Në këtë tekst do të mund t’i lexoni zhvillimet kryesore të ditës së 13-të të fushatës zgjedhore për zgjedhjet lokale të 12 tetorit. Çfarë premtimesh kanë dhënë kandidatët për kryetar të komunave? Në cilat komuna kanë qenë liderët e partive e çfarë kanë premtuar ata?
Agjenda mediale e Partisë Demokratike të Kosovës për ditën e enjte, 25 shtator 2025
19:00- Partia Demokratike e Kosovës mban tubim zgjedhor me qytetarët e Komunës së Prishtinës. (Lagjja Kalabria, shkolla fillore “7 Marsi”)
18:30 - Partia Demokratike e Kosovës mban tubim zgjedhor me qytetarët e Komunës së Ferizajt (Restaurant “Kalaja e Krujës”, fshati Dardani)
19:00 - Partia Demokratike e Kosovës mban tubim zgjedhor me qytetarët e Komunës së Prizrenit (Nëndega “Bajram Curri”, shkolla fillore “Fatmir Berisha)
Agjenda e Lidhjes Demokratike të Kosovës:
19:00 – Lidhja Demokratike e Kosovës mban tubime elektorale në Prishtinë Dega II. (Gjimnazi i Shkencave Shoqërore “Ahmet Gashi”, Prishtinë)
20:30 – Lidhja Demokratike e Kosovës mban tubime elektorale. (Ferizaj)
Agjenda e Aleancës për Ardhmërinë e Kosovës
18:00 – Lipjan, para sheshit “Adem Jashari”. Ecja nëpër shesh me ndalesë te busti “Adem Jashari”, pastaj vazhdohet deri para restorantit “Pishat”, ku mbahen fjalimet
20:30 -Istog, takim me banorë të Kaliqanit
Peci prezanton projektet në fshatin Kçiq të Mitrovicës
Kandidati për kryetar të Komunës së Mitrovicës nga Lëvizja Vetëvendosje, Faton Peci, ka njoftuar përmes një postimi në Facebook për një takim që ka zhvilluar me banorët e fshatit Kçiq. Sipas Pecit, vlerësimi i qytetarëve për qeverisjen aktuale është se kanë dështuar në çdo aspekt, teksa prezantoi edhe projektet për këtë fshat.
“Në çdo lagje e në çdo lokalitet, vlerësimi i qytetarëve është i njëjtë: kanë dështuar në çdo aspekt. Ndërsa ne do të ndryshojmë mendësinë qeverisëse në funksion të zhvillimit të Mitrovicës.
Në Kçiq, së bashku me banorët, konfirmuam projektet tona për zhvillim: Ndërtimin e çerdhes, zgjidhjen e çështjes së komasacionit, ndërtimin e urës që lidh Kçiqin me Frashërin, përmirësimin e kanalizimit dhe ndriçimit publik.”, ka shkruar kandidati Peci.
Totaj: Për herë të parë pas shumë dekadash po e sjellim QKMF-në e dytë
Kryetari aktual i Komunës së Prizrenit dhe kandidati për një mandat tjetër nga PDK-ja, Shaqir Totaj, ka thënë përmes një postimi në Facebook se për herë të parë pas shumë dekadash, po e sjellin Qendrën e dytë të Mjekësisë Familjare në këtë komunë.
Ky projekt sipas Totajt është para finalizimit.
“Për herë të parë, pas shumë dekadash, Prizrenit po ia sjellim Qendrën e Dytë të Mjekësisë Familjare. Rritja e popullsisë e nevojat për shërbime të shpejta dhe efikase shëndetësore, na kanë nxitur të punojmë 24h për ta ndërtuar QKMF-2 e cila do t’i përballojë nevojat dhe kërkesat e qytetarëve!.”, ka thënë Totaj përmes një postimi në rrjetin e tij social Facebook.
Rama: Qendra Kulturore në Llukar u ringjall
Kryetari i Prishtinës, i cili synon edhe një tjetër mandat, Përparim Rama, ka thënë se Qendra Kulturore në Llukar u ringjall.
Në një postim në Facebook ka shkruar se kjo qendër nuk u ringjall si objekt i ri, por si vend ku talenti, arti dhe komuniteti gjejnë strehë.
“Qendra Kulturore në Llukarë u ringjall, jo vetëm si një objekt i ri, por si një vend ku talenti, arti dhe komuniteti gjejnë strehë”, ka shkruar ai.
Krasniqi: Vitia ka nevojë për një kapitull të ri
Partia Demokratike e Kosovës (PDK) në kuadër të fushatës për zgjedhjet lokale të 12 tetorit, të enjten ka mbajtur një tubim në Vitit.
Kryetari i PDK-së Memli Krasniqi, ka thënë se kjo komunë ka nevojë për një kapitull e energji të re.
“Vitia ka nevojë për një kapitull të ri - me projekte konkrete, energji të re dhe lidership të vyeshëm e të ndershëm. Më 12 tetor, zgjedhja është e qartë: PDK 191 me Bekim Azizin kryetar”, ka shkruar Krasniqi.