VV-ja bie, por fiton bindshëm, opozita rritet
Photo: Driton Paçarada
Zgjedhjet e parakohshme të 7 qershorit nuk kanë ndryshuar renditjen e partive, mirëpo fuqinë e tyre, po.
Vetëvendosje sërish ka fituar bindshëm, por me rënie në përqindje krahasuar me rezultatet preliminare të 28 dhjetorit 2025 ku nuk llogariten votat nga diaspora, ato me kusht dhe ato të personave me nevoja të veçanta.
Partia në pushtet ka fituar 42.92 për qind kur janë numëruar 99.40 për qind të vendvotimeve, apo gati 6.5 për qind më pak se në procesin e kaluar elektoral.
E dyta ka dalë sërish Partia Demokratike e Kosovës. Ajo ka fituar 21.06 për qind apo vetëm 0.07 për qind më shumë se më 28 dhjetor.
E treta është LDK-ja me rritjen më të madhe ndër partitë deri tash në opozitë.
Kjo parti, që para zgjedhjeve ka kthyer në gjirin e saj edhe Vjosa Osmanin, që ishte edhe bartëse e listës, ka fituar 17.61 për qind apo rreth 4 për qind më shumë se në zgjedhjet e kaluara, gjithnjë duke u bazuar në rezultate preliminare.
Aleanca për Ardhmërinë e Kosovës që në zgjedhjet e kaluara kaloi për pak pragun elektoral, këtë herë e ka kaluar atë shumë më lehtë, duke marrë 7.18 për qind apo 1.5 për qind më shumë.
Partia Socialdemokrate, që në këto zgjedhje ka garuar me vetëm gjashtë kandidatë për deputetë, nuk e ka kaluar pragun.
Rezultati:
Bazuar në rezultatet preliminare ka fituar vetëm 0.27 për qind apo më pak se 2000 vota.
Në fakt, dalja në këto zgjedhje ishte shumë më e ulët se më 28 dhjetor 2025.
Më 7 qershor dalja ishte 36.38 për qind, derisa në zgjedhjet e kaluara 44.99 për qind, që i bie se tash kanë dalë rreth 200 mijë qytetarë më pak në zgjedhje.
Votat e diasporës, që për të gjitha mënyrat, janë regjistruar rreth 130 mijë persona, do të numërohen më vonë.
Kurti i gatshëm për bashkëpunim me partitë e tjera
Kandidati për kryeministër nga Lëvizja Vetëvendosje, Albin Kurti, e ka shpallur fitoren në zgjedhjet e 7 qershorit, derisa ka paralajmëruar se javët në vijim do të bashkëpunojë me partitë e tjera për të zgjidhur çështjen e presidentit.
Gjatë fjalimit në festën me simpatizantët e partisë në sheshin “Skënderbeu” në Prishtinë, Kurti ka thënë se partia që udhëheq e ka mbi të gjitha interesin publik.
“Javët në vijim do të takojmë, do të bashkëpunojmë me të gjitha partitë sepse para së gjithash e mbi të gjitha interesin publik, vullnetin dhe Republikën sovrane të cilit i shërbejmë me devotshmëri. Llogaritni në ne jo vetëm në punën që bëjmë, por edhe në bashkëpunimin që bëjmë”, është shprehur Kurti.
Sipas tij, kjo dekadë do të jetë e qeverisjes së Lëvizjes Vetëvendosje.
“Për më pak se shtatë vjet, kjo është fitorja e pestë e LVV-së në zgjedhjet parlamentare. Që së paku kjo dekadë, e unë besoj edhe shumë më shumë, është e qeverisjes së Lëvizjes Vetëvendosje. Prandaj edhe në këto zgjedhjet e pesta, u dëshmua që të gjithë garojnë, shumica votojnë e ne fitojmë. Ne i bëjmë bashkë edhe punëtorët, edhe ndërmarrjet, edhe infrastrukturën, edhe bujqësinë, edhe kujdesin për nëna e fëmijë, burra e pleq, për djem e vajza. Faleminderit për këtë mbështetje të madhe. Nuk ka vështirësi që nuk e kemi kaluar, edhe atëherë kur është dukur e pamundur, e kemi realizuar. Sepse tash është shtet për krejt, e ne jemi krejt për shtet”, shtoi Kurti.
Kurti ka thënë po ashtu se institucionet ekzekutive të vendit janë funksionale, por sipas tij, mungon Kuvendi e për këtë ka bërë një porosi për të.
