Trajneri i Interit, Simone Inzaghi, pret “luftë deri në ndeshjen e fundit”, derisa skuadrat e tjera në garë për titull, Milani dhe Napoli, janë në rrugë të mbarë po ashtu për të triumfuar.
Fitorja 3:0 ndaj Milanit në “San Siro” e dërgoi Interin në finalen e parë të Kupës së Italisë që prej vitit 2011, duke e mbushur me plot shpresa Inzaghin që të shpresojë në të dy trofetë, në sezonin e tij të parë.
Kampioni në fuqi, Interi, ka 71 pikë, dy më pak se Milani lider, ndërsa Napoli është i treti me 67 pikë. Napoli barazoi me Romën të hënën, duke pranuar golin e barazimit në minutat shtesë.
Pasi zbehu shpresat e Napolit për titull kampioni në 32 vjet, Roma do të provojë të bëj të njëjtën gjë edhe ndaj Interit, para gjysmëfinales së parë në Ligën e Konferencës kundër Leicester Cityt. Inter – Roma luhet të shtunën 18:00 dhe i takon xhiros së 34-të në elitën e futbollit italian.
Skuadra e Romës nuk di për humbje në 12 ndeshjet e fundit dhe është duke tentuar të zë vend që dërgon në Ligën e Kampionëve. Ka pesë pikë më pak se vendi i katërt, Juventusi, kur kanë mbetur edhe pesë ndeshje deri në fund të Kampionatit.
Milani të dielën në orën 20:45 udhëton në kryeqytet për t’u ballafaquar me Lazion, që e ka golashënuesin më të mirë të ligës. Ciro Immobile bëhet italiani i parë që shënon të paktën 25 gola në tri kampanja të ndryshme të Serie A.
Skuadra që drejtohet nga trajneri Stefano Pioli, e kërkon “Scudetton” e parë që prej vitit 2011.
Napoli do të luajë në udhëtim kundër Empolit të dielën në orën 15:00, ndërsa Juventusi e mbyll xhiron 34-të me ndeshjen në udhëtim te Sassuolo.