Ndikimi i skuadrave shqiptare në kampionatin e Maqedonisë së Veriut, sa shkon e rritet. Kjo fundjavë vetëm e dëshmon këtë. Të gjitha katër skuadrat shqiptarë në Ligën e Parë të vendit fqinj i kanë fituar ndeshjet e xhiros së 28-të.
Dhe tri prej katër skuadrave të kreut të tabelës janë shqiptare.
Shkëndija e Tetovës shquhet natyrisht. Klubi tetovar duket i pandalshëm në rrugëtimin për të fituar titullin e kampionit, të katërtin në histori.
Shkëndija të dielën fitoi bindshëm, 3:0 në udhëtim ndaj Belasicës për t’u forcuar tutje në vendin e parë në tabelë. Shkëndija tani i ka 65 pikë, plot 13 më shumë se përcjellësi i parë, Shkupi.
Rubin Hebaj shënoi golin e parë të Shkëndijës. Për 2:0 realizoi Valmir Nafiu, ndërsa Kamer Qaka shënoi në pjesën e dytë për rezultatin përfundimtar.
Për Shkëndijën ishte fitorja e gjashtë rresht, ndërsa ka mbetur vetëm që të konfirmohet titulli i kampionit për tetovarët. Shkëndija ka fituar titullin e kampionit edhe në vitin 2011 e po ashtu në vitet 2018 e 2019.
Fitore në udhëtim shënoi edhe Shkupi. Skuadra shkupjane fitoi 1:0 ndaj Borecit me golin e Netos. Shkupi as këtë edicion nuk ia doli të rivalizojë Shkëndijën në garën për titull të kampionit, por qëndron dukshëm më mirë se skuadrat tjera.
Edhe
Garë shqiptare për titull në Maqedoni të Veriut
Struga po konfirmohet si skuadër e pjesës së epërme dhe me synime gjithnjë e më të mëdha. Struganët të dielën fituan 3:0 në shtëpi ndaj Pelisterit. Emir Skenderi, Marjan Altiparmakovski dhe Flamur Tairi shënuan për fitoren e thellë.
Struga është e katërta me 44 pikë. Ndërkohë Renova të shtunën mori pikë jetike në garën për mbetje në elitë. Fitoi 2:1 ndaj Sileksit me golat e Shefit Shefitit dhe Faton Jusufit. Renova tani është e nënta me 31 pikë, dy më shumë se Sileksi dhe tri më shumë se Vardari që është i parafundit. Dy pozitat e fundit dërgojnë në kategorinë e dytë, ndërsa pozitat nëntë e dhjetë në barazh. Renova e Tetovës synon vendin e tetë që siguron mbetjen në elitë. Aktualisht i teti është Boreci me 33 pikë.
Deri në fund të edicionit janë edhe pesë xhiro. Me shumë mundësi tri skuadra shqiptare do ta përfaqësojnë Maqedoninë e Veriut në garat evropiane edicionin e ardhshëm. Shkëndija do të luajë në Champions.