“Jemi të sigurt që te LVV-ja kemi garancinë e mirëqeverisjes dhe se shteti si Republikë është në duar të sigurta. Unë jam kryeministri juaj, herë kryeministër në detyrë e herë në detyrë si kryeministër. Kosova e ka edhe presidenten, u.d. e presidentes Albulena Haxhiu Haxhiu. Sado që festojmë sonte, nesër në orën 8:00 jemi të gjithë në punë. Ajo çka i mungon Kosovës nuk është qeveria, as presidenti, por Kuvendi. Blloku opozitar nuk shkon në punë. E ne jemi të interesuar që edhe blloku opozitar të shkojë në punë. Shpresojmë që në legjislaturën e 11-të...”, ka deklaruar ai.
PDK-ja akuzon Kurtin “për zhgënjimin e qytetarëve”
Daljen e parë publike pas shpalljes së rezultateve preliminare nga PDK-ja, e ka bërë Vlora Çitaku, nënkryetare e kësaj partie.
Ajo ka vlerësuar se rezultati i zgjedhjeve është pasojë e zhgënjimit të qytetarëve me qeverisjen e kryeministrit në detyrë, Albin Kurti.
Çitaku ka thënë se qeveria e Kurtit ka prodhuar zhgënjim dhe kriza të vazhdueshme, duke shtuar se kjo është reflektuar në pjesëmarrjen e ulët në zgjedhje.
“Qeveria e Albin Kurtit prodhoi zhgënjim te qytetarët dhe kriza të vazhdueshme. Kjo keqqeverisje rezultoi me këtë protestë zgjedhore. Mosdalja e rreth 200 mijë votuesve në zgjedhje është tregues i qartë i kësaj”, ka thënë ajo.
Çitaku ka akuzuar Lëvizjen Vetëvendosje për keqpërdorim të resurseve shtetërore dhe blerje të votës sipas saj, duke thënë se janë shpërndarë qindra miliona euro për përfitime elektorale.
“Sikur të mos kishte blerje masive të votës përmes qindra milionave eurove të shpërndara, premtime për punësim, kërcënime ndaj punonjësve shtetërorë, miliona euro për bileta për mërgimtarët dhe keqpërdorim të resurseve shtetërore, ky njeri do të pësonte fiasko edhe më të thellë politike”, është shpreh ajo.
Sipas saj, PDK-ja ka arritur ta rikonfirmojë pozicionin e saj politik, duke ruajtur përfaqësimin në përqindje dhe në numrin e deputetëve.
Ajo ka thënë po ashtu se pjesëmarrja e ulët në zgjedhje duhet të shërbejë si mesazh për të gjitha partitë politike.
“Do të presim përfundimin e numërimit dhe më pas do t’i publikojmë qëndrimet tona”, përfundoi Çitaku.
LDK-ja vë kusht për bisedime emrin e Osmanit për presidente
E kandidati për kryeministër nga Lidhja Demokratike e Kosovës (LDK), Lumir Abdixhiku, ka thënë se janë të vetëdijshëm se pas rezultatit zgjedhor diskutimi i parë do të jetë çështja e presidentit. Ai ka shtuar se LDK-ja e ka kandidaten, Vjosa Osmanin dhe ka paralajmëruar se ajo do të jetë pikënisja e çdo bisedimi.
“Jemi të interesuar për stabilitet institucional. Ne kemi qenë të gatshëm për bisedime me të gjitha partitë shqiptare, përveç Listës Serbe. Dhe jemi të vetëdijshëm se çështja e presidentit do të jetë çështja e parë që do të diskutohet. Ne kemi kandidaten tonë dhe ajo do të jetë pikënisja e çdo bisedimi”, ka deklaruar Abdixhiku.
Siç ka thënë ai, nuk do të ketë kompromis sa i përket çështjes së presidentit.
Ai e ka vlerësuar rezultatin e zgjedhjeve si dëshmi të pjekurisë demokratike të qytetarëve dhe si mbështetje për vizionin politik që, sipas tij, LDK-ja e ka ndërtuar së bashku me Vjosa Osmanin.
Në një konferencë për media pas publikimit të rezultateve preliminare, Abdixhiku ka thënë se rezultati është pasqyrim i një bashkimi të madh qytetar dhe politik rreth një fryme të re.
“Kosova foli qartë. Foli me votë dhe dëshmoi pjekuri demokratike. Rezultati i sotëm është reflektim i një bashkimi të madh njerëzor e politik, i një fryme të re që e kemi ndërtuar me Osmanin”, ka thënë ai. Sipas tij, LDK-ja në legjislaturën e ardhshme do të ketë 20 deputetë apo pesë më shumë.
Edhe Vjosa Osmani ka konfirmuar se çdo bisedim për çështjen e presidentit do të jetë i lidhur me emrin e saj. Sipas Osmanit, lideri i LVV-së, Albin Kurti nuk ka arsye për ta refuzuar emrin e saj për një mandat tjetër për presidente. Po ashtu, ka thënë se ngritja e LDK-së sapo ka filluar.
