilin person veç e veç. Ftojmë të gjithë qytetarët që të respektojnë rregullat dhe të kontribuojnë në një proces zgjedhor të drejtë, transparent dhe në përputhje me ligjin”, ka shkruar Haradinaj.

Edhe në raundin e parë AAK-ja ka pasur ankesë të tillë për votimin në këtë komunë. Në balotazh, Agron Kuçi i AAK-së është përballë Ruzhdi Shehut të LDK-së.

Në një linjë me AAK-në është edhe Jetmir Tofaj, i cili në rundin e parë ishte kandidat i Lëvizjes Vetëvendosje për zgjedhjet lokale në Junik.

Ai ka thënë të dielën se ka përpjekje për të deformuar vullnetin e lirë të qytetarëve të kësaj komune nga individë dhe grupe të caktuara, të cilët sipas tij, po angazhojnë persona që nuk kanë vendbanim në Junik, por megjithatë po paraqiten për të votuar atje.

“Ne kërkojmë publikisht nga Prokuroria e Shtetit dhe Policia e Kosovës që të ndërmarrin menjëherë masat ligjore për ndalimin e pjesëmarrjes në votim të personave që nuk janë banorë të Komunës së Junikut. I ftojmë qytetarët e Junikut që të ruajnë procesin, të jenë vigjilentë dhe të raportojnë menjëherë çdo përpjekje për manipulim ose presion. Vullneti demokratik duhet mbrojtur nga secili prej nesh”, ka shkruar ai në Facebook.

Ai ka shtuar se Juniku nuk lejon manipulim.

Fjalosen dy vëzhgues në Korishë të Prizrenit, intervistohen nga policia

Policia e Kosovës ka bërë të ditur se rreth orës 15:30 është raportuar për një sulm verbal në fshatin Korishë të Prizrenit, mes dy qytetarëve, që janë vëzhgues në balotazhin që po mbahet të dielën. 

Policia ka bërë të ditur se të dy janë ftuar në stacion policor për intervistim dhe është konstatuar se incidenti nuk ishte i ndërlidhur me procesin zgjedhor. 

“Rreth orës 15:30 është raportuar një sulm verbal që ka ndodhur në fshatin Korishë të komunës së Prizrenit, në mes të  dy qytetarëve vendas, të cilët janë njëkohësisht vëzhgues të zgjedhjeve. Pas marrjes së informatës, policia ka ndërmarrë veprimet e nevojshme dhe të dy personat janë ftuar në stacionin policor për intervistim. Nga deklarimet e dhëna nga palët e përfshira dhe në konsultim me prokurorin  është konstatuar se incidenti nuk ka qenë i ndërlidhur me procesin zgjedhor. Lidhur me rastin është njoftuar prokurori kujdestar, i cili do të vendosë për procedurat e mëtejshme në përputhje me kompetencat ligjore”, thuhet në njoftimin e Policisë. 
 

AAK: Po vërehet defilim i zyrtarëve me funksione shtetërore

Besnik Tahiri i Aleancës për Ardhmërinë e Kosovës ka deklaruar se në ditën e balotazhit është vërejtur defilim i zyrtarëve që kanë funksione shtetërore.

Në konferencën për media të mbajtur gjatë pasdites, Tahiri ka thënë se bazuar në të dhënat në terren, mbarëvajtja e procesit zgjedhor deri tani ka kaluar mirë pa ndonjë ekses të theksuar.

“Në orët e fundit kemi vërejtur një defilim të zyrtarëve që kanë funksione shtetërore e të cilët kanë kaluar qytete të ndryshme dhe që me një formë apo tjetër kanë ndikim”, ka thënë ai. 

Ai ka shtuar se pjesëmarrja në votime deri tani është më e ulët krahasuar me rundin e parë, por ka bërë thirrje që qytetarët të ushtrojnë të drejtën e tyre demokratike. 

“Sot Kosova do të ketë një verdikt demokratik, le të jetë ai më i vërteti, i lirë dhe demokratik,” ka thënë Tahiri.

Çitaku: Pushtetarët të kenë kujdes se si e shfaqin simpatinë për kandidatët e tyre

Sekretarja e përgjithshme e PDK-së, Vlora Çitaku, e pyetur për vizitën e kryeministrit në detyrë Albin Kurti në Mitrovicë dhe atmosferën e tensionuar pasi në atë lagje u kundërshtua vizita e tij nga disa qytetarë, deklaroi se personat e veshur me pushtet do të duhej të ishin të vëmendshëm se si angazhohen në mbështetjen e kandidatit të tyre.

Pamje jo të këndshme e quajti edhe reagimin e ministrit të Brendshëm në detyrë Xhelal Sveçla ndaj një aktivisti të LDK-së në Prishtinë.

“Secili është e natyrshme të angazhohet për fitore aty ku garon. Është shumë e rëndësishme mënyra se si angazhohet. Është shumë e rëndësishme të mos ketë intimidim, të mos ketë frikësim, të mos ketë abuzim të pushtetit. Nejrëzit që janë të veshur me fuqi politike, institucionale duhet të jenë shumë të vëmendshëm si e manifestrojnë atë pushtet që e kanë. Kemi parë disa pamje jo të këndshme edhe në Prishtinë, përveç se janë të vrazhda, përveç se nuk i shërbejnë demokracisë do të duhej të ishin të dënueshme nga secili. Qytetarët duhet të lihen të lirë që të vendosin vet për kë duan të votojnë”, deklaroi Çitaku në konferencën për media.

