Leipzigu ia vazhdon kontratën Ibrahimit dhe e huazon te Braunschweigu

Sulmuesi i krahut, Mehmet Ibrahimi e ka vazhduar kontratën me ekipin nga Bundesliga, Leipzig, por sezonin e ri do të luajë në një rang më poshtë, Bundesligën 2. Me të vazhduar kontratën me Leipzigun deri në vitin 2024, Ibrahimi është huazuar për një vit te skuadra e Eintracht Braunschweigut. Ai do të jetë pjesë e Braunschweigut deri më 30 qershor të vitit të ardhshëm dhe do ta bartë fanellën me numrin tetë, ka njoftuar ekipi gjerman. 19-vjeçari po vlerësohet si lojtar me potencial nga drejtuesit e klubit të kategorisë së dytë gjermane. Ai tashmë i është bashkuar ekipit të ri në fazën përgatitore për edicionin 2022/23.

“Me Mehmetin, ne si klub kemi huazuar një lojtar që ka potencial dhe do të donim ta shihnim në krahun e majtë të sulmit. Mehmeti është i trajnuar mirë në futboll dhe do të sigurojë edhe më shumë konkurrencë në pozitën, e cila ende nuk është finalizuar”, ka thënë drejtori i Braunschweigut, Peter Vollmann.

E huazimin te Braunschweigu, Ibrahimi po e vlerëson si hap të rëndësishëm në karrierën e tij. Ai për KOHËN ka thënë të martën se pret të ketë minutazhë tek ekipi i ri, të cilin synon ta ndihmojë në arritjen e synimeve. Mehmeti sezonin e shkuar ka luajtur për juniorët e Leipzigut dhe në 20 paraqitje në të gjitha garat ka shënuar tetë gola dhe ka asistuar tri herë. Ndërsa, prej fillimit të këtij viti, Ibrahimi është stërvitur rregullisht me ekipin e parë të Leipzigut nën urdhrat e trajnerit Domenico Tedesco.

“Si lojtar i ri që jam, mendoj se kalimi te Braunschweigu është një hap para në karrierë. Po ashtu, është ndjenjë e mirë për mua dhe nder që do të barti fanellën e këtij klubi të njohur”, ka thënë Ibrahimi. “Sigurisht që pres të luaj dhe ta ndihmoj ekipin në arritjen e synimeve. Unë fillimisht e kam vazhduar kontratën me Leipzigun deri në vitin 2024 dhe pastaj u huazova për një vit te Braunschweigu, ku do të fitoj më shumë përvojë dhe do të rritem edhe si lojtar”.

Ai gjithashtu ka shtuar se është shumë i kënaqur me paraqitjet që i pati te juniorët e Leipzigut edicionin e shkuar dhe pret të vazhdojë me formë të mirë edhe te Braunschweigu. Ibrahimi kishte edhe oferta prej klubeve të tjera, por vendosi të huazohej te Braunschweigu pas bisedave që i pati personalisht me trajnerin Michael Schiele.

“Kisha edhe oferta të tjera, por mendoj se kam bërë zgjidhjen më të mirë të mundshme, e cila erdhi pas bisedave me trajnerin dhe drejtorin sportiv që më bindën të bashkohem me ekipin. Jam i bindur se do të jem i suksesshëm duke e ditur se stili i lojës që e aplikon trajneri te Braunschwiegu më përshtatet shumë. Të luaj në Bundesligën 2 do të jetë diçka e veçantë për mua”, insistoi Ibrahimi.

Ibrahimi ka paraqitje për gjeneratat e reja të Gjermanisë (U16 e U17), ndërsa vitin e shkuar ka debutuar me ekipin U19, për të cilin i ka luajtur dy ndeshje. Braunschweigu është kthyer në Bundesligën 2 për sezonin e ri, pasi edicionin 2021/22 doli i dyti në kategorinë e tretë gjermane.