“Na jep shpresë se jemi në rrugë të drejtë. E më shumë punë në terren dhe afër qytetarëve besoj se LDK-ja do të vazhdojë të ringrihet në muajt dhe vitet në vijim”, ka thënë ajo. “Koha e ringritjes ka filluar. S’ka asgjë që e ndal”.
Gjini: Nisje e jashtëzakonshme
Kryetari i AAK-së, Ardian Gjini, që ishte edhe kandidat për kryeministër nga kjo parti, ka falënderuar qytetarët për mbështetjen e dhënë, duke e cilësuar rezultatin si “nisje të jashtëzakonshme” për subjektin që ai përfaqëson.
Në një konferencë për media pas shpalljes se rezultateve preliminare, Gjini ka thënë se qytetarët që kanë votuar për këtë parti nuk do të pendohen për zgjedhjen e tyre, duke premtuar angazhim të vazhdueshëm për respektimin e vullnetit të shprehur në kutitë e votimit.
“Si Aleancë dhe unë personalisht falënderoj të gjithë qytetarët që kanë votuar e posaçërisht ata që e kanë votuar Aleancën. Mund të ju them se kurrë nuk do të pendohen për votën e vet. Për ne kjo është një nisje e jashtëzakonshme dhe të gjithë ata që i kanë besuar asaj që kemi thënë gjatë fushatës, që besojnë në të ardhmen e Kosovës, që besojnë se një Kosovë duhet të bëhet e mirë për qytetarët e vet, nuk do të pendohen kurrë. Do të punojmë shumë që vota e tyre dhe vullneti i tyre të respektohet maksimalisht”, ka deklaruar ai.
Ai po ashtu ka kritikuar procesin zgjedhor, duke vlerësuar se fushata është zhvilluar në një terren jo të barabartë politik.
“Pavarësisht që kjo garë zgjedhore është mbajtur në një terren absolutisht jo fer politik, janë përdorur të gjitha mjetet e mundshme për ta kthyer rezultatin në favor të pushtetit, prapëseprapë qytetari i Kosovës ka treguar se e kupton ku jemi dhe e do vendin e vet”, ka thënë ai.
Ka reaguar edhe kryetari i deridjeshëm i kësaj partie, Ramush Haradinaj. Ai ka thënë se kur sovrani flet, të tjerët duhet të heshtin.
“Mirënjohës ndaj çdo angazhimi tuajin. Falënderues për besimin e dhënë. Ju që i besuat vizionit që patëm për një Kosovë të sigurt e të zhvilluar, ndryshimeve që bëmë, një rreshtimi të ri drejtues dhe sfidave për atdheun e përbashkët. Për ju që nuk ratë pre e propagandës dhe luftës hibride kundër nesh. Vota juaj këtë herë ishte më shumë sesa mbështetje për Aleancën. Ju na dhatë krahë që të vazhdojmë betejën e nisur për Kosovën që duam, të zhvilluar, sovrane e të pandashme, demokratike nga brenda dhe në partneritet të përjetshëm me aleatët, posaçërisht me Shtetet e Bashkuara”, ka shkruar Haradinaj në një postim në Facebook.
Vendi ka shkuar në zgjedhje, pasi Kuvendi nuk ka arritur ta zgjedhë presidentin.
Kurti shpall fitoren, thotë se është i gatshëm për bashkëpunim me partitë e tjera
Photo: Driton Paçarada
Kandidati për kryeministër i Lëvizjes Vetëvendosje, Albin Kurti, e ka shpallur fitoren në zgjedhjet e 7 qershorit, derisa paralajmëroi se javët në vijim do të bashkëpunojë me partitë e tjera për të zgjidhur çështjen e presidentit.
Gjatë fjalimit në festën me simpatizantët e partisë në sheshin “Skënderbeu” në Prishtinë, Kurti ka thënë se partia që udhëheq e ka mbi të gjitha interesin publik.
“Javët në vijim do të takojmë, do të bashkëpunojmë me të gjitha partitë sepse para së gjithash e mbi të gjitha interesin publik, vullnetin dhe Republikën sovrane të cilit i shërbejmë me devotshmëri. Llogaritni në neve jo vetëm në punën që bëjmë, por edhe në bashkëpunimin që bëjmë”, u shpreh Kurti.
Tutje, ai u shpreh se kjo dekadë do të jetë e qeverisjes së Lëvizjes Vetëvendosje.
“Për më pak se shtatë vjet, kjo është fitorja e pestë e LVV-së në zgjedhjet parlamentare. Që së paku kjo dekadë, e unë besoj edhe shumë më shumë, është e qeverisjes së Lëvizjes Vetëvendosje. Prandaj edhe në këto zgjedhjet e pesta, u dëshmua që të gjithë garojnë, shumica votojnë e ne fitojmë. Ne i bëjmë bashkë edhe punëtorët, edhe ndërmarrjet, edhe infrastrukturën, edhe bujqësinë, edhe kujdesin për nëna e fëmijë, burra e pleq, për djem e vajza. Faleminderit për këtë mbështetje të madhe. Nuk ka vështirësi që nuk e kemi kaluar, edhe atëherë kur është dukur e pamundur, e kemi realizuar. Sepse tash është shtet për krejt, e ne jemi krejt për shtet”, shtoi Kurti.