Tutje ajo tha se procesi zgjedhor deri më tani në përgjithësi ka shkuar mirë përveç disa ankesave në disa komuna ku janë penguar të votojnë personat me aftësi të kufizuar. Gjithashtu sipas Çitakut, interesimi i qytetarëve për të votuar po rritet nga ora në orë.

Rritje të interesimit të qytetarëve deri më tani është parë vetëm në Mitrovicë të Jugut, Mamushë e Junik. Te komunat e tjera në përgjithësi ka rënie.
 

KQZ: Votimi me asistencë lejohet vetëm për personat që e dëshmojnë aftësinë e kufizuar

Lidhur me ankesat për votimin me asistencë, kryesuesi i Komisionit Qendror të Zgjedhjeve, Kreshnik Radoniqi ka thënë se votimi me asistencë për personat me aftësi të kufizuara, ata që nuk mund ta mbushin dhe nuk mund ta hedhin fletëvotimin, është i garantuar me Ligjin për Zgjedhjet dhe me rregulloret e KQZ-së. 

Ai ka shtuar se për të mos abuzuar me votimin duke i asistuar këta persona, është vendosur që aftësia e kufizuar e votuesit duhet të dëshmohet përmes dokumentit përkatës.

“Kjo nuk nënkupton që në emër të kësaj të drejte të garantuar, të abuzohet dhe në këtë kategori të tentojnë të hyjnë personat që nuk kanë aftësi të kufizuar. Sipas rregullores zgjedhore të KQZ-së, me qëllim të mënjanimit të çfarëdo keqpërdorimi është vendosur që aftësia e kufizuar e votuesit duhet të dëshmohet përmes dokumentit përkatës. Andaj, u bëjmë thirrje këshillave të vendvotimit që të vlerësojnë drejtë dhe sipas legjislacionit në fuqi personat që paraqiten për të votuar me asistencë, e për të cilën çështje janë trajnuar”, ka thënë Radoniqi në konferencën e mbajtur në orën 15:30.

Sipas të dhënave, Radoniqi ka thënë se procesi i votimit deri në këtë kohë është zhvilluar në një atmosferë të qetë dhe pa pengesa

21.75% pjesëmarrje në votime deri në orën 15:00

Deri në orën 15:00 pjesëmarrja në votime në balotazh, pas procesimit të gjitha vendvotimeve, është 21.75 për qind. 

Kanë votuar 286 mijë e 318 votues. 

Në 18 komunat që janë në balotazh, në raundin e parë të zgjedhjeve më 12 tetor pjesëmarrja deri në orën 15:00 kishte qenë 25.33 për qind. 

"Deri në të njëjtën kohë, në raundin e parë, në këto 18 komuna, kishin votuar 25.33% apo 333 mijë e 489 votues nga 1 milion e 316 mijë e 129 votues. Të dhënat e detajuara për pjesëmarrjen e votuesve në çdo komunë dhe në çdo qendër votimi i gjeni në platformën e KQZ-së, të cilës mund t’i referoheni”, ka thënë kryesuesi i Komisionit Qendror të Zgjedhjeve, Kreshnik Radoniqi në konferencën për media të mbajtur në orën 15:30. 

Sipas të dhënave, Radoniqi ka thënë se procesi i votimit deri në këtë kohë është zhvilluar në një atmosferë të qetë dhe pa pengesa.
 

Forca të shtuara të policisë në Mitrovicë gjatë vizitës së Kurtit, pronari mbyll kafenenë për t'i shmangur tensionet

Në ditën e balotazhit, një situatë jo e qartë është raportuar në lagjen Tavnik të Mitrovicës, pranë Universitetit të qytetit, ku sipas informacioneve të gazetares sonë në terren, Valbona Bytyqi, është paralajmëruar një takim i kryeministrit në detyrë, Albin Kurti. 

Në vendin e ngjarjes janë parë forca të shtuara të Policisë së Kosovës, përfshirë edhe njësinë për mbrojtjen e afërt të kryeministrit. 

Atmosfera është bërë e tensionuar pasi, përveç përkrahësve të Kurtit, në lokalin ku pritej të mbahej takimi është paraqitur edhe një grup qytetarësh që kanë kundërshtuar vizitën e tij.

“Është pothuajse e paqartë se çfarë është epilogu i ngjarjes së cilën aktualisht jam duke e përcjell. Çfarë dimë deri më tani është se ka pasur një paralajmërim që në njërën prej kafeneve të lagjes në Tavnik do të vijë kryeministri në detyrë, Albin Kurti dhe kësisoj ka pasur forca të shtuara të Policisë së Kosovës përfshirë edhe mbrojtjen e afërt të kryeministrit në detyrë. Në kafenenë ku është planifikuar të mbahet një tubim i kryeministrit në detyrë, Albin Kurti, me shumë gjasë me simpatizantët e partisë që ai drejton, ka pasur edhe një grup tjetër që e ka kundërshtuar vizitën, takimin e Kurtit”, ka thënë ajo në një lidhje direkte për edicionin special të KTV-së në ditën e zgjedhjeve. 

