Trajneri Xavi Hernandez pritet së shpejti të firmosë kontratë të re me Barcelonan, ka njoftuar “Mundo Deportivo” të mërkurën. Bëhet e ditur se klubi tashmë i ka bërë ofertë Xavit, të cilit ia ka ofruar kontratën e re për ta mbajtur në krye të ekipit deri në verën e vitit 2026.
Negociatat mes palëve po shkojnë mirë dhe marrëveshja mund të bëhet zyrtare në përfundim të këtij sezoni. Kontrata aktuale i skadon Xavit vitin tjetër, por në klub janë të kënaqur me punën e tij dhe duan ta mbajnë edhe më gjatë në “Camp Nou”.
Xavi është trajner i Barcelonës prej nëntorit të vitit 2021, ndërsa këtë edicion po e udhëheq ekipin drejt titullit të kampionit në La Liga. Ky do të jetë titulli i parë i Barcelonas që nga viti 2019. Po ashtu, nën drejtimin e Xavit, Barça e ka fituar edhe Superkupën e Spanjës këtë sezon.
