LVV-ja gjobitet për pjesëmarrjen e fëmijëve në fushatë

Lëvizja Vetëvendosje është gjobitur me 5100 euro nga Paneli Zgjedhor për Ankesa dhe Parashtresa, për shkak të pjesëmarrjes së fëmijëve në fushatën zgjedhore për zgjedhjet e 7 qershorit.

Siç ka bërë të ditur PZAP-ja, ankesa është bërë nga Lidhja Demokratike e Kosovës dhe organizata joqeveritare Instituti i Kosovës për Drejtësi.

LVV-ja në Vushtrri më 30 maj kishte ftuar në skenë një vajzë të mitur që ka recituar para pjesëmarrësve të tubimit.

Në përgjigjen ndaj ankesave, VV-ja ka thënë se e mitura nuk ka qenë pjesë e programit, por është ofruar vetë në prani të prindit për të recituar dhe kjo i është mundësuar.  Sipas VV-së, kjo nuk paraqet “angazhim të një personi nën 15 vjeç”.

Megjithatë, PZAP-ja ka konstatuar se në tubim ka marrë pjesë një fëmijë dhe se kjo bie ndesh me ligjin në fuqi. PZAP-ja ka thënë se nuk ka rëndësi nëse fëmija ka pasur ftesë apo koordinim për të marrë pjesë në aktivitet, por ka rëndësi fakti se organizatori e ka lejuar pjesëmarrjen e fëmijës në aktivitetin politik.