Disa dhjetëra persona janë larguar nga kafeneja brenda pak minutash, ndërsa aktualisht lokali është mbyllur dhe dritat janë fikur. Në zonë nuk shihen më qytetarë apo klientë, ndërsa ende nuk dihet nëse takimi i paralajmëruar do të mbahet.

Ai ka thënë se për të mos eskaluar situata midis dy grupeve, simpatizantë të partive në garë, e ka mbyllur kafenenë.

“Asnjë palë nuk ka kërkuar që të lirohet hapësira, por për të mos eskaluar situata dhe të bëhet diçka më e madhe... unë e kam marrë vesh prej punëtorëve të mi, më kanë kontaktuar dhe më kanë njoftuar se pi vjen Albin Kurti. Kryeministri nuk ka qenë asnjëherë më parë në kafene”, ka thënë ai.

E Kurti pas mbylljes së kësaj kafeneje ka shkuar në vizitë në një kafene tjetër. Ai nuk është përgjigjur për gazetar. 

Ngjarja po ndodh në kohën kur qytetarët e 18 komunave të Kosovës po votojnë në raundin e dytë të zgjedhjeve lokale.

Ndalohet një person në Klinë për fotografim të votës

Foto: Ilustrim

Një person është kapur në qendrën e votimit “Fehmi Agani” në Klinë duke e fotografuar votën. 

Menaxheri i qendrës Sami Bardheci ka thënë për KTV-në se për rastin është njoftuar policia dhe tash po merret prokuroria. 

“Personi që e ka fotografuar votën e ka dhënë edhe një emër, që sipas tij, i ka thënë me fotografu votën. Me këtë rast po merret prokuroria”, tha Bardheci.

Ai ka thënë se krahasim me raundin e parë të zgjedhjeve lokale më 12 tetor, në këtë qendër kësaj radhe ka më pak votues. 
 

Pula: Disa raste nën hetim, përfshirë ryshfet dhe fotografim të votës

Koordinatorja nacionale për zgjedhje, prokurorja Laura Pula, në emisionin special që i kushtohet ditës së zgjedhjeve në KTV, ka njoftuar se janë evidentuar disa raste që po trajtohen nga organet e rendit dhe të drejtësisë.

Pula ka thënë se deri tani janë ndërmarrë veprime ndaj disa personave të dyshuar për shkelje të ndryshme gjatë procesit zgjedhor, përfshirë raste që lidhen me marrje dhe dhënie ryshfeti, si dhe me fotografim të votës.

“Është rasti në Fushë-Kosovë, ku dy persona janë të ndaluar lidhur me veprën penale të marrjes dhe dhënies së ryshfetit dhe ndaj tyre tani do të vazhdojë procedura e mëtutjeshme, ndaj njërit është sekuestruar telefoni me të cilin është kryer vepra penale. Përpos këtij rasti, të ndaluar persona deri më tani nuk kemi, kemi incidente të ndryshme apo informacione të cilat me të marrë ato kemi reaguar në secilin vend. Kemi edhe sot raste të fotografimit të votës. Përveç rastit në Fushë-Kosovë, ka pasur edhe një rast që mu tani ka ndodhur në njërën prej komunave, ku është ndaluar një person, por është ndaluar për intervistim e jo ndalim me vendim të prokurorit”, ka deklaruar ajo.

Pula theksoi gjithashtu se çështja e asistencës për personat me aftësi të kufizuara ose me pengesa të tjera gjatë votimit është kompetencë e Komisionit Qendror të Zgjedhjeve dhe se për këto raste nuk ka ndonjë hetim penal të hapur.

“Çështja e asistencës së personave qoftë me aftësi të kufizuara apo me pengesa të tjera, të cilët duhet të votojnë me prezencë të asistencës është çështje e rregulluar me KQZ dhe për këto është përgjegjëse KQZ-ja, e cila e ka bërë publike sa e di unë dhe informacionet e duhura i kanë dhënë me kohë. Nuk ka raste penale të hapura për to”, ka theksuar ajo. 

Balotazhi po zhvillohet në 18 komuna të vendit dhe, sipas autoriteteve, procesi po vazhdon përgjithësisht qetë dhe pa incidente serioze.

Votimi deri në orën 13 krahasuar me rundin e parë zgjedhor – në cilat komuna ra e ku u shtua interesimi

Foto: Ilustrim

Votimi deri në orën 13 krahasuar me rundin e parë zgjedhor – në cilat komuna ka rënë interesimi

18 komuna, të dielën e 9 nëntorit po i nënshtrohen balotazhit në kuadër të zgjedhjeve lokale të 12 tetorit. Por megjithatë, në ciklin e dytë të zgjedhjeve duket se ka rënie të interesimit të qytetarëve për të votuar. Dalja më e ulët është regjistruar në Prizren.

Në përqindje të lehtë, rritje e interesimit të qytetarëve për të votuar është shënuar në Mitrovicë të Jugut, Mamushë, Junik e Obiliq.

Rritja më e madhe e përqindjes së qytetarëve si pjesëmarrës në votime është regjistruar në Mamushë. Atje deri në orën 13:00 kanë votuar 40% e qytetarëve, ndërsa deri në orën e njëjtë në rundin e parë, votuan 35.89% e qytetarëve. Poashtu, Mamusha është komuna me pjesëmarrjen më të lartë edhe nga komunat e tjera në nivel vendi.