Kurti u shpreh se institucionet ekzekutive të vendit janë funksionale, por theksoi se mungon Kuvendi e për këtë pati një porosi për opozitën.
“Jemi të sigurt që te LVV-ja kemi garancinë e mirëqeverisjes dhe se shteti si Republikë është në duar të sigurta. Unë jam kryeministri juaj, herë kryeministër në detyrë e herë në detyrë si kryeministër. Kosova e ka edhe presidenten, u.d. e presidentes Albulena Haxhiu Haxhiu. Sado që festojmë sonte, nesër në ora 8 jemi të gjithë në punë. Ajo çka i mungon Kosovës nuk është qeveria, as presidenti, por Kuvendi. Blloku opozitar nuk shkon në punë. E ne jemi të interesuar që edhe blloku opozitar të shkojë në punë. Shpresojmë që në legjislaturën e 11-të...”, deklaroi ai.
Kurti: Fitorja sot, konfirmim që dekada është e qeverisjes së VV-së
Photo: Driton Paçarada
Kryetari i Lëvizjes Vetëvendosje, Albin Kurti, ka thënë se fitorja me 43 për qind në zgjedhjet e 7 qershorit është “konfirmim që dekada i përket qeverisjes së Vetëvendosjes”.
Ai ka thënë se VV-ja ka fituar që pesë palë zgjedhje.
Konjufca: Urime Qeveria “Kurti 4”
Photo: Driton Paçarada
Nënkryetari i Lëvizjes Vetëvendosje, Glauk Konjufca, në festën e partisë për fitoren në zgjedhjet e 7 qershorit, ka uruar ndjekësit e VV-së për Qeverinë “Kurti 4”.
Nga numërimi i më shumë se 99 për qind të votave, VV-ja mbetet e para, por ka marrë afër 43 për qind duke rënë për rreth 8 pikë të përqindjes në krahasim me zgjedhjet e 28 dhjetorit, pa u numëruar ende votat e diasporës.
Me përqindjen aktuale, VV-ja ka 48 ulëse në Kuvend.
Pavarësisht kësaj, Konjufca e ka quajtur fitoren “madhështore”.
E “fitoren më të rëndësishme deri tash” e ka cilësuar rezultatin e së dielës, kryetarja e partisë Guxo, që është në koalicion me VV-në.
PSD-ja mori rreth 1900 vota, Kuçi: Nuk arritëm rezultatin që dëshiruam
Natyra Kuçi nga Partia Socialdemokrate, ka shprehur zhgënjimin me rezultatin që arriti kjo parti në zgjedhjet e të dielës.
Kur janë numëruar votat në rreth 99 për qind të vendvotimeve, PSD-ja ka marrë 1877 vota apo 0.27 për qind.
“Nuk arritëm rezultatin që dëshiruam. Kjo është e qartë dhe nuk e anashkalojmë. Por besimi ynë në bindjet dhe vlerat që kemi përfaqësuar mbetet i palëkundur. Faleminderit të gjithëve që na mbështetën. PSD vazhdon”, ka shkruar Kuçi në Facebook.
PSD-ja në zgjedhjet e 7 qershorit garoi me gjashtë kandidatë për deputetë. Kuçi ishte kandidate.
Ky është rezultatit preliminar në Prishtinë
Photo: Driton Paçarada
Janë procesuar të gjitha 262 vendvotimet në Prishtinë, ndërsa Lëvizja Vetëvendosje ka siguruar 48.893 vota, apo 48.90 për qind në zgjedhjet e parakohshme të së dielës.
E dyta ka dal Lidhja Demokratike e Kosovës me 24.483 vota apo 24.44 për qind, ndërsa Partia Demokratike e Kosovës doli e treta me 19.078 vota apo 19.05 për qind. Aleanca për Ardhmëri të Kosovës si e katërta ka marrë 5134 vota apo 5.13 për qind.
Peci: VV-ja i ka votat që ta bëjë vetë Qeverinë e radhës
Bashkëkryetari i Partisë Guxo, Faton Peci, ka thënë se koalicioni me Vetëvendosjen ka marrë votat e mjaftueshme që ta bëjë i vetëm qeverinë e radhës.
“Aktualisht jemi 44 për qind në nivel vendi. Të shohim votat në mërgatë. Sipas projeksioneve koalicioni VV i ka votat e mjaftueshme të bëjë vetë qeverinë e radhës”, ka thënë ai për gazetarët teksa është shprehur i bindur që s’do të ketë zgjedhje të reja së shpejti.
