-
Nga:
Associated Press
- 3 qershor 2022 17:42
- Shpërndaje në:
Real Madrid tha të premten se kërkon një shpjegim për shkaqet e kaosit që la tifozët e tij “të braktisur dhe të pambrojtur” në finalen e Ligës së Kampionëve. Thirrja e klubit për përgjigje erdhi gjashtë ditë pasi problemet ndodhën jashtë stadiumit “Stade de France” në periferi të Parisit, ku Reali Madridi fitoi titullin evropian duke mposhtur Liverpoolin 1:0.
“Ne bëjmë thirrje për përgjigje dhe shpjegime në mënyrë që të përcaktojmë ata që janë përgjegjës për lënien e tifozëve të braktisur dhe të pambrojtur”, tha Real Madridi në një deklaratë. “Tifozët që në terma të përgjithshëm treguan sjellje shembullore në çdo kohë”.
Klubi spanjoll vuri në dyshim vendimin për të zgjedhur Parisin periferik si një zëvendësim për qytetin rus të Shën Petersburgut, i cili fillimisht ishte planifikuar të priste finalen përpara se Rusia të pushtonte Ukrainën.
“Ne do të donim të dinim arsyet që çuan në zgjedhjen e këtij vendi për të pritur finalen dhe kriteret e përdorura, duke marrë parasysh përvojat e ditës”, tha Real Madridi.
Liverpool tashmë është ankuar për ata që ishin përfshirë në organizimin e ngjarjes menjëherë pas përfundimit të finales. Pjesa më e madhe e vëmendjes në atë kohë shkoi te problemet e qasjes në stadium me të cilat përballeshin tifozët e klubit anglez, por më vonë pati edhe raportime për telashe të njëjta edhe për mbështetësit e Realit. Klubi spanjoll bëri të ditur se është mërzitur nga dhuna që ndodhi jashtë stadiumit pas ndeshjes. Ai tha se “diçka që duhet të ishte një festival i mrekullueshëm futbolli” për tifozët “shpejt u shndërrua në një seri ngjarjesh fatkeqe që kanë shkaktuar një ndjenjë zemërimi në mbarë botën”.
Reali përmendi “imazhet zbuluese” të publikuara nga mediat që tregonin se disa mbështetës “sulmoheshin, ngacmoheshin dhe grabiteshin në mënyrë të dhunshme”.
“Këto dukuri vazhduan teksa lëviznin me makinat apo autobusët e tyre, duke shkaktuar shqetësim për mirëqenien e tyre fizike. Disa tifozë madje duhej të kalonin natën në spital si pasojë e lëndimeve”.
Autoritetet thanë se problemet pas ndeshjes ndodhën, sepse oficerët e policisë u zhvendosën më pranë portave të stadiumit për të ndihmuar në shpërndarjen e tifozëve, duke lënë zona të tjera pa mbikëqyrje.
Liverpooli tha se ka mbledhur më shumë se 5,000 dëshmi nga mbështetësit që udhëtuan në Francë. Shefi ekzekutiv i klubit, Billy Hogan tha se ai ishte “i tmerruar nga mënyra se si disa burra, gra, fëmijë - me trup të aftë, më pak të aftë - janë trajtuar pa dallim”.
Mbrojtësi i Real Madridit, Dani Carvajal, shtoi se ishte “një rrëmujë mjaft e madhe” për tifozët e klubit të tij dhe se siguria nuk ishte pronë e ofruar për tifozët apo të afërmit e lojtarëve para dhe pas ndeshjes.
Sipas Federatës së Futbollit të Francës (FFF), 35,000 njerëz pa bileta ose me bileta “false” u nisën për në “Stade de France”, duke krijuar kaos dhe duke bllokuar hyrjen në stadium, gjë që i pengonte tifozët që kishin bileta të vërteta të hynin brenda. Organi qeverisës i futbollit evropian, UEFA, ka filluar gjithashtu të mbledhë prova për çështjet që ndodhën jashtë stadiumit “Stade de France” që prishën një nga ngjarjet më të mëdha sportive në botë.
“Futbolli i ka transmetuar botës një imazh që është shumë larg vlerave dhe synimeve që duhet të ndjekë”, vazhdoi deklarata e Real Madridit. “Tifozët dhe mbështetësit tanë meritojnë një përgjigje dhe përgjegjësit duhet të mbajnë përgjegjësi në mënyrë që ngjarje si këto të zhduken nga futbolli dhe sporti në përgjithësi”.