Edhe në Mitrovicën e Jugut, ka rritje të interesimit të qytetarëve për të votuar. Në rundin e parë dalja e qytetarëve deri në orën 13:00, ishte 16.98%, ndërsa në balotazh kjo shifër ka rritje për 1% apo 17.80% e totalit të qytetarëve.

Rritje të interesimit të qytetarëve për të votuar është regjistruar edhe në Junik. Në rundin e parë, deri në orën 13:00, votuan 27.26% e qytetarëve, ndërsa në ditën kur po mbahet balotazhi, deri në të njëjtën orë kanë votuar 28.39% e qytetarëve atje.

Ndërkohë në Prishtinë, në rundin e parë, deri në orën 13:00 dalja e qytetarëve ishte 19.20% por në balotazh kjo përqindje ka rënë në 17.57%.

Në Gjakovë, më 12 tetor deri në orën 13:00 votuan 14.12%, por kjo shifër sipas KQZ-së në balotazh është 10.65%.

Rënie e daljes në votime është regjistruar edhe në Gjilan. Në rundin e parë votuan 16.39% e qytetarëve, ndërsa në balotazh sipas KQZ-së, kanë votuar 13.69%.

Një rënie prej 2% është regjistruar edhe në Komunën e Fushë-Kosovës. Në rundin e parë deri në orën 13:00, votuan 18.34% e qytetarëve, ndërsa në balotazhin e 9 nëntorit, 16.92 e qytetarëve.

Rënie të interesimit të qytetarëve për të votuar deri në orën 13:00 është regjistruar edhe në Pejë. Nga 15% sa ishte në rundin e parë, tashmë në rundin e dytë dalja ka rënë në 11.24%.

Por, dalja më e ulët është regjistruar në Prizren. Vetëm 9% është dalja e qytetarëve deri në orën 13:00 nga rreth 12% sa ishte në rundin e parë të zgjedhjeve lokale.

Rënie prej 4% të daljes së qytetarëve është regjistruar edhe në Suharekë. Në balotazh deri në orën 13:00, kanë votuar 11.84% e qytetarëve, ndërsa në rundin e parë, votuan 15.37% e qytetarëve.

Dalje më e vogël në balotazh është regjistruar edhe në Vushtrri. Deri në orën 13:00 kanë votuar 14.27% e qytetarëve, ndërsa në rundin e parë krahasuar me të njëjtën orë sipas KQZ-së, kishin votuar 16.98% e qytetarëve.

Dalje shumë më e vogël në përqindje, krahasuar me rundin e parë është shënuar edhe në Kllokot. Atje, në balotazh dhe deri në orën 13:00 kanë votuar vetëm 16% e qytetarëve, ndërsa në rundin e parë, dalja ishte deri në gati 30%.

13,33% e qytetarëve votuan deri në orën 13:30

Photo: Driton Paçarada

Mbi 175 mijë e 400 qytetarë e kanë shfrytëzuar të drejtën e votës deri në orën 13:30 në raundin e dytë të zgjedhjeve që po mbahet në 18 komuna.

Pjesëmarrja në përqindje deri në këtë orë është 13,33.

Siç është njoftuar nga kryetari i Komisionit Qendror të Zgjedhjeve, Kreshnik Radoniqi, procesi i votimit nëpër komuna po zhvillohet normalisht. 

Sveçla e akuzon aktivistin e LDK-së për shkelje të heshtjes zgjedhore, partia i përgjigjet

Photo: Driton Paçarada

Ministri në detyrë i Punëve të Brendshme, Xhelal Sveçla është përplasur me një aktivist të Lidhjes Demokratike të Kosovës. Sveçla e ka fotografuar aktivistin me pretendimin se ai kishte të vendosur një simbol të LDK-së, e që sipas Sveçles kjo nuk është e lejuar për shkak të heshtjes zgjedhore. Ky i fundit, e ka paralajmëruar se do ta dërgojë në gjykatë, pasi sipas tij, nuk guxon ta fotografojë. 

Lidhja Demokratike e Kosovës, e ka dënuar këtë sjellje të ministrit Sveçla. Një reagim i tillë, LDK-ja thotë se është shenjë e panikut.

“Një reagim i tillë, i shoqëruar me tone agresive dhe sjellje denigruese, është shenjë e qartë e panikut dhe humbjes së kontrollit politik të atyre që për vite kanë keqpërdorur institucionet e shtetit, e sot ndjehen të zhveshur nga mbështetja qytetare. Përballë qytetarëve dhe simboleve tona, z. Sveçla ka zgjedhur arrogancën në vend të maturisë, kërcënimin në vend të kulturës demokratike”, thuhet ndër të tjerash në reagim.

Poashtu LDK-ja i ka bërë “thirrje institucioneve përgjegjëse që të sigurojnë një mjedis të qetë, të sigurt dhe dinjitoz për të gjithë qytetarët gjatë këtij procesi zgjedhor”.

Ndërkohë, Albert Krasniqi nga D+, thotë se nuk është me fuqi kufizimi deri në 25 metra nga ndonjë qendër e votimit dhe se sipas rregullave Zgjedhore të KQZ-së, hapësira e Qendrave të Votimit është vetmja ku ndalohet shfaqja e materialeve zgjedhore.