Teksa numërimi po shkon drejt fundit, në zgjedhjet e 7 qershorit VV-ja mori mbi 43 për qind si e para, por duke pësuar rënie prej 51 për qind sa i mori në dhjetor.
Osmani: VV-ja s’ka arsye për të refuzuar emrin tim
Vjosa Osmani (Foto: KTV)
Vjosa Osmani, prijëse e listës së Lidhjes Demokratike të Kosovës në zgjedhjet e 7 qershorit, ka thënë se Lëvizja Vetëvendosje s’ka arsye për ta refuzuar emrin e saj për një mandat tjetër për presidente.
Në një konferencë për media bashkë me kryetarin e LDK-së, Lumir Abdixhiku, Osmani që synon edhe një mandat si presidente tha se rezultati i sotëm “është vetëm hapi i parë drejt ringritjes”.
“Na jep shpresë se jemi në rrugë të drejtë. E më shumë punë në terren dhe afër qytetarëve besoj se LDK-ja do të vazhdojë të ringritet në muajt dhe vitet në vijim”, ka thënë ajo. “Koha e ringritjes vetëm ka filluar. S’ka asgjë që e ndal”.
Në zgjedhjet e 7 qershorit, LDK-ja ruajti votën e saj, por u rrit në përqindje për shkak të rënies së numrit total të votuesve. LDK-ja është partia e tretë me 18 për qind.
Lëvizja Vetëvendosje aktualisht po fiton me mbi 43 për qind të votave.
VIDEO:
Abdixhiku: S’bëjmë kompromise për emrin e presidentit me të cilin kërkuam mbështetje qytetare
Kandidati për kryeministër nga Lidhja Demokratike e Kosovës (LDK), Lumir Abdixhiku, ka bërë të ditur se partia e tij nuk do të heqë dorë nga kandidatura e Vjosa Osmanit për presidente në kuadër të diskutimeve për formimin e institucioneve të reja. Ai theksoi se LDK-ja mbetet e përkushtuar ndaj premtimeve me të cilat ka kërkuar besimin e qytetarëve e që Osmani do të jetë pikënisja e çdo bisedimi për president.
“Nuk do të kishte kuptim që të dilnim në fushatë me kandidaturën për presidente e më pas në konferencë për media pas përfundimit të zgjedhjeve t’i refuzonim në momentin e parë. Nuk është politikë e imja e as e LDK-së. Nuk kemi ndërmend të bëjmë kompromise me gjërat që kemi kërkuar mbështetje qytetare. Jemi të interesuar për stabilitet institucional. Ne kemi qenë të gatshëm për bisedime me të gjitha partitë shqiptare, përveç Listës Serbe. Dhe jemi të vetëdijshëm se çështja e presidentit do të jetë çështja e parë që do të diskutohet. Ne kemi kandidaten tonë dhe ajo do të jetë pikënisja e çdo bisedimi”, ka deklaruar Abdixhiku.
Ai e ka vlerësuar rezultatin e zgjedhjeve si dëshmi të pjekurisë demokratike të qytetarëve dhe si mbështetje për vizionin politik që, sipas tij, LDK-ja ka ndërtuar së bashku me Vjosa Osmanin.
Në një konferencë për media pas publikimit të rezultateve preliminare, Abdixhiku ka thënë se rezultati është pasqyrim i një bashkimi të madh qytetar dhe politik rreth një fryme të re.
“Kosova foli qartë. Foli me votë dhe dëshmoi pjekuri demokratike. Rezultati i sotëm është reflektim i një bashkimi të madh njerëzor e politik, i një fryme të re që e kemi ndërtuar me Osmanin”, ka thënë ai.
Abdixhiku theksoi se LDK-ja ka shënuar rritjen më të madhe në këto zgjedhje, duke kaluar nga 13 në 18 për qind dhe, sipas projeksioneve të, në 20 mandate.
“Ky është rezultat i punës së jashtëzakonshme dhe të palodhshme të strukturave tona. Është mbështetje për vizionin që e kemi nisur dhe shenjë e qartë se ky vizion po merr përkrahje qytetare. Me 20 mandate, LDK-ja është e stabilizuar dhe ka një të ardhme të mirë përpara”, deklaroi ai.
Sipas Abdixhikut, rezultati sjell jo vetëm privilegj, por edhe përgjegjësi për ta zgjeruar më tej besimin e qytetarëve.
Ai kritikoi procesin zgjedhor, duke thënë se gara nuk ishte e barabartë dhe se përballë kishin një aparat shtetëror të angazhuar në funksion elektoral.
“Kishim përballë një aparat të pushtetit, një makineri shtetërore në funksion elektoral dhe një klimë të ndërtuar me ndasi e përçarje. Patëm edhe blerje të votës”, u shpreh Abdixhiku.
