-
Nga:
Associated Press
- 4 shtator 2023 21:26
- Shpërndaje në:
Cristiano Ronaldo, Neymar, Karim Benzema dhe klubet e tyre të futbollit nga Arabia Saudite do të luajnë në Iran për ndeshjet e Ligës së Kampionëve të Azisë këtë edicion, për shkak të përmirësimit të marrëdhënieve midis vendeve.
Konfederata Aziatike e Futbollit (AFC), vlerësoi të hënën “një marrëveshje novatore” midis federatave të futbollit - saudite dhe iraniane - që lejon ekipet e tyre të presin njëra-tjetrën në ndeshjet në shtëpi dhe udhëtim në vend që të kërkojnë terren neutral.
Al-Nassr, skuadra e Ronaldos, është planifikuar të luajë me Persepolisin në Teheran më 19 shtator. Ndeshja e kthimit më 27 nëntor do të luhet në Riad. Edicioni 2015 i Ligës së Kampionëve të Azisë, ishte hera e fundit që skuadrat saudite dhe iraniane u përballën me njëra-tjetrën në terrenin shtëpiak në fazën e grupeve ose në raundet e eliminimit. Tensionet e gjata diplomatike midis dy vendeve po zbuten dhe ministri i jashtëm i Iranit, Hossein Amirabdollahian, shkoi në Arabinë Saudite muajin e kaluar për vizitën e parë të tillë në tetë vjet. Që kur vendimi i AFC-së, për përdorimin e vendeve neutrale hyri në fuqi në vitin 2016, klubet saudite dhe iraniane në Championsin e Azisë përdorën stadiumet në Dubai dhe Doha. Skuadrat iraniane luajtën në qytetet saudite gjatë pandemisë COVID-19, kur stadiumet e vetme ishin që përdoreshin për ndeshje midis ekipeve nga shumë vende, nën rregulla të rrepta shëndetësore. Shorti i Ligës së Kampionëve të Azisë u tërhoq më 24 gusht dhe krijoi ndeshjet Iran-Saudi në tri nga pesë grupet në pjesën perëndimore të kontinentit. Pesë grupe të tjera me katër ekipe luajnë në rajonin lindor.
Al-Hilal, skuadra e Neymarit, është planifikuar të luajë në Iran kundër Nassaji Mazandaran më 2tetor.
Al-Ittihad, skuadra e Benzemas, në të njëjtën ditë do të përballet me Sepahanin. Ndeshjet e kthimit në Arabinë Saudite janë caktuar për datën 12 dhjetor.
“Tifozët e pasionuar në Arabinë Saudite, Iran dhe gjithë Azinë tani mund të presin me padurim një kapitull të ri emocionues në futbollin e klubeve dhe kombëtareve”, shkroi AFC, duke shtuar se ekipet e vendeve “do të luftojnë në frymën e konkurrencës dhe miqësisë”.
Në nivelin e përfaqësueseve, Arabia Saudite dhe Irani u përballën për herë të fundit në vitin 2012.
