Fillimi i vështirë i jetës së Lionel Messit te Paris Saint-Germaini ka hasur në pengesa të reja, me tifozët e klubit francez që të hënën kanë shkruar mesazhe në qendrën stërvitore të skuadrës për të shprehur zhgënjimin e tyre.
Në mesazhet e tifozëve të klubit shkruhej edhe për largimin e Messit, i cili u transferua me bujë të madhe te PSG-ja para fillimit të këtij edicioni si lojtar i lirë. Po ashtu Messi ishte ndër lojtarët më të urryer në duelin kundër Bordeauxit, të dielën mbrëma. Ai sa herë që e prekte topin vërshëllehej nga tifozët parisienë që aspak nuk janë të kënaqur me kontributin e argjentinasit. E gjithë kjo situatë ka ardhur si pasojë e eliminimit të PSG-së në 1/8 e finales të Ligës së Kampionëve nga Real Madridi. Në fakt Messi, që ka fituar shtatë herë “Topin e Artë”, nuk e ka pasur aspak të lehtë fillimin te PSG-ja.
Më poshtë paraqesim disa prej momenteve kryesore të periudhës së Messit te Parisi.
Goli i parë kundër Cityt
Messi e shënoi golin e tij të parë me fanellën e PSG-së në ndeshjen e parë të madhe të këtij edicioni kundër Manchester Cityt. Ai kishte dështuar të shënonte në tri paraqitjet e para te PSG-ja, por golin e parë në stadiumin “Parc des Princes” e shënoi me klasë. Pas një aksioni të shpejtë nga qendra e fushës, Messi bëri një bashkëveprim me Kylian Mbappen përpara se me një gjuajtje perfekte të shënonte golin e parë.
Edhe
Messi mburret me karrierën, flet për raportet me tifozët parisienë
Magjia kundër Leipzigut
Momentet më të mira të Messit për PSG-në kanë ardhur në Ligën e Kampionëve, pavarësisht eliminimit të hershëm të ekipit francez. Kishte raste kur dukej se kampanja e parisienëve mund të përfundonte edhe më shpejt, si për shembull kur ishin në disavantazh ndaj RB Leipzigut në duelin e luajtur në shtëpi në fazën e grupeve. Por Messi shënoi dy gola në shtatë minuta të pjesës së dytë, për t’ia siguruar Parisit fitoren 3:2.
“Hat-tricku” i asistimeve
Kur argjentinasi iu bashkua PSG-së shumica e njerëzve nuk do të prisnin që ai t’i bënte tri asistime në një ndeshje të Ligue 1. E një gjë të tillë Messi e bëri ndaj Saint-Etiennet, ku pati një paraqitje fantastike dhe bëri tri asistime. Në fakt, Messi ka më së shumti asistime në kampionatin francez, dhjetë.
Pritja e gjatë për gol në kampionat
Messi duhej të priste deri në muajin nëntor për të shënuar golin e parë në ligë për PSG-në. Më në fund goli i tij i parë erdhi në fitoren 3:1 në shtëpi ndaj Nantesit, pasi ai nuk arriti të shënonte në katër ndeshjet e para të Ligue 1, kundër Reimsit, Rennesit, Marseillet dhe Lillet.
Edhe
Messi përshëndetet me humbje nga PSG-ja
Humbja e parë nga Rennesi
PSG-ja luftoi për gola në fillim të sezonit kur Messi ishte në skuadër dhe ky problem ishte i dukshëm në humbjen 2:0 në Rennes. Messi, Mbappe, Neymar dhe Angel Di Maria ishin startues, por ekipi i trajnerit Mauricio Pochettino nuk arriti të regjistrojë asnjë goditje në portë.
Eliminimi nga kupa
Fituesi në fuqi i Kupës së Francës, PSG-ja, u eliminua prej kësaj gare nga Nice. Ishte kjo ndeshja e parë që Messi ishte titullar pas infektimit me Covid-19 në Argjentinë. Pas barazimit të dytë pa gola mes skuadrave këtë sezon, portieri i huazuar Marcin Bulka bëri pritjen vendimtare për Nice kundër klubit të tij amë.
Humbja e penalltisë ndaj Realit
Megjithëse debakli i PSG-së në Ligën e Kampionëve për vitin 2022 do të mbahet mend më së shumti për kolapsin e ndeshjes së dytë në Madrid, penalltia e humbur e Messit në ndeshjen e parë ishte një moment i madh. Goditja e tij nga pika e bardhë u prit nga Thibaut Courtois në minutën e 62-të, por Parisi shënoi fitore 1:0 në këtë duel, falë golit të Kylian Mbappes.
Edhe
Messi iu bashkua Parisit me shumë bujë, largohet pas vërshëllimave dhe dënimit
Largimi nga Championsi
Sezonit të vështirë të Messit dhe PSG-së iu dha një goditje vrasëse në “Santiago Bernabeu”. Edhe pse ishte në epërsi 2:0 kur kishte mbetur më pak se gjysmë ore lojë, PSG-ja e humbi ndeshjen me rezultatin e përgjithshëm 3:2 pas “hat-trickut” të Karim Benzemas. Mënyra se si humbi gjiganti francez në këtë garë, solli kujtimet e humbjeve në 1/8 e finales të Championsit në vitet 2017 dhe 2019, kur u mposht nga Barcelona, përkatësisht Manchester Unitedi.
