-
Nga:
Arsim Maxhera
- 26 mars 2023 22:10
- Shpërndaje në:
Duhet të kthehemi disa vjet prapa për të gjetur garën e fundit të xhudos në të cilën Kosova mori pjesë e nuk fitoi medalje. Xhudistët e Kosovës janë në seri impresive e cila vazhdoi këtë javë në Grand Slamin në Tbilisi të Gjeorgjisë.
Atje Kosova mori pjesë me gjashtë xhudiste, ndërsa tri prej tyre fituan medalje të argjendta. Në ditën e parë, të premten, deri në finale arritën kampionet olimpike, Distria Krasniqi e Nora Gjakova. Të shtunën medalje të argjendtë fitoi edhe Laura Fazliu. Ndërkohë, Loriana Kuka, Flaka Loxha e Erza Muminoviq nuk fituan medalje.
Suksesi ka mundur të jetë edhe më i madh sikur gjyqtarët të kishin vlerësim pak më korrekt në finalet e Norës dhe Laurës. Në Federatën e Xhudos së Kosovës ndiejnë se këto dy xhudiste janë dëmtuar në luftërat finale.
“Finalja e Norës përfundoi me dënime dhe si gjithmonë referët po kujdesen që luftërat e barabarta të shohin fituese kundërshtaret. Kundërshtarja e Norës gjatë gjithë luftës vetëm ka bllokuar dhe duhej të dënohej. Por ndodhi e kundërta”, ka shkruar trajneri i Kosovës në xhudo, Driton Kuka.
Ai vlerëson se edhe Laura u dëmtua. Kundërshtarja e saj bëri sulme të rrejshme dhe në fund Laura mori dënimin e tretë.
“Rezultati megjithatë, është shumë i mirë. Tri medalje të argjendta në kohën kur forma nuk është më e mira. Xhudistet tona janë të lodhura për shkak të ngarkesës në kampin e mbajtur së fundi. Formën më të mirë e presim në Botëror”, ka thënë Kuka për KOHËN.
Distria Krasniqi ka qenë e sëmurë në dy netët para garës, por ka vendosur të luftojë. Dhe ka vazhduar me formë të lartë.
Edhe
Xhudoja kosovare mban nivelin superior, synohet edhe më shumë
“Ajo që e kemi ditur është se prezenca në Tbilisi nënkupton medalje. Për të qenë të bindur për këtë, vetëm kemi shikuar bilancin e saj. Ajo ka fituar medalje në jo më pak se nëntë gara rresht”, ka shkruar IJF. Në fakt janë dhjetë gara tashmë që Distria fiton rregullisht medalje.
Javën e ardhshme mbahet Grand Slami në Antalya të Turqisë. Pritet kthimi i Akil Gjakovës.
Më pas i gjithë fokusi do të jetë te Botëror që prej 7 deri më 13 maj mbahet në Doha të Katarit. Natyrisht, synimi do të jetë vazhdimi i serisë impresive të fitimit të medaljeve.
