Çitaku: Pa keqpërdorime të resurseve shtetërore, Kurti do të pësonte fiasko edhe më të thellë politike

Nënkryetarja e Partisë Demokratike të Kosovës (PDK), Vlora Çitaku, ka vlerësuar se rezultati i zgjedhjeve është pasojë e zhgënjimit të qytetarëve me qeverisjen e kryeministrit në detyrë, Albin Kurti.

Në një deklarim për media, Çitaku ka thënë se qeveria e Kurtit ka prodhuar zhgënjim dhe kriza të vazhdueshme, duke shtuar se kjo është reflektuar në pjesëmarrjen e ulët në zgjedhje.

“Qeveria e Albin Kurtit prodhoi zhgënjim te qytetarët dhe kriza të vazhdueshme. Kjo keqqeverisje rezultoi me këtë protestë zgjedhore. Mosdalja e rreth 200 mijë votuesve në zgjedhje është tregues i qartë i kësaj”, deklaroi ajo.

Çitaku akuzoi Lëvizjen Vetëvendosje për keqpërdorim të resurseve shtetërore dhe blerje të votës, duke thënë se janë shpërndarë qindra miliona euro për përfitime elektorale.

“Sikur të mos kishte blerje masive të votës përmes qindra milionave eurove të shpërndara, premtime për punësim, kërcënime ndaj punonjësve shtetërorë, miliona euro për bileta për mërgimtarët dhe keqpërdorim të resurseve shtetërore, ky njeri do të pësonte fiasko edhe më të thellë politike”, u shpreh ajo.

Megjithatë, Çitaku u shpreh se PDK-ja ka arritur ta rikonfirmojë pozicionin e saj politik, duke ruajtur përfaqësimin në përqindje dhe në numrin e deputetëve.

Edhe Arbëri 1 muaj më parë Çitaku: Ne kemi përuruar ura e autostrada, këta ‘vade’

Ajo shtoi se pjesëmarrja e ulët në zgjedhje duhet të shërbejë si mesazh për të gjitha partitë politike.

“Do të presim përfundimin e numërimit dhe më pas do t’i publikojmë qëndrimet tona”, përfundoi Çitaku.

Sipas rezultateve preliminare, PDK-ja është e dyta me mbi 21 për qind.