Ai shtoi se rënia e mbështetjes për partinë në pushtet me rreth 200 mijë vota përbën një sinjal të qartë nga qytetarët.
“Pamë një refuzim të qartë të këtij stili qeverisës. Humbja e 200 mijë votave është sinjal që nuk duhet të injorohet. Qytetarët po kërkojnë stabilitet politik”, shtoi ai.
Në fund, Abdixhiku paralajmëroi se nga dita e nesërme do të angazhohet për ndërtimin e një platforme politike që, sipas tij, do t’i përgjigjet kërkesave të qytetarëve për stabilitet dhe zhvillim.
Daut Haradinaj thotë se do ta lëshojë mandatin e deputetit
Daut Haradinaj ka thënë se po lëshon vend për kandidatët tjerë në listë, duke e lëshuar mandatin e presidentit.
Bazuar në rezultatet preeliminare Aleanca për Ardhmëri të Kosovës do të ketë tetë deputetë.
Daut Haradinaj ka thënë se e kishte obligim moral ta përkrahte kryetarin e partisë dhe kandidatin për kryeministër nga kjo parti, Ardian Gjinin.
“E kam pasur obligim moral që këtë betejë t’ia dhuroj shpërblimin Ardian Gjinit. Ndihem sinqerisht i përmbushur dhe falënderues ndaj të gjithë atyre që më besuan, dhe do t’ju besoj gjithmonë. Krenar me ju që luftuat si spartanë. Jam dhe do të jem gjithmonë Aleancë, por mandatin si deputet kësaj radhe e le për t’ju lëshuar vend të tjerëve në listën tonë fantastike. Jam për dhe me popullin, mandati është vlerë dhe respekt i jashtëzakonshëm, por jo qëllimi im i vetëm. Bashkë, pas dhe me ju Aleancë. Urime Ardian Gjini, krenohemi me ty. Veçanërisht krenar me ju që më besuat”, ka shkruar Daut Haradinaj në Facebook.
E Ramush Haradinaj ka thënë se do të jenë më të vendosur se kurrë t’i përmbushin detyrat.
Çitaku: Pa keqpërdorime të resurseve shtetërore, Kurti do të pësonte fiasko edhe më të thellë politike
Photo: Driton Paçarada
Nënkryetarja e Partisë Demokratike të Kosovës (PDK), Vlora Çitaku, ka vlerësuar se rezultati i zgjedhjeve është pasojë e zhgënjimit të qytetarëve me qeverisjen e kryeministrit në detyrë, Albin Kurti.
Në një deklarim për media, Çitaku ka thënë se qeveria e Kurtit ka prodhuar zhgënjim dhe kriza të vazhdueshme, duke shtuar se kjo është reflektuar në pjesëmarrjen e ulët në zgjedhje.
“Qeveria e Albin Kurtit prodhoi zhgënjim te qytetarët dhe kriza të vazhdueshme. Kjo keqqeverisje rezultoi me këtë protestë zgjedhore. Mosdalja e rreth 200 mijë votuesve në zgjedhje është tregues i qartë i kësaj”, deklaroi ajo.
Çitaku akuzoi Lëvizjen Vetëvendosje për keqpërdorim të resurseve shtetërore dhe blerje të votës, duke thënë se janë shpërndarë qindra miliona euro për përfitime elektorale.
“Sikur të mos kishte blerje masive të votës përmes qindra milionave eurove të shpërndara, premtime për punësim, kërcënime ndaj punonjësve shtetërorë, miliona euro për bileta për mërgimtarët dhe keqpërdorim të resurseve shtetërore, ky njeri do të pësonte fiasko edhe më të thellë politike”, u shpreh ajo.
Megjithatë, Çitaku u shpreh se PDK-ja ka arritur ta rikonfirmojë pozicionin e saj politik, duke ruajtur përfaqësimin në përqindje dhe në numrin e deputetëve.
Ajo shtoi se pjesëmarrja e ulët në zgjedhje duhet të shërbejë si mesazh për të gjitha partitë politike.
“Do të presim përfundimin e numërimit dhe më pas do t’i publikojmë qëndrimet tona”, përfundoi Çitaku.
Sipas rezultateve preliminare, PDK-ja është e dyta me mbi 21 për qind.
Nis festa e VV-së
Photo: Driton Paçarada
Simpatizantët e Lëvizjes Vetëvendosje kanë nisur festimet në kryeqytet pas rezultateve preliminare të zgjedhjeve të sotme.
Aty shihen tupanë e dhjetëra simpatizantë duke kërcyer.
Sipas rezultateve preliminare, VV-ja ka fituar mbi 43 për qind.
Kosova “kthehet” në shkurt 2025
Photo: Driton Paçarada
Rezultatet e zgjedhjeve të 7 qershorit, pas numërimit të më shumë se 92 për qind të vendvotimeve, kanë kthyer skenën politike në rezultatet e shkurtit 2025.