“Sipas rregullave zgjedhore të KQZ-së, hapësira e Qendrave të Votimit ku ndalohet të shfaqen materiale të fushatës zgjedhore përfshin vetëm hapësirën e brendshme të qendrës deri në rrethojat e saj. Në ligjin e mëparshëm për zgjedhje, kufizimi ishte deri në 25 metra nga dera e hyrjes së ndërtesës, por ajo dispozitë tashmë nuk është më në fuqi. Pra, edhe nëse do të kishte ndonjë shkelje, raportimi duhet të bëhet në institucionet përkatëse - jo të merret vet në dorë zbatimi i ligjit”, thuhet në reagimin e Krasniqit.

Sipas Krasniqit, “në një demokraci funksionale, ministrat duhet të jenë shembull i ndarjes së qartë mes shtetit dhe partisë - jo ta zbehin atë kufi”.

Hajdini-Beqiri: Personat me aftësi të kufizuar nuk po lejohen të votojnë

Drejtoresha ekzekutive e organizatës “Down Sindrome Kosova”, Sebahate Hajdini-Beqiri, ka thënë se personave me aftësi të kufizuara nuk po u lejohet të votojnë.

Ajo në një postim në Facebook, ka thënë se Gencit, i cili është me sindromin down, i është mohuar e drejta e votimit.

“Sot, Genci ju mohua e drejta e votimit, megjithëse Genci ka votuar në zgjedhjet nacionale të 9 shkurtit 2024 dhe në zgjedhjet lokale të 12 tetorit 2025.  Sipas Kushtetutës dhe ligjeve të tjera në fuqi, Genci ka të drejtën dhe mundësinë për të votuar, sepse ai ka zotësi veprimi.

Ajo ka shkruar se sot, në ora 11:40 në qendrën e votimit në Ulpianë, në shkollën "Hasan Prishtina," ku Genci ka votuar në tetor, udhëzuesi zyrtar për votuesit me asistencë, i hartuar në nëntor 2025, ia ndaloi atij këtë të drejtë.

“‘Profesionist’ të KQZ-së, a jeni të vetëdijshëm që asnjë dokument zyrtar nuk mund të hartohet në kundërshtim me Kushtetutën dhe ligjet që janë në fuqi… Genci, më fal që u zhgënjeve sot. Kjo është Kosova jonë, ku dikush mund të bëjë një dokument dhe, brenda një dite, të mohojë një të drejtë të tillë”, ka shkruar ajo.

Osmani: Qytetarët sot vendosin për një të ardhme më të mirë

Presidentja e vendit, Vjosa Osmani, ka ftuar të gjithë qytetarët që ta shfrytëzojnë të drejtën e tyre për votë. Osmani tutje theksoi se qytetarët sot vendosin për një të ardhme më të mirë për të gjithë.

Sipas saj, edhe kjo ditë është po aq e rëndësishme sa rundi i parë i zgjedhjeve sepse vendoset përfundimisht se kush do të qeverisë.

“Është ditë po aq e rëndësishme sa rundi i parë i zgjedhjeve. Sot përfundimisht vendosin jo vetëm se kush do të qeverisë, por vendosin edhe për një të ardhme më të mirë për fëmijët tanë. Rrjedhimisht shpresoj që secili prej qytetarëve me të drejtë vote do ta shfrytëzojë këtë të drejtë dhe të dalë të votojë. Kosova ka demokracinë më të fortë elektorale në rajon dhe kjo është pikërisht për shkak të pjesëmarrjes së qytetarëve tanë në votime dhe se organizojmë zgjedhje të lira e demokratike”, deklaroi presidentja Vjosa Osmani para mediave pasi votoi.

E pyetur për ndonjë ndikim të mundshëm të rezultatit të zgjedhjeve lokale në ato nacionale, Osmani tha se “Këto janë procese të ndara, zgjedhjet komunale nuk kanë ndikim në proceset në nivel nacional në të cilin po kalojmë”.

Ndalohen dy persona në Fushë-Kosovë për ryshfet lidhur me votimin

Dy persona janë ndaluar në Fushë-Kosovë për dhënie dhe marrje të ryshfetit që lidhen me votim.

Sipas njoftimit për media, gjatë hetimit është sekuestruar një telefon.

“Prokuroria Themelore në Prishtinë, njofton opinionin publik se, në komunën e Fushë Kosovës, me vendim të Prokurorit të shtetit, janë ndaluar dy persona, për shkak të dyshimit të veprës penale ‘’Dhënia dhe marrja e ryshfetit në lidhje me votimin’’ nga neni 212 të Kodit Penal të Republikës së Kosovës. Gjatë zhvillimit të hetimeve, është sekuestruar një telefon, i cili do të shërbejë si provë në procedurën e mëtejme hetimore. Prokuroria Themelore në Prishtinë do të ndërmarrë të gjitha masat dhe veprimet e nevojshme konform dispozitave ligjore për ndriçimin e plotë të rastit”, thuhet në njoftim.

Deri në orën 11 votuan mbi 80 mijë votues

Kryetari i Komisionit KQZ-së, Kreshnik Radoniqi, ka thënë se deri në orën 11 kanë votuar 80 mijë 659 votues apo 6.13 për qind.

Ai ka thënë se bazuar në  informacionet nga komunat, procesi i votimit po zhvillohet normalisht.

