Trajneri i Gjilanit, Zekirija Ramadani ka thënë se futbollistët e tij kanë arritur një fitore të mundshme të dielën ndaj Dukagjinit (1:0). Ai ka thënë se kjo fitore kthen motivin tek futbollistët për ndeshjet e ardhshme.
“I gëzohem shumë golit të Arbnor Ramadanit. Është një djalë që punon shumë dhe ka cilësi të bëj ndeshje të mëdha. I uroj lojtarëve këtë fitore mjaftë të mundimshme. Është meritë e jona që krijuam shumë raste shënimi në pjesën e parë, ndërsa në pjesën e dytë u vërejt një lodhje nga ana jonë. Uroj të kemi brenda javës një kontingjent të plotë të lojtarëve, pasi tashmë na mungon edhe Arbnori për shkak të përjashtimit. Të jepen dy kartonë brenda një minute është pak e dyshimtë”, ka thënë Ramadani, që është kthyer në stolin e Gjilanit. Ai mungoi javën e kaluar për shkak të helmimit.
Por, Ramadani beson se Gjilani ka forcë për ta përfunduar këtë edicion në tre pozitat e para.
“Ne e kemi vendosur si objektiv që të luftojmë dhe në fund ta ruajmë këtë vend për të qenë më tërheqës për ndonjë donator të ri. Kur je poshtë nuk je tërheqës për donatorët. Do të mundohemi ta japim maksimumin, pasi na presin disa ndeshje të vështira, por kjo fitore do ta ndihmoj shumë ekipin nga ana psikologjike”, është shprehur Ramadani.
