Nga fitorja me fat ndaj Letonisë te rivalizimi i fuqishëm i përfaqësueseve të mëdha

Me shumë fat kishte fituar Kosova ndaj Letonisë inferiore më 13 nëntor të vitit 2017. Besar Halimi kishte shënuar golin e fitores 4:3, në minutën e 94-t, pasi Elbasan Rashani barazoi shifrat në minutën e 86-të.

Ishte vlerësuar fitore e madhe për mënyrën se si u arrit, por edhe për faktin se po i jepej fund një serie të gjatë të humbjeve, që kishte shkuar në nëntë ndeshje. Ishte shpresuar pas asaj ndeshjeje në Mitrovicë, që fitorja do të jetë pikë kthese në rrugëtimin e Kosovës. Por askush nuk e ka menduar që Kosova do të nisë seri të ndeshjeve pa humbje që po vazhdon ende, gati dy vjet pas.

Kishte shumë dobësi në lojën e Kosovës në atë takim me letonët, të cilët "dardanët" i kanë kaluar edhe në ranglistën e FIFA-s tashmë, shkruan sot Koha Ditore.

"Doli që ajo ndeshje të jetë pikë kthese. Pra ishte një ndeshje shumë e rëndësishme për rrugëtimin tonë", ka thënë Muharrem Sahiti, që kishte udhëhequr përfaqësuesen në atë takim. Sahiti tani është ndihmës i seleksionuesit Bernard Challandes.

Në atë kohë Kosovën nuk e llogariste askush në Evropë si kundërshtar serioz, aq më pak si pretendente për kualifikim në evropian, në pjesëmarrjen e parë në kualifikime. Situatë krejt ndryshe është dy vjet pas. Aq shumë është rritur Kosova saqë po rivalizon ekipe serioze evropiane, duke përfshirë edhe Danimarkën, Bullgarinë e Malin e Zi. Pritet të rivalizojë fuqishëm edhe Çekinë të shtunën e shpresohet për paraqitje të mirë edhe ndaj Anglisë tri ditë më pas.

(Artikullin e plotë mund ta lexoni në numrin e sotëm të Kohës Ditore)