Trajneri nga Kroacia, Vladimir Krstiq ka debutuar në mënyrën më të mirë të mundshme në krye të KB Vëllaznimit. Në ndeshjen e parë nën drejtimin e tij, Vëllaznimi ka shënuar fitore në Superligën e Kosovës, duke i dhënë fund serisë prej tri humbjeve. Të dielën, në palestrën “Shani Nushi” në Gjakovë, Bashkimi triumfoi bindshëm ndaj Proton Cable Prizrenit, duke e mposhtur me shifrat 86:70 në kuadër të xhiros së 17-të.
Me këtë fitore, Vëllaznimi është forcuar në pozitën e pestë në tabelë me 25 pikë, tri më shumë se Proton Cable Prizreni që mbetet i parafundit në tabelë. Skuadra gjakovare ishte dukshëm më e mirë se ajo nga Prizreni gjatë tërë ndeshjes.
Vëllaznimi i fitoi të gjithë çerekët, ndërsa dallimin e bëri në periudhën e dytë dhe të tretë të ndeshjes. Çerekun e parë dhe të fundit, i mbylli me nga një pikë epërsi – 22:16 dhe 18:17.
Në çerekun e dytë, Vëllaznimi shënoi 20 pikë dhe limitoi Prizrenin në vetëm 13 sosh, ndërsa të tretin e fitoi me shifrat 26:19. Amerikani Samuel Sessoms ishte më i dalluari te Vëllaznimi, duke e mbyllur ndeshjen me 23 pikë, 9 kërcime e po aq asistime, ndërsa me lojë të mirë u veçua edhe Jordan Dallas (13 pikë, 8 kërcime). Krahas trajnerit Krstiq, te Vëllaznimi në këtë ndeshje debutoi edhe Daniel Lekndrejaj, i cili është huazuar nga Sigal Prishtina. Për 22 minuta lojë në parket, Lekndrejaj pati 12 pikë e 9 kërcime. Në anën tjetër, te Prizreni më efikasi ishte Desi Sills me 16 pikë të realizuara.