“Nga të dhënat preliminare nga 95 për qind e vendvotimeve numri i qytetarëve me të drejtë vote deri në orën 11 është 80 mijë 659 votues apo 6.13 për qind e votuesve. Deri në të njëjtën kohë në raundin e parë kishin votuar 7.58 për qind apo 99.765 votues”, ka thënë ai.

KKZ-ja po e trajton rastin e drejtorit të shkollës në Lummadh të Vushtrrisë, dyshohet për trysni ndaj votuesve

Komisioni Komunal i Zgjedhjeve në Vushtrri ka konfirmuar se janë duke e trajtuar rastin e drejtorit të shkollës së fshatit Lummadh i cili është akuzuar për trysni ndaj votuesve.

Ai është akuzuar nga Lëvizja Vetëvendosje se është duke u bërë presion votuesve për ta votuar Partinë Demokratike të Kosovës.

Policia nuk ka dhënë informacione për rastin, ndërkaq zyrtari përgjegjës i KKZ-së, në këtë komunë, Betim Xhema, ka thënë se janë duke u marrë me rastin dhe ai është duke u trajtuar. Gazetarja Valbona Bytyqi ka raportuar se brenda shkollës ka edhe zyrtarë policorë.

Shala vet ka thënë për KTV-në se është gjithçka e trilluar. Sipas tij, akuzat e tilla janë vazhdimësi e akuzave të Vetëvendosjes kundrejt tij.

Ekipi i KTV-së ka raportuar se edhe në këtë shkollë kanë hasur vështirësi në xhirim brenda vendvotimit.

Krasniqi fton qytetarët të dalin të votojnë

Kryetari i PDK-së, Memli Krasniqi ka ftuar të gjithë qytetarët të dalin dhe të shfrytëzojnë të drejtën për votë.

Krasniqi u shpreh i bindur se sikurse edhe në rundin e parë, procesi do të shkojë me rregull.

“Sot në të gjitha komunat ku ka balotazh për kryetar të komunave, unë i ftoj qytetarët që të dalin dhe të marrin pjesë pavarësisht zgjedhjes së parë që kanë bërë. Secili prej tyre mund ta luajë një rol të rëndësishëm për t’i dhënë drejtim komunave ku jetojnë në katër vitet e ardhshme. Me shpresën që do të kemi një dalje masive dhe substanciale që vërtetë do të reflektojë vullnetin e qytetarëve. Uroj që edhe ky proces të shkojë me rregull sikurse rundi i parë. Ditë e mirë për Kosovën, për komunat dhe besoj që përfundimisht do të kemi një përmbyllje të një procesi që i jep drejtim katër viteve të ardhshme”, ka deklaruar Krasniqi për mediat pasi votoi.

Abdixhiku: Nga nesër merremi me zgjedhjet nacionale, priten në fund të dhjetorit

Photo: Driton Paçarada

Kryetari i LDK-së, Lumir Abdixhiku, ka deklaruar se nga nesër fokusi do të jetë te zgjedhjet nacionale. Abdixhiku poashtu tha se pritjet janë që në fund të dhjetorit të ketë sërish zgjedhje.

“Menjëherë nga dita e nesërme do të kthejmë fokusin te zgjedhjet nacionale. Pritjet tashmë janë se në fund të dhjetorit do të kemi festën e ardhshme zgjedhore dhe vendimmarrjen demokratike në Republikën e Kosovës”, deklaroi Abdixhiku në një deklarim për media pasi votoi.

Tutje ai poashtu u shpreh i bindur se procesi i sotëm zgjedhor i balotazhit, do të shkojë mirë e mbarë.

“Ditë e mirë, mëngjes i mirë. Shpresojmë të jetë një proces i mbarë e i mirë siç ka ditur gjithmonë qytetari të sillet në procese zgjedhore. Jam i lumtur për nivelin demokratik që gjithherë e tregojmë në procese zgjedhore. Më besoni se në standardet e Ballkanit Perëndimor besa edhe e në Evropë, mënyra si i organizojmë zgjedhjet, si i pranojmë rezultatet, e si e trajtojmë procesin zgjedhor është një mrekulli demokratike për të cilën të gjithë qytetarët e Kosovës duhet të jenë krenarë”, deklaroi Abdixhiku.

Shtatë ekipe mobile për votim në Prishtinë

Fatmire Bajrami kryesuese e KKZ-së ka thënë se Komisioni Komunal në Prishtinë i ka shtatë ekipe të cilat do t’u ofrojnë votuesve të Prishtinës mundësinë për të votuar nga qendrat rezidente.

Ajo ka thënë se në QKUK janë dy ekipe, në shtëpinë e të moshuarve është një ekip, një është në qendrën e paraburgimit dhe të tjerat janë nëpër shtëpia te personat që kanë aplikuar.

“Në rundin e dytë është gjithçka gati. Ekipet nuk janë nisë herët në mëngjes për të mos i bezdisur votuesit”, ka thënë ajo.

2.541 persona do të votojnë përmes ekipeve mobile në mbarë Kosovën.

Nën 2% pjesëmarrja e votuesve në balotazh deri ora 9

Photo: Driton Paçarada

Komisioni Qendror i Zgjedhjeve ka publikuar të dhënat e para nga numri i qytetarëve që kanë marrë pjesë deri në ora 09:00 në procesin e votimit.

