Presidenti i Francës, Emmanuel Macron dhe anëtarët e qeverisë thanë se janë “të pikëlluar dhe ndihen keq” për 2700 tifozë të Liverpoolit, të cilët kishin një biletë por nuk mundën të hynin në stadium mes trazirave dhe kaosit në finalen e Ligës së Kampionëve në Paris, ku ekipi anglez humbi nga Real Madridi 1:0. Çështja është diskutuar në takimin javor të kabinetit në pallatin presidencial Elysee të mërkurën, tha zëdhënësja e qeverisë franceze Olivia Gregoire.
“A mund t'i kishim bërë gjërat më mirë apo mund të ishte trajtuar më mirë? Po”, u tha ajo gazetarëve.
“A mund t'i përmirësojmë gjërat, veçanërisht duke pasur parasysh ngjarjet e ardhshme sportive? Sigurisht”.
Ngjarjet e së shtunës shkaktuan shqetësime në Francë dhe jashtë saj, pasi vendi do të presë Kupën Botërore të Ragbit vitin e ardhshëm dhe Lojërat Olimpike në vitin 2024.
Grupet e tifozëve të Liverpoolit u ankuan për ashpërsinë e policisë dhe organizimin e dobët në një natë shqetësuese që pa fëmijë dhe të moshuar mes atyre që u spërkatën me gaz lotsjellës.
Federata e Futbollit të Francës (FFF), tha në një njoftim se 35,000 njerëz pa bileta ose me bileta “false” u nisën për në “Stade de France”. Ata krijuan çrregullim duke bllokuar hyrjen në stadium dhe duke penguar tifozët që kishin bileta të vërteta të hynin në stadium.
UEFA, ka filluar gjithashtu të mbledhë prova në lidhje me çështjet jashtë “Stade de France” që prishën një nga ndeshjet më të mëdha në botën e sportit.
Gregoire shprehu simpatinë për 2700 tifozë të Liverpoolit, “baballarët, nënat me fëmijët e tyre të neveritur që nuk mund të merrnin pjesë në një ngjarje sportive që prisnin. Presidenti i Republikës dhe gjithë qeveria ishin të pikëlluar dhe keqardhje për këta njerëz”.
Gregoire tha se ministri i punëve të brendshme dhe ai i sportit, do të japin detaje të mëtejshme ndërsa u përgjigjen pyetjeve në një komision të Senatit të mërkurën pasdite.