Ka vdekur të mërkurën Muhamet Alaj, profesori nga Deçani që ka dhënë kontribut të madh për sportin, përkatësisht hendbollin.
Alaj ka vdekur në moshën 83-vjeçare, ndërsa ishte hendbollist i dalluar i Normalistit të Prishtinës e më pas trajner i hendbollit.
Alaj ka qenë edhe selektor i Kosovës, ndërsa është vlerësuar sinonim i hendbollit në Deçan. “Ai ka lënë vepër të jashtëzakonshme për hendbollin dhe sportin kosovar në përgjithësi, por edhe sa i takon arsimimit të brezave dhe dokumentimit të historisë sportive”, ka shkruar FHK-ja. Alaj ka kontribuar edhe në pavarësimin e sportit kosovar, ndërsa ishte pjesë e hendbollit deri në ditët e fundit të jetës. Ka mbajtur pozita të shumta drejtuese gjatë dekadave në hendbollin kosovar. Ka publikuar edhe disa libra.
