Pati vështirësi me Dritën, por kundërshtari i Ballkanit po kalon formë të lartë

Skuadra e madhe çeke, Viktoria Plzen, është kundërshtarja e parë e Ballkanit në fazën grupore të Ligës së Konferencës. Kampioni i Kosovës për herë të dytë luan në grupet e Ligës së Konferencës, ndërsa grupin sërish e ka shumë sfidues.

Ndeshja Viktoria Plzen – Ballkani zhvillohet të enjten prej orës 21:00 në “Doosan Arena” në Plzen.

Më 3 gusht, Plzeni kishte luajtur në “Fadil Vokrri” dhe kishte fituar me shumë vështirësi ndaj Dritës së Gjilanit. Triumfoi 2:1 me gol shumë të vonshëm. Drita kishte nxjerrë barazim pa gola në Plzen më 27 korrik dhe kishte shfaqur nivel të lartë në të dy ndeshjet, duke i shkaktuar shumë vështirësi Plzenit.

Por skuadra çeke është rritur shumë prej atëherë, sa u takon rezultateve. Pas ndeshjes në Prishtinë i ka fituar të gjitha nëntë ndeshjet zyrtare. Dritën e kishte eliminuar në raundin e dytë kualifikuese të Ligës së Konferencës. Në raundin e tretë e eliminoi Gzira Unitedin e Maltës, duke e mposhtur në dy ndeshjet. Tobolin e Kazakistanit e eliminoi në plejof të Ligës së Konferencës, po ashtu me dy fitore.

I ka fituar edhe pesë ndeshjet e fundit në kuadër të kampionatit të Çekisë. Në fundjavë fitoi 7:1 në udhëtim ndaj Zlinit. Aktualisht e mban pozitën e katërt në tabelë me 16 pikë nga shtatë ndeshje. Në nismë të kampionatit kishte një humbje e një barazim, por më pas rreshtoi fitoret.

Viktoria Plzeni është favorit i madh ndaj Ballkanit. Por klubi suharekas tashmë ka përvojën e ndeshjeve të forta ndërkombëtare dhe do të kërkojë pikët në Çeki.

Edhe Sport 29 nën 2023 Plzeni ka siguruar kualifikimin, por udhëtoi për fitore në Tiranë

Plzeni ka përvojë të gjatë edhe në Champions. Së fundi në fazën grupore të Ligës së Kampionëve ishte edicionin e kaluar. Ishte në grupin më të vështirë, me Bayernin, Interin dhe Barcelonën. I humbi të gjitha gjashtë ndeshjet, por paraqitja në Champions dëshmon për nivelin e kundërshtarit të ardhshëm të Ballkanit.

“I ftoj të gjithë tifozët në ndeshjen e së enjtes. Do të jetë me rëndësi të nisim garën në mënyrën më të mirë të mundshme dhe tifozët përfundimisht do të jenë ndihmë e madhe për ne. Besoj se ‘Doosan Arena’ do të jetë e mbushur”, ka thënë kapiteni i Plzenit, Lukas Hejda.

Ndërkohë Ballkani të martën kompletoi stërvitjet në Suharekë. Të mërkurën udhëton për në Plzen, ku zhvillon edhe një stërvitje para ndeshjes së vështirë të së enjtes.