MSN shkruan se përdoruesit nuk do të jenë më në gjendje të hyjnë në Messenger, aplikacioni për biseda, nëse nuk kanë një llogari në rrjetin social Facebook.
Në vitin 2015, Facebooku lejoi përdoruesit e mundshëm të hynin në aplikacion duke përdorur vetëm një numër telefoni. Tani thuhet se përdoruesit “duhet të hapin një llogari në Facebook për të përdorur Messengerin”.
Facebooku konfirmoi ndryshimin në “VentureBeat”, duke sqaruar se “shumica e përdoruesve që përdorin Messenger tanimë hyjnë në Facebook” dhe se ata thjesht duan “të thjeshtojnë procesin”.
Një zëdhënës thotë se rregulli i ri vlen edhe për ata që janë “të ri në Messenger” dhe se ata që përdorin tashmë aplikacionin përmes llogarisë së tyre nuk duhet të bëjnë asgjë. Sidoqoftë, disa përdorues u ankuan se kishin probleme për t’u regjistruar pasi aplikacioni raportonte se kishte një kufizim në llogarinë e tyre.
Është e paqartë nëse ndryshimi do të ketë ndonjë ndikim në planet e Facebookut për t’i bërë aplikacionet e tij të bisedave më të ndërveprueshme. Ky opsion do të thotë që përdoruesit mund të dërgojnë mesazhe përmes Messengerit, Instagramit dhe WhatsAppit./ksp
