Triumfi në kupën e vendit, promovimi në elitë, debutimi në garat evropiane dhe sfida për titullin e kampionit në tre edicione – mund të konsiderohet si një periudhë e suksesshme sipas të gjitha standardeve të një ekipi futbolli.
Në fakt, kjo është e gjithë historia e Sporting Fingal FC, një ekip irlandez që u shua aq shpejt sa arriti, shkruan BBC, transmeton KOHA. Vetëm 965 ditë i ndanë ndeshjet e para dhe të fundit të një ekipi që u krijua si klub i komunitetit pas një takim rasti me Niall Quinnin dhe një anëtar të këshillit të qarkut.
Liam Buckley – trajneri i vetëm i Sporting Fingal – dhe sekretari John O’Brien ndihmuan në themelimin dhe ngritjen e klubit. Shaun Williams, i cili tash është reprezentues i Republikës së Irlandës luajti për Sporting Fingal dy sezone, kurse Ger O’Brien, vajza e të cilit lindi në ditën që klubi u shua, ishte pjesë e ekipit në edicionin final. Ata shpjegojnë se si klubi kishte nisur nga zeroja dhe si gjithçka u prish brenda dy javëve.
Si filloi gjithçka
John O’Brien ishte duke punuar me Këshillin e Qarkut në Fingal kur u takua me kryetarin e atëhershëm të ekipit anglez, Sunderland, Niall Quinn për një projekt të komunitetit.
Me anë të një “bisede rastësore”, ai përmendi që Fingal - i cili ndodhet rreth 24 kilometra në veri të qendrës së qytetit të Dublinit - ishte një zonë me rritje të shpejtë me një popullsi të re prej 300 mijë banorëve dhe do të ishte mirë sikur të kishin një ekip futbolli. Quinn e vendosi O’Brienin në kontakt me ish-reprezentuesin e Republikës së Irlandës, Buckley, i cili kishte një ide të ngjashme kur ishte menaxher i skuadrës Shamrock Rovers.
