Aarau ka triumfuar në udhëtim te Wili të premten mbrëma, ndeshje kjo që mund të vlerësohet si duel i shqiptarëve.
Ishte ndeshje që i takoi xhiros së 28-të të “Challenge League”, apo kategoria e dytë e futbollit zviceran, ndërsa Aarau mysafir, fitoi 4:3.
Kontribut në fitore dha Donat Rrudhani që shënoi tre gola, kurse Shkëlqim Vladi kontribuoi me një tjetër.
Vladi shënoi në minutën e 16-të, ndërsa Rrudhani e kompletoi “hat-trickun” pasi realizoi në minutat 28’, 59’ dhe 69’.
Në tri golat e vendësve kontribut dhanë shqiptarët po ashtu. Mërgim Brahimi asistoi në golin e parë në minutën e dytë, Valon Fazliu shënoi në minutën e 18-të, me asistimin e Lavdim Zumberit. Zumberi asistoi edhe në minutën e 44-t.
Te Aarau titullar ishin edhe Imran Bunjaku e Liridon Balaj, kurse si zëvendësues u inkuadruan edhe Milot Avdyli dhe Shkëlzen Gashi. Në stol ishin Binjamin Hasani dhe Arijan Qollaku.
Në stol te Wili ishte Luan Abazi.
Aarau është lider pas 28 xhirove me 50 pikë, kurse Wili është i teti me 36 pikë.
Në ndeshjen tjetër ndërmjet Schaffhausenit dhe Xamaxit, vendësit fituan me rezultatin 2:1.
Uran Bislimi e shënoi golin e parë te fituesit në minutën e 47-të.