Elon Musk ka thënë se pret që një çip truri i zhvilluar nga kompania e tij e teknologjisë shëndetësore të fillojë provat njerëzore në gjashtë muajt e ardhshëm.
Gjatë një prezantimi nga kompania e tij “Neuralink”, Musku ka dhënë përditësime mbi çipin e trurit me valë. Përveç parashikimit të provave klinike, Musku tha se planifikon të marrë vetë një nga çipat.
“Ne duam të jemi jashtëzakonisht të kujdesshëm dhe të sigurt se do të funksionojë mirë përpara se të vendosim një pajisje te njeriu”, ka deklaruar Musku, raportoi Reuters.
“Neuralink” thotë se po zhvillon ndërfaqe të çipit të trurit që mund të rivendosin shikimin e një personi, madje edhe te ata që kanë lindur të verbër, dhe të rivendosin "funksionalitetin e plotë të trupit", duke përfshirë lëvizjen dhe komunikimin verbal, për njerëzit me palcë të prerë kurrizore, raportoi CNBC.
Ndërfaqja e çipit mund të testohet te njerëzit pas gjashtë muajsh, tha kompania.
Kompania nuk ka leje nga Administrata e Ushqimit dhe Barnave (FDA) për të shitur pajisjen, por Musku ka thënë se shumica e dokumenteve të FDA-së për miratim për të implantuar pajisjen në qenie njerëzore tashmë janë dorëzuar.
“Neuralink” i ka bërë testet e para në kafshë ndërsa pret miratimin për provat klinike te njerëzit.
© KOHA. Të gjitha të drejtat janë të rezervuara.
