-
Nga:
Associated Press
- 24 janar 2022 12:18
- Shpërndaje në:
Brod, 24 janar (AP) – Paraqitja në sllallomin e madh në Lojërat Olimpike Dimërore “Pekini 2022” do të jetë një hap gjigant për 17-vjeçaren Kiana Kryeziu dhe vendin e saj, Kosovën. Kryeziu është sportistja e parë nga Kosova në Lojërat Olimpike Dimërore, pasi ka arritur normën kualifikuese gjatë garave të zhvilluara në Itali.
“Me të vërtetë nuk e prisja që do të ndodhte kaq herët”, tha Kryeziu. “Ishte një nga synimet e mia më të mëdha. Ishte një nga ëndrrat e mia dhe tani gjithçka po bëhet realitet.”
Aspak nuk ka qenë e lehtë, tha ajo, duke përmendur stërvitjet e vështira, si dhe gjetjen e parave për një sport të shtrenjtë. Kryeziu mbështetjen e saj kryesore financiare e ka pasur nga sponsorët, por është mirënjohëse edhe për ndihmën që i kanë dhënë Federata Skitare e Kosovës, Komiteti Olimpik i Kosovës dhe Ministria e Sportit. Po aq e rëndësishme, “vetëm një telefonatë larg” ishte mbështetja e babait dhe trajnerit të saj.
“Pjesëmarrja e saj në Olimpiadë është arritja më e madhe dhe kushedi çdo rezultat i mirë është i mundur”, tha trajneri i saj, Agim Pupovci.
Kryeziu ka filluar të garojë si skiatore rreth moshës dhjetë apo 11-vjeçare.
“Dhe pastaj bie në dashuri me këtë sport”, tha Kryeziu, duke e quajtur atë “pasion dhe lumturi” që nga atëherë.
Babai i saj, i cili është një fotograf, e pa potencialin.
“E pashë që nëse investoja 10 për qind të kohës për të, kthimi ishte 110 për qind”, tha Visar Kryeziu. “Sekreti pas kësaj është shumë punë, shumë përkushtim, pasioni për sportin dhe përkushtimi.”
Trajnimi i saj mbaroi buxhetin e familjes, por mbështetja financiare nga sponsorët e lejoi atë të stërvitej në Austri dhe Itali vitin e kaluar. Ambicia e Kryeziut është që në Pekin të përfundojë jo më shumë se dhjetë sekonda prapa fituesit. Lojërat Olimpike Dimërore te Pekinit fillojnë në shkurt.
Adoleshentja tha se qau kur Majlinda Kelmendi (Rio de Janeiro 2016) dhe Nora Gjakova e Distria Krasniqi (Tokio 2020) fituan medaljet e arta olimpike në xhudo për Kosovën. Kosova u bë anëtare e Komitetit Olimpik Ndërkombëtar në vitin 2014. Pas konfliktit të viteve 1998-99, që vrau rreth 13.000 njerëz dhe përfundoi pasi NATO-ja bombardoi Serbinë për të ndaluar goditjen e saj ndaj shqiptarëve etnikë, Kosova fillimisht u qeveris nga Kombet e Bashkuara dhe në vitin 2008 shpalli Pavarësinë e saj. Nuk njihet nga Serbia. Kryeziu është në vitin e fundit të shkollës së mesme.
“Shkolla, sporti, jeta familjare dhe shoqërore, është shumë e vështirë”, tha ajo, por “duket se kam arritur të gjej ekuilibrin e përsosur”.