Volejbollistët e rinj të Kosovës e kanë nisur me humbje të thellë Kampionatin Ballkanik. Të martën pasdite në Tiranë, Kosova U19 pësoi 3:0 në sete nga Turqia.
Turqia U19 nisi furishëm, duke udhëhequr në setin e parë me rezultat 11:0. Dominimi i turqve vazhdoi, që setin e parë e fituan shumë thellë, 25:5.
Rrjedhë të ngjashme kishte edhe seti i dytë që përfundoi 25:10 për Turqinë. Ndërkohë në setin e tretë Kosova ia doli të fitoi 14 pikë, por prapë pa rivalizuar kundërshtarin.
Turqit ishin superiorë në të gjitha elementet e lojës. Ishin më shtatlartë e po ashtu më të përgatitur teknikisht e taktikisht. Dhe si rrjedhojë Kosova pësoi humbje të thellë.
Kosova është në grupin B, ku bën pjesë edhe Moldavia. Me Moldavinë, Kosova takohet të enjten prej orës 15:30.
Në grupin A janë Shqipëria, Bosnjë-Hercegovina dhe Rumania. Grupi C përbëhet nga Bullgaria, Greqia e Serbia.
Edhe
Humbje të reja për përfaqësueset e Kosovës në Ballkanik
Ndërkohë volejbollistet e Kosovës U19 po marrin pjesë në Kampionatin Ballkanik në Sofje. Të hënën e luajtën ndeshjen e parë, ndërsa pësuan 3:0 nga Mali i Zi. Seti i parë përfundoi 25:18 për Malin e Zi, ndërsa seti i dytë 25:19. Më mirë volejbollistet e reja të Kosovës u mbajtën në setin e tretë, që përfundoi 25:23.
Ndeshjen e ardhshme volejbollistet e Kosovës U19 e luajnë të mërkurën prej orës 18:30. Takohen me Bullgarinë.