Dy orë pas hapjes së qendrave të votimit në 18 komunat ku po organizohet balotazhi në Kosovë, numri i qytetarëve që kanë marrë pjesë deri tani në votim është 26 mijë e 86.

Ky numër (26 mijë e 86) i votuesve paraqet 1.98% të numrit të përgjithshëm të qytetarëve që kanë dalë për të votuar deri tani.

Nga 18 komunat ku organizohet balotazhi të drejtë vote kanë 1 milion e 316 mijë e 672 qytetarë.

Në kryeqytet deri tani kanë votuar 5 mijë e 998 qytetarë nga 222 mijë e 418 me të drejtë vote apo 2.70%.

KQZ: Procesi i votimit ka nisur në të gjitha qendrat e votimit

Foto: Ilustrim

Komisioni Qendror i Zgjedhje, ka njoftuar se që në orët e para të mëngjesit është shpërndarë me kohë materiali zgjedhor, përfshirë edhe fletëvotimet, në të gjitha Qendrat e Votimit.

Gjatë një konferencë, zëdhënësi i KQZ-së, Valmir Elezi tregoi edhe se procesi zgjedhor po zhvillohet në 525 Qendra të Votimit dhe me gjithsej 1.648 vendvotime.

“Gjatë ditës së sotme, procesi zgjedhor do të zhvillohet në 525 Qendra të Votimit, me gjithsej 1,648 vendvotime, prej të cilave 507 qendra me 1,628 vendvotime për votimin e rregullt dhe 18 qendra, nga një për çdo komunë ku mbahet rrethi i dytë i zgjedhjeve, me 20 vendvotime, për të mundësuar votimin me kusht. Raundi i dytë i zgjedhjeve për Kryetarë të Komunave mbahet në këto 18 komuna: Gjakovë, Gjilan, Dragash, Kaçanik, Klinë, Fushë Kosovë, Mitrovicë e Jugut, Obiliq, Rahovec, Pejë, Prishtinë, Prizren, Suharekë, Viti, Vushtrri, Junik, Mamushë dhe Kllokot”, deklaroi Elezi.

Sipas Listës së Votuesve, numri i qytetarëve me të drejtë vote për të votuar sot në Republikën e Kosovës është 1,316,672 të cilët janë të shpërndarë në 18 komuna.

Përveç organizimit të votimit në vendvotime të rregullta, KQZ do të organizojë votimin edhe përmes ekipeve mobile/lëvizëse për 2,541 votuesit me nevoja të veçanta, të cilët janë regjistruar dhe evidentuar paraprakisht.

Kurti: Zgjedhjet komunale janë të rëndësishme për dinjitetin dhe cilësinë e jetës së qytetarëve

Photo: Driton Paçarada

Kryeministri në detyrë Albin Kurti, iu ka bërë thirrje të gjithë qytetarëve që të shfrytëzojnë të drejtën e tyre për votë. I pyetur për qëndrimin e tij të vazhdueshëm në Mitrovicë, Kurti tha se gjatë kësaj fushate ka punuar me tri ndërrime dhe se është përpjekur të vëzhgojë përgatitjet për zgjedhje.

“Gjatë kësaj fushate unë kam punuar në tri ndërrime anë e mbanë Komunave të Kosovës. Jam përpjekur të vëzhgoj të gjitha përgatitjet për zgjedhje. Zgjedhjet komunale janë jo më pak të rëndësishme sesa ato parlamentare e qendrore. Tejet e rëndësishme për mirëqenien e dinjitetin, dhe cilësinë e jetesës së qytetarëve. Fletëvotimi ishte i thjeshtë i kishte vetëm dy emra. Njëri prej tyre medeomos do të fitojë në mbrëmje”, deklaroi Kurti para mediave.

Tutje ai tha se zgjedhjet sot po mbahen në më pak se gjysma e komunave në numër.

“Ditë e mirë për demokracinë dhe lirinë. Posa votova këtu në Prishtinë në ndërtesën e Fakultetit Juridik. Iu bëj thirrje të gjithë qytetarëve me të drejtë vote të bëhen pjesëmarrës për zgjedhjen e kryetarëve. Gjithçka do të shkoj mbarë e mirë. KQZ-ja ka bërë të gjitha përgatitjet. Komisionerët e vëzhguesit tashmë ndodhen në qendrat e votimit. 18 komunat ku mbahen zgjedhjet sot në balotazh janë më pak se gjysma e komunave të Kosovës por nëse e shikoni se për cilat komuna bëhet fjalë është e qartë se janë mbase mbi 80 për qind e popullsisë së Republikës", deklaroi Kurti.

Rreth 80 prokurorë të angazhuar për zgjedhjet e sotme

Rreth 80 prokurorë të shtetit janë angazhuar për zgjedhjet e balotazhit që po mbahen sot.

Përmes një komunikate për media, bëhet e ditur se prokurorët janë duke qëndruar në zyrat e tyre në qytetet ku ekzistojnë prokuroritë themelore, ndërsa në ato vende ku prokuroria nuk ka objekt, prokurorët do të qëndrojnë në stacione policore, ku në bashkëpunim me hetuesit e Policisë së Kosovës do të jenë në mbrojtje të votës së lirë të qytetarëve.