Përderisa Vetëvendosje në zgjedhjet të 28 dhjetorit mori më shumë se 51 për qind të votave, në zgjedhjet e 7 qershorit ka rënë në 43.6 për qind të votave, ndërsa më 9 shkurt 2025 kishte 42.3 për qind.
Partia Demokratike e Kosovës aktualisht ka 21.5 për qind. Në dhjetor i kishte 20.09 për qind e në shkurt 2025 20.95 për qind.
Lidhja Demokratike e Kosovës në zgjedhjet e 7 qershorit, sipas numërimit aktual, ka 17.97 për qind, ndërsa në dhjetor i kishte 13.57 për qind. Në shkurt 2025 i kishte 18.27 për qind.
Aleanca për Ardhmërinë e Kosovës ka 7.23 për qind, ndërsa i kishte 7.06. për qind në shkurt. Në dhjetor ishte në rrezik me 5.66 për qind të votave.
Deri tash numërimi i zgjedhjeve të 7 qershorit vlen vetëm për vendvotimet në Kosovë. Duhet të numërohen edhe votat e diasporës dhe ato me kusht.
Pas shkurtit 2025, Kuvendi dështoi të zgjidhte Qeverinë dhe Kosova shkoi në zgjedhje të reja në dhjetor. Pas dhjetorit dështoi ta zgjedhë presidentin dhe sot mbajti zgjedhjet e treta në më pak se një vit e gjysmë.
Gjini: Rezultati për Aleancën, nisje e jashtëzakonshme
Kryetari i Aleancës, Ardian Gjini, që ishte edhe kandidat për kryeministër nga kjo parti, ka falënderuar qytetarët për mbështetjen e dhënë, duke e cilësuar rezultatin si “nisje të jashtëzakonshme” për subjektin që ai përfaqëson.
Në një konferencë për media pas rezultatit preliminar të zgjedhjeve, Gjini tha se qytetarët që kanë votuar për këtë parti nuk do të pendohen për zgjedhjen e tyre, duke premtuar angazhim të vazhdueshëm për respektimin e vullnetit të shprehur në kutitë e votimit.
“Si Aleancë dhe unë personalisht falënderoj të gjithë qytetarët që kanë votuar e posaçërisht ata që e kanë votuar Aleancën. Mund të ju them se kurrë nuk do të pendohen për votën e vet. Për ne kjo është një nisje e jashtëzakonshme dhe të gjithë ata që i kanë besuar asaj që kemi thënë gjatë fushatës, që besojnë në të ardhmen e Kosovës, që besojnë se një Kosovë duhet të bëhet e mirë për qytetarët e vet, nuk do të pendohen kurrë. Do të punojmë shumë që vota e tyre dhe vullneti i tyre të respektohet maksimalisht”, ka deklaruar ai.
Ai kritikoi procesin zgjedhor, duke vlerësuar se fushata është zhvilluar në një terren jo të barabartë politik.
“Pavarësisht që kjo garë zgjedhore është mbajtur në një terren absolutisht jo fer politik, janë përdorur të gjitha mjetet e mundshme për ta kthyer rezultatin në favor të pushtetit, prapëseprapë qytetari i Kosovës ka treguar se e kupton ku jemi dhe e do vendin e vet”, u shpreh ai.
Kica-Xhelili për Kurtin: I dha 200 milionë euro, i humbi 200 mijë vota
Doarsa Kica-Xhelili
Photo: Driton Paçarada
Kandidatja për deputete nga LDK-ja, Doarsa Kica-Xhelili, ka reaguar pas publikimit të rezultateve preliminare për zgjedhjet e 7 qershorit.
“I dha 200 milionë Euro, i humbi 200 mijë vota! Kosovë, Republika ime”, ka shkruar ajo, duke aluduar për kandidatin e LVV-së për kryeministër, Albin Kurti.
Numërohen rreth 90 për qind të votave, VV-ja e vetmja në rënie në përqindje
Photo: Driton Paçarada
Janë numëruar rreth 90 për qind të votave nga vendvotimet në Kosovë.
Lëvizja Vetëvendosje nga numërimi i 90.47 për qind të vendvotimeve, ka marrë 43.71 për qind të votave si partia më e madhe. Ajo ka marrë më shumë se 273 mijë vota.
Partia Demokratike e Kosovës ka marrë 21.58 për qind të votave, apo 135 mijë vota.
Lidhja Demokratike ka 17.99 për qind të votave apo rreth 113 mijë vota.
Aleanca për Ardhmërinë e Kosovës ka marrë 7.28 për qind të votave apo rreth 46 mijë vota.
