Trepça mbahet mirë në ndeshjen e parë, jo edhe në të dytën

Dy ndeshje evropiane janë luajtur në fundjavë në palestrën “Minatori” në Mitrovicë. Bëhet fjalë për ndeshje të rundit të parë të Kupës Evropiane në hendboll, që është niveli i tretë i garave kontinentale.

Derisa ndeshja e parë ishte e barabartë për 55 minuta, ndeshja e dytë u dominua nga skuadra mysafire nga Izraeli. Është skuadra Holon Yuvalim që ka eliminuar Trepçën e Mitrovicës në rundin e parë të Kupës Evropiane.

Ndeshjen e parë, të shtunën mbrëma, Holoni e fitoi me shifrat 29:22. Por, epërsia prej shtatë golave u krijua vetëm në pesë minutat e fundit të takimit. Në të vërtetë, izraelitët kanë udhëhequr vazhdimisht me një e dy gola, por Trepça ishte në lojë. Në fund “xehetarët” mbetën pa forcë dhe Holoni fitoi bindshëm.

Portieri Meriton Lladrovci me 12 pritje dhe pivoti Sali Maxhera me 9 gola nga 11 tentime, u dalluan te Trepça në ndeshjen e parë.

Humbja me shtatë gola dallim linte pak shpresë për ndeshjen e dytë, që u luajt të dielën nga ora 13:00. Ndeshja e dytë filloi mirë për Trepçën që krijoi epërsi 3:0. Në epërsi vendasit ishin deri në minutën e dhjetë (5:4), por më pas erdhi në shprehje përgatitja fizike e skuadrës izraelite, por edhe niveli i lojtarëve të saj. Epërsia e Holonit ishte vazhdimisht e lartë, ndërsa rezultati në fund ishte 37:25.
Me dy fitore, Holoni avancon në rundin e dytë. Te skuadra mitrovicase kanë vlerësuar paraqitjen në ndeshjen e parë, sidomos luftën e lojtarëve për ngjyrat e fanellës. Ndërkohë, humbjen e dytë e kanë arsyetuar me nivelin jo të duhur fizik të lojtarëve.

“Ndeshja e parë ishte mirë. Kishim mundësi të barazojmë rezultatin, por në momentet vendimtare nuk kishim koncentrimin e duhur. Vlen të ceket se djemtë gjelbër e zi e dhanë maksimumin dhe jam i kënaqur me angazhimin”, ka thënë trajneri i Trepçës, Taib Kabashi.

“Në ndeshjen e dytë fillimin e kishim të mirë. Ishim 3:0 e më pas 6:6. Por mendoj se lodhja nga ndeshja e parë ndikoi në ndeshjen e dytë. Mysafirët ishin më të mirë në përgjithësi. Në pjesën e parë izraelitët kishin epërsi të thelë, ndërsa pjesa e dytë ishte më e barabartë”, ka shtuar Kabashi.

Dy ndeshje evropiane në një fundjavë ishin të papërballueshme për lojtarët e skuadrës mitrovicase. Trepça kishte edhe tre lojtarë të huazuar nga Prishtina. Ndërkohë, izraelitët kishin dy lojtarë nga Serbia e një nga Nigeria që në fakt edhe e kanë bërë dallimin.

Agon Bajqinovci ishte më efikasi te Trepça të dielën me 9 gola të shënuar nga 13 tentime. Katër gola nga pesë tentime i kishte Vlerson Zherka, ndërsa Sali Maxhera shënoi tre gola nga pesë tentime. Portieri Meriton Lladrovci bëri tetë pritje.

Skuadra izraelite në pjesën e dytë aktivizoi lojtarët zëvendësues, por nuk pati telashe për ta mbajtur epërsinë.

Kështu në rundin e dytë të Kupës Evropiane paraqitet vetëm kampionia, Besa Famgas. Besa e nis garimin nga rundi i dytë. Pos Trepçës në raundin e parë u ndal edhe Vëllaznimi, që i humbi dy ndeshje të luajtura në Luksemburg. Prishtina hoqi dorë nga ndeshjet me një skuadër austriake dhe u eliminua pa lojë.