“Në këto zgjedhje janë angazhuar rreth 80 prokurorë të shtetit dhe zyrtarë të sistemit prokurorial, të cilët po qëndrojnë kujdestarë në gjithë territorin e Republikës së Kosovës, deri në përfundim të procesit zgjedhor, me qëllim të procedimit të çdo parregullsie që mund të ndodhë në zgjedhjet e sivjetme lokale. Ndërkaq, koordinatorja nacionale për zgjedhje, prokuroja Laura Pula po e mbikëqyrë gjithë mbarëvajtjen e zbatimit të detyrave të koordinatorëve rajonal, prokurorëve të angazhuar dhe prokurorit me detyrë në KQZ. Zyra e Kryeprokurorit të Shtetit i fton qytetarët e Republikës së Kosovës, të gjitha subjektet politike, institucionet apo organizatat e ndryshme, që të denoncojnë tek prokuroritë përkatëse, çdo rast, për të cilin kanë dyshime se po keqpërdoret ose manipulohet vota në çfarëdo mënyre dhe nga kushdo qoftë”, thuhet në njoftim.

Ekipi i Kohës pengohet të marrë pamje brenda një vendvotimi në shkollën “Fazli Grajqevci” në Mitrovicë

Ekipi i Kohës është penguar të xhirojë në një vendvotim në shkollën “Fazli Grajqevci” në Shipol të Mitrovicës.

Gazetarja Valbona Bytyqi gjatë kohës sa ishte duke raportuar drejtpërdrejt, nuk është lejuar të marrë pamje brenda klasës.

Kjo pasi një nga kryesuesit e këtij vendvotimi u ka thënë që nuk është i lejuar xhirimi. Kjo duke u bazuar në fotografitë e vendosura në vendvotim ku ndalohet fotografimi dhe telefoni.

Ish-anëtari i KQZ-së Blerim Burjani ka thënë se nuk duhet të ndalohen gazetarët.

“Nuk ka ndodhë që gazetarët të mos lejohen të xhirojnë brenda vendvotimit. Është keqkuptim, sepse trajnimi bëhet që qytetarët të mos bëjnë fotografi. Kjo nuk duhet të ndodhë. Gazetarët janë të lirë”, ka thënë ai.

Radoniqi bën thirrje për dalje në votim dhe respektim të Ligjit të zgjedhjeve

Kryetari i Komisionit Qendror të Zgjedhjeve, Kreshnik Radoniqi ka thënë se çdo gjë është gati për të votuar sot.

Ai ka ftuar qytetarët e 18 komunave të cilat janë në balotazh që të shfrytëzojnë të drejtën e tyre për votim.

“Me këtë rast bëj apel që të respektohen rregullat e KQZ dhe ligji i zgjedhjeve”, ka thënë ai.

Ai ka thënë se sa i përket votimit me asistencë KQZ ka marrë të gjithë hapat.

“Se çka ndodhë në realitet në ditën e zgjedhjeve do të mbetet nën administrimin e KKZ-së”, ka thënë Radoniqi, duke shtuar se jo çdo kush ka të drejtë të votojë me asistencë.

Ndërkaq për votat me postë, ai ka thënë se pritet të vijnë gjatë javës së ardhshme.

Hapen vendvotimet

Photo: Driton Paçarada

Në orën 7 janë hapur vendvotimet në 18 komunat të cilat kanë shkuar në rundin e dytë të votimeve.

Beteja finale për pushtetin lokal, zhvillohet të dielën në 18 komuna. Nga ora 7 e mëngjesit e deri në 7 të mbrëmjes, nëpërmjet votës, qytetarët do të vendosin se kush do të udhëheqë në komunat: Prishtinë, Prizren, Peja, Junik, Dragash, Gjakovë, Kaçanik, Fushë Kosovë, Mitrovicë e Jugut, Rahovec, Suharekë, Gjilan, Viti, Vushtrri, Obiliq, Klinë, Mamushë dhe Kllokot.

Për raundin e dytë, numri i qytetarëve me të drejtë vote u rrit për 543 votues.

Beteja finale në 18 komuna

Foto: Ilustrim

Photo: Driton Paçarada

Beteja finale për pushtetin lokal, zhvillohet të dielën në 18 komuna. Nga ora 7 e mëngjesit e deri në 7 të mbrëmjes, nëpërmjet votës, qytetarët do të vendosin se kush do të udhëheqë në komunat: Prishtinë, Prizren, Peja, Junik, Dragash, Gjakovë, Kaçanik, Fushë Kosovë, Mitrovicë e Jugut, Rahovec, Suharekë, Gjilan, Viti, Vushtrri, Obiliq, Klinë, Mamushë dhe Kllokot.

Për raundin e dytë, numri i qytetarëve me të drejtë vote u rrit për 543 votues.

“Sipas Listës së Votuesve të aprovuar nga KQZ, pas përditësimit të të dhënave me votuesit e rinj që kanë mbushin 18 vjeç nga 13 tetori deri më 9 nëntor dhe pas largimit të personave të vdekur dhe të atyre që kanë hequr dorë nga shtetësia e Kosovës, numri i përgjithshëm i qytetarëve me të drejtë vote në këto 18 komuna është 1,316,672, pra vetëm 543 votues më shumë se në rundin e parë”, ka bërë të ditur KQZ-ja.

20 komuna e kanë vendosur kryetarin në raundin e parë, më 12 tetor.

Qendrat e votimit, të dielën do të hapen në orën 7 dhe do të mbyllen në orën 19.