Në total, më 7 qershor në zgjedhjet e parakohshme parlamentare pati rënie të daljes së votuesve. Aktualisht, LVV-ja nga katërshja e madhe është e vetmja me rezultat më të dobët se në zgjedhjet e 28 dhjetorit.
Demokracia në Veprim publikon rezultatet preliminare
Organizata Demokracia në Veprim ka publikuar rezultatet preliminare për zgjedhjet e 7 qershorit, sipas raporteve që ka marrë nga vëzhguesit e saj.
Sipas DnV-së, Lëvizja Vetëvendosje është e para me 42.7 për qind të votave, me marzh gabimi prej 1.7 për qind.
PDK-ja e dyta me 21.5 për qind, me marzh gabimi 1.6 për qind.
LDK-ja e treta ka 17.7 për qind, me marzh gabimi 1.1 për qind.
E AAK-ja ka 7.1 për qind, me marzh gabimi 1.1 për qind.
Këto rezultate nuk përfshijnë votat me kusht dhe ato të diasporës.
Pesë persona të ndaluar për vepra penale lidhur me zgjedhjet
Prokurori i Shtetit ka njoftuar se janë ndaluar 5 persona të dyshuar për kryerje të veprave penale lidhur me të drejtat e votimit. Nga Prokuroria është bërë e ditur se janë raportuar 4 raste në rajonin e Prishtinës, 6 në rajonin e Prizrenit, 2 në rajonin e Pejës, 3 në të Ferizajt dhe dy raste në veri të Mitrovicës.
“Nga të gjitha këto raste kemi 5 persona të ndaluar dhe 12 persona tjerë të liruar në procedurë të rregullt. Prokurorët e shtetit do të vazhdojnë të kujdestarojnë edhe gjatë numërimit të votave në vendvotime deri në dërgimin e tyre në qendrat komunale të numërimit. Me këtë rast Zyra e Kryeprokurorit të Shtetit falënderon qytetarët e Republikës së Kosovës, mediat dhe shoqërinë civile për bashkëpunimin e treguar me Prokurorin e Shtetit, me qëllim parandalimin dhe ndjekjen e suksesshme të veprave penale lidhur me këto zgjedhje”, është thënë nga Prokurori i Shtetit.
E Policia e Kosovës ka thënë se zgjedhjet kanë kaluar të qeta dhe pa incidente serioze. Ka thënë se ka iniciuar 17 raste penale që ndërlidhen me procesin zgjedhor, për veprat “cenimi i fshehtësisë së votimit”, “asgjësimi i dokumenteve të votimit”, “keqpërdorim i të drejtës së votimit” dhe “dhënie ose marrje e ryshfetit në lidhje me votimin” dhe se lidhur me këto raste, 5 persona të dyshuar janë dërguar në mbajtje.
Ka njoftuar se gjatë ditës së zgjedhjeve janë përfshirë mbi 6300 zyrtarë policorë.
Numërohen më shumë se 40 për qind e votave, VV-ja mbi 41%
Photo: Driton Paçarada
Pas numërimit të më shumë se 40 për qind të vendvotimeve në nivel vendi, Vetëvendosje ka fituar 41.24 për qind të votave.
Në zgjedhjet e 28 dhjetorit, VV-ja pati 49.34 për qind të votave në rezultatet preliminare.
Partia Demokratike e Kosovës ka marrë 21.93 për qind. Lidhja Demokratike ka 18.08 për qind e votave
Aleanca për Ardhmërinë e Kosovës ka 8.31 për qind të votave.
Hamza bën thirrje për respektim të secilës votë
Kryetari i Partisë Demokratike të Kosovës, Bedri Hamza, ka bërë thirrje për respektim të secilës votë. Ai ka bërë thirrje që çdo votë të numërohet me kujdes.
“Qytetarët e Kosovës treguan edhe një herë qytetari, përgjegjësi dhe kulturë demokratike. Në një proces të qetë e dinjitoz, ata dëshmuan se besojnë në fuqinë e votës dhe në të drejtën për të vendosur për të ardhmen e vendit tonë. Dua t’i falënderoj të gjithë ata që morën pjesë në këtë proces zgjedhor, si dhe institucionet, komisionerët, vëzhguesit, mediat dhe forcat e rendit për angazhimin e tyre në mbarëvajtjen e tij. Tani është shumë e rëndësishme që çdo votë të numërohet me kujdes dhe të respektohet plotësisht vullneti i qytetarëve. Demokracia nuk përfundon me hedhjen e votës në kuti, por vazhdon edhe me respektimin e saj. Le të kujdesemi së bashku që çdo votë e qytetarëve të ruhet dhe të mbrohet deri në fund”, ka shkruar ai në Facebook.
Pas numërimit të rreth 33 për qind të vendvotimeve, PDK-ja e Hamzës ka rreth 22 për qind të votave si partia e dytë më e madhe pas VV-së me rreth 41 për qind.