Hakerët e Koresë së Veriut depërtojnë në prodhuesit e çipave të Koresë së Jugut

Hakerët e Koresë së Veriut kanë depërtuar në prodhuesit e çipave të Koresë së Jugut, ka njoftuar agjencia jugkoreane e spiunazhit.

Sipas agjencisë, Koreja e Veriut po përpiqet të krijojë gjysmëpërçues për programet e armëve, e kjo u bë një muaj pasi presidenti Yoon Suk Yeol paralajmëroi se mund të ketë sulme të tilla, me qëllim që të ndërhyhet në zgjedhjet e ardhshme.

Vitin e kaluar, Koreja e Veriut ia kishte hakuar email adresën një ndihmësi të presidentit Yoon.

“Ne besojmë se Koreja e Veriut me gjasë po përgatitet të prodhojë gjysmëpërçuesit e saj përballë vështirësive në blerjen e tyre, për shkak të sanksioneve”, thuhet në reagimin e autoriteteve të Koresë së Veriut.

Dyshohet se Koreja e Veriut ka depërtuar në dhjetorin e 2023-s dhe në shkurt në serverët e dy kompanive prodhuese të çipave, duke vjedhur modele të produkteve dhe fotografi të objekteve të tyre.

Nuk dihet nëse në sulmin e fundit Koreja e Veriut vodhi diçka.

Edhe Botë 14 shk 2024 Koreja e Veriut hakon emailet e ndihmësit të presidentit të Koresë së Jugut

Koreja e Veriut gjithmonë i ka mohuar përfshirjet në sulmet kibernetike, por ajo e Jugut i ka fajësuar hakerët koreano-verior për vjedhjen e shumave të mëdha të parave, përfshirë kriptovaluta, me qëllim që “të financohet regjimi i programeve të armëve bërthamore”.

Koreja e Veriut vlerësohet të ketë vjedhur deri në 3 miliardë dollarë që nga 2016-a. Gjithashtu thuhet se ka kryer sulme edhe me qëllim të vjedhjes së sekreteve shtetërore, duke përfshirë edhe detaje të teknologjisë së avancuar të armëve.

Vendi që është subjekt i sanksioneve ekstreme ndërkombëtare, po bëhet gjithnjë e më i sofistikuar në mënyrën se si kryen sulme kibernetike.