Tech

Netflixi thotë se rregullat për ndarjen e fjalëkalimeve u publikuan aksidentalisht

Vetëm disa ditë pas shpalljes së rregullave të reja që synojnë heqjen e ndarjes së fjalëkalimeve midis përdoruesve, Netflixi ka pohuar se këto janë postuar aksidentalisht.

Për të përmbledhur, në fillim të kësaj jave gjigandi i transmetimit zbuloi se pajisjet që përdorin një llogari Netflix do të duhej të identifikoheshin në rrjetin e tyre “home” çdo 30 ditë, përndryshe llogaria do të bllokohej. Duke përditësuar faqen e qendrës së ndihmës, platforma vuri në dukje se një "llogari Netflix është për njerëzit që jetojnë së bashku në një familje të vetme" duke shtuar se "njerëzit që nuk jetojnë në shtëpinë tuaj do të duhet të përdorin llogarinë e tyre për të parë Netflix".

Në thelb, duke gjurmuar informacionin përmes adresave IP, ID-ve të pajisjes dhe aktivitetit të llogarisë, Netflix planifikoi të përcaktonte se cilët përdorues po identifikoheshin nga vende të ndryshme dhe për këtë arsye të ndërhynte nëse besonte se llogaria po përdorej nga një anëtar jo-familjar.

Çuditërisht, lëvizja nuk u prit mirë nga abonentët e Netflixit, me shumë njerëz që u drejtuan në mediat sociale për të kundërshtuar rregullat e reja – veçanërisht gjatë një krize të kostos së jetesës. “Ky rregull i ri kundër ndarjes së fjalëkalimeve Netflix është kaq pa kuptim. Po studentët? Po njerëzit që udhëtojnë”, shkroi një person në Twitter.

Tani, Netflix ka thënë se rregullat e tij të reja janë postuar gabimisht.