Monitoruesi në Iniciativën për Progres (INPO), Arbër Kabashi, tha se korrupsioni po fshihet në detaje të vogla dhe se është i nevojshëm monitorimi i specifikave të tenderëve.
Ai në emisionin “Tempus” në KTV, tha se si organizatë janë duke shqyrtuar hartimin e specifikave teknike në një temë, e cila është pak e prekur nga organizata të ndryshme të shoqërisë civile, gjithashtu pak e prekur edhe nga Komision Rregullativ i Prokurimit Publik.
“Pra, jemi duke shikuar mënyrën se si hartohen specifikacionet teknike, ngase një prej elementeve kyçe të cilat shumë me rëndësi të trajtohen për hartuar një aktivitet i prokurimit, është mënyra se si hartohen specifikacionet teknike sepse tashmë korrupsioni është i fshehur në detaje të vogla”, tha Kabashi.
Ai theksoi se ekziston nevoja që autoritetet kontraktuese të publikojnë edhe dokumente tjera të rëndësishme në e-prokurim.
“Për shkak se tash aktualisht nëpër platforma të ndryshme siç është e-prokurimi është mundësia shumë e madhe për t’u monitoruar aktivitete të ndryshme sepse po ofrohet një transparencë jashtëzakonisht e madhe, por megjithatë ka nevojë që shumë autoritete kontraktuese vazhdimisht të publikojnë edhe dokumente të tjera të rëndësishme në e-prokurim, të tilla nëse nuk janë në e-prokurim, ne përmes qasjes dokumente publike po bëjmë kërkesa”, deklaroi Kabashi.
